Derketin 6 - Kurmanji Încîl

¹ Xudan ji Mûsa re got: “Tê bibînî niha ezê çi bi Firewn bikim. Wê ji ber destê min ê hêzdar gelê Îsraêl berde û ji ber destê min ê hêzdar wan ji welatê xwe biqewitîne.”

² Xwedê careke din ji Mûsa re got: “Ez Yahwe me.

³ Ez wekî Xwedayê Karîndar li Îbrahîm, Îshaq û Aqûb xuya bûm, lê min xwe bi navê Yahwe bi wan neda naskirin.

⁴ Min bi wan re peymanekê çêkir ku ez welatê Kenanê bidim wan ku lê bi xerîbî diman.

⁵ Min nalîna gelê Îsraêl ku koleyên Misriyan in bihîst û peymana xwe bi bîr anî.

⁶ “Loma ji gelê Îsraêl re bêje: ‘Ez Xudan im. Ezê we ji bin barê Misriyan derînim û we ji koletiya wan azad bikim. Ezê bi zendê xwe yê dirêjkirî wan bi giranî ceza bikim û we rizgar bikim.

⁷ Ezê we bikim gelê xwe û bibim Xwedayê we. Hûnê bizanibin ku ez Xwedayê we Xudan im û min hûn ji bin barê Misriyan deranî.

⁸ Ezê we bibim wî welatê ku min soz dabû bidim Îbrahîm, Îshaq û Aqûb. Ezê wê derê bikim milkê we. Ez Xudan im.’”

⁹ Mûsa ev ji gelê Îsraêl re got, lê ji ber ku hêviyên wan şikestibûn û di bin koletiyeke giran de bûn guh nedanê.

¹⁰ Xudan ji Mûsa re got:

¹¹ “Here, ji Firewn re bêje bila ji welatê xwe gelê Îsraêl berde.”

¹² Lê Mûsa ji Xudan re got: “Gelê Îsraêl guhdariya min nake, wê Firewn çawa guhdariya min bike? Ji xwe ez mirovekî bêzar û ziman im!”

¹³ Xudan li ser gelê Îsraêl û Firewn bi Mûsa û Harûn re peyivî û li wan emir kir ku wan ji welatê Misrê derîne.

Ziriyeta Mûsa û Harûn

¹⁴ Serekên malbatên Îsraêliyan ev bûn: Kurên Rûbênê nixuriyê Îsraêl: Henox, Pallû, Hesron û Karmî. Ev ji binemala Rûbên in.

¹⁵ Kurên Şimûn: Yemûêl, Yamîn, Ohad, Yaxîn, Sohar û kurê jineke Kenanî Şawûl. Ev ji binemala Şimûn in.

¹⁶ Li gorî qeydên ziriyeta wan, kurên Lêwî ev in: Gêrşon, Qohat û Mêrarî. Lêwî 137 sal kir.

¹⁷ Kurên Gêrşon, li gorî binemalên xwe ev in: Lîvnî û Şîmî.

¹⁸ Kurên Qohat: Emram, Yîshar, Hevron û Ûzziyêl. Qohat 133 sal kir.

¹⁹ Kurên Mêrarî: Mahlî û Mûşî. Li gorî qeydên ziriyetên wan, binemalên Lêwî ev bûn.

²⁰ Emram bi meta xwe Yoxeved re zewicî û Yoxevedê jê re Harûn û Mûsa anî. Emram 137 sal kir.

²¹ Kurên Yîshar: Qorax, Nefeg û Zikrî.

²² Kurên Ûzziyêl: Mîşaêl, Êlsafan û Sîtrî.

²³ Harûn xwişka Nahşon, Êlîşevaya keça Emmînadav ji xwe re anî. Ji Êlîşevayê jê re Nadav, Avîhû, Êlezar û Îtamar çêbûn.

²⁴ Kurên Qorax: Assîr, Êlqana û Aviyasaf. Binemalên Qoraxî ev in.

²⁵ Kurê Harûn Êlezar, ji keçên Pûtiyêlê yek ji xwe re anî û ji wê Pînehas çêbû. Li gorî binemalên xwe serekên malbatên Lêwî ev in.

²⁶ Mûsa û Harûnê ku Xudan ji wan re got: “Gelê Îsraêl ref bi ref ji welatê Misrê derînin” ev bûn.

²⁷ Kesên ku ji bo gelê Îsraêl ji Misrê derînin, bi Firewn re peyivîn Mûsa û Harûn in.

Mûsa û Harûn bi ya Xudan dikin

²⁸ Roja Xudan li welatê Misrê bi Mûsa re peyivî,

²⁹ wî jê re got: “Ez Xudan im. Her tiştê min ji te re got, ji Firewn re bibêje.”

³⁰ Lê Mûsa li hizûra Xudan wiha got: “Ji xwe ez mirovekî bêzar û ziman im, wê Firewn çawa guh bide min?”