Destpêk 13 - Kurmanji Încîl

Avramê Pêxember û Lûtê Pêxember ji hev vediqetin

¹ Avram bi jina xwe û bi her tiştê xwe re ji Misrê derket ku here Negevê. Lût jî pê re bû.

² Avram gelek dewlemend bû. Keriyên wî, zêr û zîvên wî hebûn.

³ Wî ji Negevê destpê kir û heta hat Bêt-Êlê, cih bi cih koç kir. Wî di navbera Bêt-Êl û Ayê de berê jî konê xwe vedabû

⁴ û cara pêşî gorîgeh lê çêkiribû. Avram li wir bi navê Xudan gazî kir.

⁵ Kon, pez û dewarên Lûtê ku bi Avram re koç dikir jî hebûn.

⁶ Erd têra wan nedikir ku bi hev re bijîn, çimkî hebûna wan ewqas pir bû ku nikaribûn bi hev re bimînin.

⁷ Di nav şivanên Avram û Lût de pevçûn çêbû. –Di wê demê de Kenanî û Perîzzî jî li wir dijiyan.–

⁸ Avram ji Lût re got: “Bila di navbera min û te û di navbera şivanên min û şivanên te de pevçûn çênebe. Çimkî em bira ne.

⁹ Ma tevahiya welêt ne li pêş te ye? Were em ji hev veqetin. Heke tu herî aliyê çepê, ezê herim aliyê rastê. Heke tu herî aliyê rastê, ezê herim aliyê çepê.”

¹⁰ Lût serê xwe rakir û dît ku tevahiya Deşta Şerîayê heta Soarê avî ye, wekî Bexçeyê Xudan û welatê Misrê ye. Beriya ku Xudan Sodom û Gomorayê wêran bike, deşt wiha bû.

¹¹ Lût ji bo xwe tevahiya Deşta Şerîayê hilbijart û bi aliyê rojhilat ve koç kir. Herdu bi vî awayî ji hev veqetiyan.

¹² Avram li welatê Kenanê bi cih bû. Lût li bajarên deştê rûnişt û bi aliyê Sodomê ve kon vedan.

¹³ Sodomî xerab bûn. Ew li dijî Xudan gelek gunehkar bûn.

¹⁴ Piştî ku Lût ji Avram veqetiya, Xudan jê re got: “Ji cihê ku tu tê de yî niha serê xwe rake, li bakur û başûr, li rojhilat û rojava binêre.

¹⁵ Wê tevahiya welatê ku tu dibînî ezê her û her bidim te û ziriyeta te.

¹⁶ Ezê ziriyeta te wekî toza erdê zêde bikim. Heke kesek bikaribe toza erdê bijmêre, wê bikaribe ziriyeta te jî bijmêre.

¹⁷ Rabe û li seranserê welêt bigere, çimkî ezê wî bidim te.”

¹⁸ Avram konên xwe hilanîn û çû Hevronê, li ber darmaziyên Mamrê bi cih bû. Wî li wir gorîgehek ji Xudan re çêkir.