Derketin 40 - Kurmanji Încîl

Vedana Konê Hevdîtinê

¹ Xudan ji Mûsa re got:

² “Tê meskenê Konê Hevdîtinê di roja pêşî ya meha pêşî de çêkî.

³ Tê Sindoqa Şahidiyê deynî wê derê û bi perdeyê veşêrî.

⁴ Tê maseyê bînî hundir û tiştên li ser wê rêz bikî. Tê şamdankê bînî hundir û qendîlên wê bi cih bikî.

⁵ Tê gorîgeha zêrîn a bixûrê deynî pêş Sindoqa Şahidiyê û perdeyê bavêjî ser deriyê meskên.

⁶ Tê gorîgeha qurbana şewitandinê deynî ber deriyê meskenê Konê Hevdîtinê.

⁷ Tê teştê deynî navbera Konê Hevdîtinê û gorîgehê û hundirê wê bi avê dagirî.

⁸ Tê li dora kon hewşê çêkî û perdeyê bavêjî deriyê hewşê.

⁹ “Tê rûnê kifşkirinê hildî, meskên û hemû tiştên tê de rûn bikî. Tê wê û hemû taximên wê pîroz bikî ku pîroz be.

¹⁰ Tê gorîgeha qurbana şewitandinê û hemû taximên wê rûn bikî. Tê gorîgeh pîroz bikî ku bi zêdebarî pîroz be.

¹¹ Tê teştê tevî lingê wê rûn û pîroz bikî.

¹² “Tê Harûn û kurên wî bînî ber deriyê Konê Hevdîtinê, wan bi avê bişoyî

¹³ û kincên pîroz li Harûn bikî. Ji bo ku ji min re kahintiyê bike, tê wî rûn bikî ku pîroz be.

¹⁴ Tê kurên wî jî bînî û mîntanan li wan bikî.

¹⁵ Ji bo ku ew ji min re kahintiyê bikin, çawa te bavê wan rûn kir, tê wan jî rûn bikî. Wê rûnkirina wan bike ku ew di nav nifşên xwe de kahintiya herheyî bikin.”

¹⁶ Mûsa her tişt bi awayê ku Xudan lê emir kiribû kir.

¹⁷ Di roja pêşî ya meha pêşî ya sala diduyan de mesken hat avakirin.

¹⁸ Mûsa meskên ava kir, binikên wî danîn, çîtên wî daçikandin, stûnên wî rakirin û girşên wî lêxistin.

¹⁹ Wî kon li ser meskên nixamt û xêlî ser kon nixamt, çawa ku Xudan lê emir kiribû.

²⁰ Wî Lewheyên Şahidiyê hildan û xistin hundirê sindoqê. Destiyên sindoqê lê xistin, derxûn ji jor ve danî ser sindoqê.

²¹ Wî sindoq anî hundirê meskên, perdeya jihevqetandinê lêxist û Sindoqa Şahidiyê veşart, çawa ku Xudan lê emir kiribû.

²² Wî mase anî hundirê Konê Hevdîtinê, li aliyê bakurê meskên, li derveyî perdeyê bi cih kir

²³ û li hizûra Xudan nan li ser rêz kirin, çawa ku wî lê emir kiribû.

²⁴ Mûsa şamdank anî Konê Hevdîtinê, li hember maseyê, li aliyê başûrê meskên bi cih kir

²⁵ û li hizûra Xudan qendîl pêxistin, çawa ku wî lê emir kiribû.

²⁶ Wî gorîgeha zêrîn, li Konê Hevdîtinê danî pêşberî perdeyê

²⁷ û li serê bixûra bêhnxweş pêxist, çawa ku Xudan lê emir kiribû.

²⁸ Wî perdeya deriyê meskên lêxist,

²⁹ gorîgeha qurbana şewitandinê danî ber derê meskenê Konê Hevdîtinê û li ser wê qurbana şewitandinê û pêşkêşiya dexlê pêşkêş kir, çawa ku Xudan lê emir kiribû.

³⁰ Wî teşt danî navbera Konê Hevdîtinê û gorîgehê û ji bo şûştinê bi avê dagirt

³¹ ku Mûsa, Harûn û kurên Harûn dest û lingên xwe li wir dişûştin.

³² Her gava ew diketin Konê Hevdîtinê û nêzîkî gorîgehê dibûn, wan dest û lingên xwe dişûştin, çawa ku Xudan li Mûsa emir kiribû.

³³ Wî hewş li dora meskên û gorîgehê çêkir û perde avêt ser deriyê hewşê. Bi vî awayî Mûsa kar temam kir.

Ewrê li ser Konê Hevdîtinê

³⁴ Ewr ser Konê Hevdîtinê nixamt û rûmeta Xudan mesken dagirt.

³⁵ Mûsa nikaribû biketa Konê Hevdîtinê, çimkî ewr li ser wê disekinî û rûmeta Xudan mesken tije kiribû.

³⁶ Di tevahiya rêwîtiya wan de, gava ewr ji ser meskên radibû, Îsraêlî jî koç dikir.

³⁷ Lê heke ewr ranebûya, heta roja ewr radibû koç nedikirin.

³⁸ Çimkî di tevahiya rêwîtiya wan de, bi roj li ser meskên ewrê Xudan, bi şev jî êgir rê nîşanî tevahiya Mala Îsraêl dida.