Derketin 7 - Kurmanji Încîl

¹ Xudan ji Mûsa re got: “Va ye ez te ji Firewn re dikim wekî Xwedê û wê birayê te Harûn bibe pêxemberê te.

² Her tiştê ku min ji te re got, ji birayê xwe Harûn re bibêje. Bila Harûn ji Firewn bixwaze ku gelê Îsraêl ji welatê xwe berde.

³ Lê ezê dilê Firewn hişk bikim û nîşan û kerametên xwe li welatê Misrê zêde bikim.

⁴ Gava Firewn guhdariya we neke, ezê destê xwe deynim ser Misrê û bi giranî ceza bikim. Ezê gelê xwe yê Îsraêlî ref bi ref, ji welatê Misrê derxim.

⁵ Gava min destê xwe dirêjî Misrê kir û gelê Îsraêl ji nav wan deranî, wê Misrî bizanibin ku Xudan ez im.”

⁶ Çawa ku Xudan li wan emir kiribû, Mûsa û Harûn wisa kir.

⁷ Gava bi Firewn re axivîn, Mûsa heştê, Harûn jî heştê û sê salî bû.

Gopalê Harûnê Kahin dibe mar

⁸ Xudan ji Mûsa û Harûn re got:

⁹ “Gava Firewn ji we re bêje: ‘Kerametekê çêkin,’ tê ji Harûn re bêje: ‘Gopalê xwe hilde û bavêje ber Firewn. Wê bibe mar.’”

¹⁰ Bi vî awayî Mûsa û Harûn çûn ba Firewn û çawa ku Xudan emir kiribû, wisa kirin. Harûn gopalê xwe avêt ber Firewn û karmendên wî. Gopal jî bû mar.

¹¹ Firewn gazî aqilmend û sêrbazên xwe kir. Sêrbazên Misrê jî bi sêra xwe wisa kirin.

¹² Her yekî gopalê xwe avêt û gopalên wan bûn mar. Lê gopalê Harûn, gopalên wan daqurtandin.

¹³ Çawa ku Xudan gotibû, dilê Firewn hişk bû û guhdariya wan nekir.

Belaya yekemîn: Av dibe xwîn

¹⁴ Xudan ji Mûsa re got: “Dilê Firewn hişk e, ew naxwaze gel berde.

¹⁵ Serê sibê here ba Firewn. Gava ew diçe Nîlê, tu li keviya çem li benda wî bisekine. Gopalê ku bûbû mar jî bila di destê te de be.

¹⁶ Jê re bêje: ‘Xudan, Xwedayê Îbraniyan ez şandim ku ji te re bêjim gelê min berde ku li beriyê xulamiya min bikin. Lê heta niha te guhdarî nekir.

¹⁷ Xudan wiha dibêje: Tê bi vê yekê bizanibî ku ez Xudan im. Ezê gopalê destê xwe li ava Nîlê bixim û wê bibe xwîn.

¹⁸ Wê masî bimirin û bêhn bikeve çem. Wê Misrî nikaribin ava çêm vexwin.’”

¹⁹ Xudan ji Mûsa re got: “Ji Harûn re bêje: ‘Gopalê xwe hilde û destê xwe dirêjî ser avên Misrê –çem û qamirgehên wî, cihok û hemû çalên wan ên avê– bike ku bibin xwîn. Wê li seranserê welatê Misrê, hemû avên di firaxên dar û keviran de bibin xwîn.’”

²⁰ Çawa ku Xudan li wan emir kiribû, Mûsa û Harûn wisa kir. Harûn li ber çavê Firewn û karmendên wî gopalê xwe rakir û li ava çêm xist. Tevahiya çem bû xwîn

²¹ û hemû masiyên di çêm de mirin. Bêhn kete çem û Misriyan nikaribûn ji ava çêm vexwin. Li seranserê welatê Misrê xwîn hebû.

²² Sêrbazên Misrê jî bi sêra xwe heman tiştî kirin. Çawa ku Xudan gotibû, dilê Firewn hişk bû û guhdariya wan nekir.

²³ Firewn ji xwe re nekir xem û berê xwe da qesra xwe.

²⁴ Misriyan li kêleka çêm dest bi kolanê kir. Çimkî nikaribûn ji ava çêm vexwin.

²⁵ Heft roj di ser lêxistina Xudan a çêm re derbas bû.