Destpêk 36 - Kurmanji Încîl

Ziriyeta Esawê Pêxember

¹ Qeyda ziriyeta Esaw ango Edom:

² Esaw jinên xwe ji keçên Kenanî anîn: Edaya keça Elonê Hîtîtî, Oholîvama keça Ena ya neviya Sîvonê Hîwî

³ û Basemata xwişka Nevayot a keça Îsmaîl.

⁴ Edayê ji Esaw re Êlîfaz anî, Basematê Reûêl anî û

⁵ Oholîvamayê jî Yeûş, Yalam û Qorax anîn. Kurên Esaw ên ku jê re li welatê Kenanê çêbûn ev bûn.

⁶ Esaw jinên xwe, kurên xwe, keçên xwe û hemû mirovên mala xwe hildan, bi pez, hemû heywan û malê xwe yê ku li welatê Kenanê bi dest xistibû re bar kir welatekî din û ji birayê xwe Aqûb veqetiya.

⁷ Malên wan ewqas pir bûn ku nikaribûn bi hev re bimînin. Ji ber ku heywanên wan zêde bû, welatê ku lê diman têra wan nedikir.

⁸ Esaw ango Edom, li herêma çiyayî ya Seîrê rûnişt.

⁹ Qeyda ziriyeta Esawê bavkalê Edomiyên ku li herêma çiyayî ya Seîrê diman ev e:

¹⁰ Navê kurên Esaw ev in: Êlîfaz, kurê Esaw ê ji Edayê û Reûêl, kurê Esaw ê ji Basematê.

¹¹ Kurên Êlîfaz: Têman, Omar, Sefo, Gatam û Qenaz.

¹² Tîmnaya cariyeya Êlîfazê kurê Esaw ji Êlîfaz re Emalêq anî. Ev neviyên Edaya jina Esaw bûn.

¹³ Kurên Reûêl: Nahat, Zerah, Şamma û Mîzza. Ev neviyên Basemata jina Esaw bûn.

¹⁴ Kurên Oholîvamaya jina Esaw a ku keça Ena û neviya Sîvon bû, ev in: Yeûş, Yalam û Qorax.

¹⁵ Di nav ziriyeta Esaw de yên ku mîr bûn, ev in: Êlîfaz nixuriyê Esaw bû. Kurên Êlîfaz ev in: Mîr Têman, Mîr Omar, Mîr Sefo, Mîr Qenaz,

¹⁶ Mîr Qorax, Mîr Gatam, Mîr Emalêq. Kurên Êlîfaz ên ku li welatê Edomê mîr bûn, ev bûn. Ev neviyên Edayê bûn.

¹⁷ Kurên Reûêlê kurê Esaw: Mîr Nahat, Mîr Zerah, Mîr Şamma û Mîr Mîzza. Kurên Reûêl ên ku li welatê Edomê mîr bûn, ev bûn. Ev neviyên jina Esaw Basematê bûn.

¹⁸ Kurên jina Esaw Oholîvama: Mîr Yeûş, Mîr Yalam û Mîr Qorax. Ev mîr ji jina Esaw Oholîvama ya keça Ena bûn.

¹⁹ Ev hemû kurên Esaw ango Edom, bûn û ev mîrên wan bûn.

Ziriyeta Seîrê Horî

²⁰ Kurên Seîrê Horî yê ku li welêt rûdinin: Lotan, Şoval, Sîvon, Ena,

²¹ Dîşon, Eser û Dîşan. Ev kurên Seîr, li welatê Edomê mîrên Horiyan bûn.

²² Kurên Lotan: Horî û Hêmam. Tîmna xwişka Lotan bû.

²³ Kurên Şoval: Elwan, Manahat, Êval, Şefo û Onam.

²⁴ Kurên Sîvon: Aya û Ena. Ew Ena bû ku gava li çolê li ber kerên bavê xwe bû, germav dîtin.

²⁵ Zarokên Ena: Dîşon û Oholîvamaya keça Ena.

²⁶ Kurên Dîşon: Hemdan, Eşban, Yîtran û Keran.

²⁷ Kurên Eser: Bîlhan, Zaewan û Eqan.

²⁸ Kurên Dîşan: Ûs û Aran.

²⁹ Mîrên Horiyan ev bûn: Lotan, Şoval, Sîvon, Ena,

³⁰ Dîşon, Eser, Dîşan. Mîrên Horiyan ên li welatê Seîrê ev bûn.

Mîrên Edomê

³¹ Beriya ku padîşahek li ser gelê Îsraêl padîşahiyê bike, padîşahên li welatê Edomê serwerî kirin ev bûn:

³² Belayê kurê Beor li ser Edomê bû padîşah. Navê bajarê wî Dînhava bû.

³³ Bela mir û Yovavê kurê Zerahê Bosrayî li cihê wî bû padîşah.

³⁴ Yovav mir û Hûşamê li ser welatê Têmaniyan li cihê wî bû padîşah.

³⁵ Hûşam mir û Hadadê kurê Bedadê ku li welatê Moavê Mîdyanê têk biribû, li cihê wî bû padîşah. Navê bajarê wî Ewît bû.

³⁶ Hadad mir û Samlayê Masrêqayî li cihê wî bû padîşah.

³⁷ Samla mir û Şawûlê Rehovot-Hannaharî li cihê wî bû padîşah.

³⁸ Şawûl mir û Baal-Hananê kurê Exbor li cihê wî bû padîşah.

³⁹ Baal-Hananê kurê Exbor mir û Hadad li cihê wî bû padîşah. Navê bajarê wî Paû bû. Navê jina wî jî Mehêtavêla keça Matrêda keça Mê-Zahavê bû.

⁴⁰ Mîrên ziriyeta Esaw, li gorî binemalên xwe û herêma ku lê bûn, ev in: Tîmna, Elwa, Yetêt,

⁴¹ Oholîvama, Ela, Pînon,

⁴² Qenaz, Têman, Mîvsar,

⁴³ Magdiyêl û Îram. Li gorî welatê ku lê rûdiniştin û ji xwe re kiribûn milk, mîrên Edomê ev bûn. Bavkalê Edomiyan Esaw bû.