Derketin 8 - Kurmanji ÎncîlBelaya duyemîn: Beq 1 Xudan ji Mûsa re got: “Here ba Firewn û jê re bêje: ‘Xudan wiha dibêje: Gelê min berde ku ew xulamiya min bike. 2 Heke tu nekî, ezê seranserê welatê te bi beqan ceza bikim. 3 Wê çem bi beqan tije bibe. Wê derkevin û bikevin qesra te, bikevin odeya te ya razanê, bikevin nav nivînên te. Wê bikevin malên karmendên te û gelê te. Wê bikevin tenûran û nav teştên hevîr. 4 Wê beq werin ser te, hemû karmendên te û gelê te.’” 5 Xudan ji Mûsa re got: “Ji Harûn re bêje: ‘Gopalê destê xwe dirêjî ser çeman, ser qamirgehan û ser cihokan bike ku beq bi ser welatê Misrê ve bigirin.’” 6 Harûn destê xwe dirêjî ser avên Misrê kir, beq derketin û welatê Misrê dagirtin. 7 Sêrbazan jî bi sêra xwe wisa kirin û li welatê Misrê beq belav kirin. 8 Firewn gazî Mûsa û Harûn kir û got: “Ji Xudan lava bikin ku beqan ji min û gelê min dûr bixe. Ezê gel berdim ku ji Xudan re qurbanan serjê bikin.” 9 Mûsa ji Firewn re got: “Tu bêje ka ez kengê ji bo te, ji bo karmendên te û ji bo gelê te lava bikim ku beq ji te û malên te bên avêtin û tenê di çêm de bimînin.” 10 Wî got: “Sibê.” Mûsa got: “Baş e! Bi vî awayî tê bizanibî ku yekî wek Xwedayê me Xudan tuneye. 11 Wê beq ji te, ji karmendên te û ji gelê te dûr bikevin û tenê di çêm de bimînin.” 12 Mûsa û Harûn ji ba Firewn rabûn. Mûsa, li ser belaya beqan ku Xudan anîbû serê Firewn, jê lava kir. 13 Xudan li gorî daxwaza Mûsa kir û beq li malan, li hewşan û li nav zeviyan mirin. 14 Lod bi lod beq civandin û bêhn ket welêt. 15 Lê gava Firewn rihetî dît, çawa ku Xudan gotibû wî dilê xwe hişk kir û dîsa guhdariya wan nekir. Belaya sêyemîn: Pêşû 16 Xudan ji Mûsa re got: “Ji Harûn re bêje: ‘Gopalê xwe dirêj bike û li toza erdê bixe ku toza seranserê welatê Misrê bibe pêşû.’” 17 Wan wisa kir. Harûn gopalê xwe dirêj kir û li toza erdê xist. Li ser mirovan û heywanan pêşû tije bûn. Li seranserê welatê Misrê tevahiya toza erdê bû pêşû. 18 Sêrbazan jî xwest ku bi sêra xwe tozê bikin pêşû, lê nikaribûn. Li ser serê mirov û heywanan pêşû tije bûn. 19 Sêrbazan ji Firewn re got: “Tiliya Xwedê di vî karî de heye!” Lê wekî Xudan gotibû, dilê Firewn hişk bû û guhdariya wan nekir. Belaya çaremîn: Kermoz 20 Xudan ji Mûsa re got: “Serê sibê zû rabe, li ber Firewn bisekine. Çaxê ew diçe ber avê, jê re bêje: ‘Xudan wiha dibêje: Gelê min berde ku xulamiya min bike. 21 Heke tu nekî, ezê kermozan bişînim ser te, karmendên te, gelê te û nav malên te. Wê malên Misriyan û axa li ser dijîn bi kermozan tije bibin. 22 “‘Lê wê rojê ezê herêma Goşenê cuda bikim. Çimkî gelê min li wir rûdine. Wê li wir kermoz tunebin. Bi vî awayî tê bizanibî ku li vî welatî Xudan ez im. 23 Ezê ferq û meylî bixim nav gelê xwe û gelê te. Wê sibê ev nîşan pêk were.’” 24 Xudan wiha kir. Wî gelek kermoz şandin ser qesra Firewn û malên karmendên wî. Seranserê welatê Misrê ji ber kermozan xera bû. 25 Firewn gazî Mûsa û Harûn kir û ji wan re got: “Herin li vî welatî ji Xwedayê xwe re qurbanan serjê bikin.” 26 Lê Mûsa got: “Ne rast e em wiha bikin. Çimkî tiştê Misrî heram dihesibînin em radibin wan ji Xwedayê xwe Xudan re dikin qurban. Îcar tiştê ku Misrî kirêt dihesibînin, em li ber çavê wan serjê bikin, wê me nedin ber keviran? 27 Emê sê rojan di beriyê re herin û emê ji Xwedayê xwe Xudan re, çawa ku li me emir kiriye qurbanan serjê bikin.” 28 Firewn got: “Ezê we berdim ku hûn li beriyê ji Xwedayê xwe Xudan re qurbanan serjê bikin. Lê hûnê pir dûr neçin. Niha ji bo min lava bikin.” 29 Mûsa got: “Gava ez ji ba te rabim, ezê ji Xudan lava bikim ku sibê kermozan ji te, ji karmendên te û ji gelê te dûr bixe. Lê bila Firewn dîsa hîle neke û ji gel re nebe asteng ku dixwaze qurbanan ji Xudan re serjê bike.” 30 Mûsa ji ba Firewn rabû. Wî ji Xudan lava kir. 31 Xudan daxwaza Mûsa pêk anî, kermozan ji Firewn, ji karmendên wî û ji gelê wî dûr xist. Yek jî nema. 32 Lê dilê Firewn dîsa hişk bû û gel berneda. |
Kurdish New Testament and Psalms + © Bible Society in Turkey, 2005.
Bible Society in Turkey