Destpêk 35 - Kurmanji Încîl

Aqûbê Pêxember vegere Bêt-Êlê

¹ Xwedê ji Aqûb re got: “Here hilkişe Bêt-Êlê û li wir bi cih bibe. Li wir ji Xwedê re gorîgehekê çêke. Çaxê ku tu ji ber birayê xwe Esaw reviyabûyî, Xwedê li wir li te xuya bû.”

² Aqûb ji maliyên xwe û ji hemû kesên li ba xwe re got: “Îlahên xwe yên xerîb ên ku bi we re ne bavêjin, xwe paqij bikin û cilên xwe biguherin.

³ Werin em derkevin Bêt-Êlê. Ezê li wir ji wî Xwedayê ku di roja teng de bersiva min da û li her dera ku ez çûmê, ez bi tenê nehiştim re gorîgehekê çêkim.”

⁴ Wan hemû îlahên xerîb ên bi xwe re û guharên xwe dan Aqûb û wî ew li bin darberûya li Şexemê veşartin.

⁵ Wan bar kir û tirsa Xwedê bi ser bajarên bi der û dora wan ve hat û kesî neda pey wan.

⁶ Aqûb û hemû kesên pê re hatin Lûza welatê Kenanê. Navekî din ê Bêt-Êlê jî Lûz bû.

⁷ Li wir wî gorîgehek çêkir û navê wê “Êl-Bêt-Êl” danî. Çimkî çaxê ew ji ber birayê xwe reviyabû, Xwedê xwe li wê derê nîşanî wî dabû.

⁸ Gava dadika Rebeqayê Debora mir, ew li bin darmaziya biniya Bêt-Êlê veşartin. Li ser vê yekê, navê darê Allon-Baxût hat danîn.

⁹ Piştî ku Aqûb ji Paddan-Aramê vegeriya, Xwedê dîsa lê xuya bû û ew pîroz û bereket kir.

¹⁰ Xwedê jê re got: “Navê te Aqûb e, lê ji niha pê ve wê ji te re nebêjin Aqûb, wê navê te Îsraêl be.” Bi vî awayî wî navê Îsraêl lê danî.

¹¹ Xwedê jê re got: “Ez Xwedayê Karîndar im. Zêde û berdar bibe. Wê ji te miletek û komeke miletan çêbe û tê bibî bavkalê padîşahan.

¹² Wî welatê ku min dabû Îbrahîm û Îshaq, ezê bidim te jî û piştî te ezê wî welatî bidim ziriyeta te.”

¹³ Piştre Xwedê ji ba wî, ji wê dera ku pê re peyivîbû, hilkişiya jor.

¹⁴ Aqûb li dera ku Xwedê pê re peyivîbû kêlikek çikand. Wî li ser zeyt û pêşkêşiya rijandinê rijandin.

¹⁵ Aqûb navê wê dera ku Xwedê pê re peyivîbû Bêt-Êl danî.

Mirina Îshaqê Pêxember û Rahêla jina wî

¹⁶ Piştre wan ji Bêt-Êlê bar kir. Hê negihîştibûn Efratê, Rahêlê zarok anî û êşeke mezin kişand.

¹⁷ Gava Rahêlê di çaxê zarokanînê de êşeke mezin dikişand, pîrikê got: “Netirse, kurekî te yê din çêdibe.”

¹⁸ Lê Rahêl li ber mirinê bû. Beriya ku bimire wê navê wî Ben-Onî danî. Lê bavê wî navê kurê xwe Binyamîn danî.

¹⁹ Rahêl mir û li ser riya Efratê –ku Bêtlehem e– hat veşartin.

²⁰ Aqûb li ser gora Rahêlê kêlikek çikand û ev kêlik heta îro jî gora Rahêlê nîşan dide.

²¹ Îsraêl dîsa bar kir û konê xwe li seriya Birca Êderê danî.

²² Çaxê Îsraêl li wê herêmê dima, Rûbên çû û bi Bîlhaya cariyeya bavê xwe re raza. Dema Îsraêl ev bihîst, gelekî hêrs bû. Duwanzdeh kurên Aqûb hebûn.

²³ Kurên ji Lêayê: Rûbênê nixuriyê Aqûb, Şimûn, Lêwî, Cihûda, Îssexar û Zevûlon.

²⁴ Kurên ji Rahêlê: Ûsiv û Binyamîn.

²⁵ Kurên ji Bîlhaya cariyeya Rahêlê: Dan û Neftelî.

²⁶ Kurên ji Zîlpaya cariyeya Lêayê: Gad û Aşêr. Kurên Aqûb ên ku li Paddan-Aramê çêbûbûn, ew bûn.

²⁷ Aqûb li Mamrê hat ba Îshaqê bavê xwe ku nêzîkî Qîryat-Arbayê bû û Îbrahîm û Îshaq bi xerîbî lê mabûn. Qîryat-Arba Hevron e.

²⁸ Îshaq sed û heştê sal kir.

²⁹ Ew kal bû û ji jiyanê têrbûyî wî ruhê xwe da, mir û gihîşt pêşiyên xwe. Kurên wî Esaw û Aqûb ew veşartin.