Destpêk 20 - Kurmanji Încîl

Îbrahîmê Pêxember û Avîmelekê Padîşahê Gerarê

¹ Îbrahîm ji wê Mamrêyê koçî Negevê kir, di navbera Qadêş û Şûrê de bi cih bû. Gava li Gerarê bi xerîbî ma,

² Îbrahîm ji bo Saraya jina xwe got: “Ev xwişka min e.” Wî Avîmelekê Padîşahê Gerarê şand pey Sarayê û ew anî.

³ Lê Xwedê bi şev hat xewna Avîmelek û jê re got: “Ji ber ku te ev jinik anî, tê bimirî. Çimkî ev jinik zewicandî ye.”

⁴ Avîmelek hê dest nedabû wê. Wî got: “Ya Reb, ma tê miletekî bêsûc tune bikî?

⁵ Ma Îbrahîm bi xwe ji min re negot: ‘Ev xwişka min e?’ Ma wê jî negot: ‘Ew birayê min e?’ Min ev bi dilekî pak û destên paqij kir.”

⁶ Xwedê di xewnê de jê re got: “Erê, ez dizanim te ev bi dilekî pak kir, loma jî min tu parastî ku tu li dijî min guneh nekî. Ji ber vê yekê min nehişt ku tu destê xwe bidî wê.

⁷ Niha jina wî lê vegerîne. Çimkî ew pêxember e û wê ji bo te dua bike û tê bijî. Lê heke tu wê bi şûn ve neşînî, bizanibe ku tu û hemû kesên te wê esse bimirin.”

⁸ Avîmelek serê sibê zû rabû û hemû karmendên xwe civandin. Çaxê wî her tişt ji wan re got, ew gelek tirsiyan.

⁹ Avîmelek gazî Îbrahîm kir û jê re got: “Te çi bi me kir? Min çi neheqî bi te kir ku te ev gunehê mezin anî serê min û padîşahiya min. Te tiştê nebûyî bi min kir.”

¹⁰ Avîmelek berdewam kir û got: “Armanca te çi bû ku te ev kir?”

¹¹ Îbrahîm got: “Min ji xwe re got ku bi rastî li vir tirsa Xwedê tuneye û wê ji ber jina min, min bikujin.

¹² Bi rastî jî ew xwişka min e. Bavê me yek e, lê diya me cuda ye û ew bû jina min.

¹³ Çaxê Xwedê ez ji mala bavê min şandim xerîbiyê, min jê re got: ‘Dilsoziya xwe wiha nîşanî min bide: Her dera ku em biçinê, ji bo min bibêje: Ev birayê min e.’”

¹⁴ Avîmelek pez û dewar, xulam û xadim dan Îbrahîm û jina wî Sara lê vegerand.

¹⁵ Avîmelek got: “Va ye welatê min li ber te ye. Cihê li ber çavê te xweş e, lê bimîne.”

¹⁶ Wî ji Sarayê re got: “Va ye ez hezar perçe zîv didim birayê te. Ev ji bo kesên li ba te delîlek e ku kesî dest nedaye te. Bila herkes bizanibe ku tu bêsûc î.”

¹⁷ Îbrahîm dua kir û Xwedê şifa da Avîmelek, jina wî û cariyeyên wî. Êdî wan dikaribû zarokan bînin.

¹⁸ Çimkî Xudan ji bo Saraya jina Îbrahîm, zikê hemû jinên mala Avîmelek girtibûn.