Derketin 39 - Kurmanji Încîl

Çêkirina kincên kahinan

¹ Ji bo xizmeta li Cihê Pîroz, bi tayên sor, binevşî û şînê tarî kincên tenik honandî çêkirin. Çawa ku Xudan li Mûsa emir kiriye, wan ji Harûn re kincên pîroz çêkirin.

Çêkirina Êfodê

² Wî êfod bi şeridên zêrkirî, tayên sor, binevşî û şînê tarî û kitanê tenik honandî çêkir.

³ Wan zêr bi awayekî tenik kutan û pehn kirin. Ji bo di nav tayên sor, binevşî û şînê tarî û kitanê tenik honandî de bi kar bînin, têl bi têl bi hosteyî birîn.

⁴ Di du kujên êfodê de sermil çêkirin û bi hev ve danîn.

⁵ Şerîda bi hosteyî ya li ser êfodê, ji aliyê heman hosteyî û bi heman tiştan hatibû çêkirin. Ew bi şeridên zêrkirî, tayên sor, binevşî û şînê tarî û kitanê tenik honandî bû, çawa ku Xudan li Mûsa emir kiribû.

⁶ Kevirên onîks jî hatin amadekirin. Ew di nav malikên zêrîn de hatin danîn û navên kurên Îsraêl wekî mora kolayî li ser wan hatin kolandin.

⁷ Wî ew ji bo kurên Îsraêl wekî kevirên bîranînê danîn ser sermilên êfodê, çawa ku Xudan li Mûsa emir kiribû.

Çêkirina Bersing

⁸ Wî bersing jî wekî êfodê, bi karê hosteyî û bi şeridên zêrkirî, tayên sor, binevşî û şînê tarî û kitanê tenik honandî çêkir.

⁹ Ew çargoşe û du qat bû. Dirêjahiya wê bostek, berfirehiya wê jî bostek bû.

¹⁰ Wan li ser wê, çar rêz kevir çêkirin. Di rêza pêşî de aqût, topaz, zimrûd,

¹¹ di rêza diduyan de eqîqê binevşî, lapîs û eqîqê spî,

¹² di rêza sisêyan de eqîqê ezmanî, egad û ametîst

¹³ û di rêza çaran de fîrûze, onîks û yêşîm hebû. Kevir di malikên zêrîn de hatibûn bicihkirin.

¹⁴ Duwanzdeh kevir hebûn ku li ser wan navên kurên Îsraêl hene. Li ser her kevirî, wekî mor yek bi yek navê duwanzdeh eşîran bû.

¹⁵ Wan ji bo bersing ji zêrê xas zincîrên badayî çêkirin.

¹⁶ Du malikên zêr û du xelekên zêrîn çêkirin û herdu xelek danîn ser du kujên bersing.

¹⁷ Wan du zincîrên zêr bi xelekên kujên bersing ve xistin.

¹⁸ Herdu serên zincîrên din di ser du malikan re derbas kirin û li pêşiya êfodê bi ser sermilan ve girê dan.

¹⁹ Du xelekên zêrîn ên din çêkirin û li biniya herdu kujên bersing, li pêşiya êfodê, bi kujê hundir ve danîn.

²⁰ Du xelekên zêrîn ên din çêkirin û li aliyê pêşî yê êfodê, di binê herdu sermilan de, nêzîkî dera ku êfod digihîjê danîn ser şerîda ku bi hosteyî hatiye honandin.

²¹ Xelekên bersing û êfodê bi şehbenê şînê tarî bi hev ve girê dan. Bersing li ser şerîda êfodê ya ku bi hosteyî hatiye honandin bimîne û ji êfodê neqete, çawa ku Xudan li Mûsa emir kiribû.

Çêkirina cilên din ên kahintiyê

²² Wî xiftanê di bin êfodê de bi tevahî ji tayê şînê tarî honandî çêkir.

²³ Ji bo serî tê re derbas be, dora wê vekirî hat hiştin. Ji bo ku neqete, dora wê mîna berstûk veçinî û dirût.

²⁴ Wan dawa xiftên ji tayên sor, binevşî û şînê tarî û kitanê tenik honandî, motîvên hinarokan bi cih kirin.

²⁵ Zengilokên zêrê xas jî çêkirin û li navbera hinarokan li dora dawa xiftên bi cih kirin.

²⁶ Bi vî awayî bi dorê zengilokek û hinarokek, zengilokek û hinarokek hebû, çawa Xudan li Mûsa emir kiribû.

²⁷ Wan ji bo Harûn û kurên wî, mîntanên ji kitanê tenik,

²⁸ şaşikê ji kitanê tenik, kumên binexş yên ji kitanê tenik, derpiyên ji kitanê tenik honandî,

²⁹ ji tayên sor, binevşî û şînê tarî, ji kitanê tenik honandî ê bi hunerî hatiye pêçan şûtik çêkirin, çawa ku Xudan li Mûsa emir kiribû.

³⁰ Wan bereniyeke taca pîroz ji zêrê xas çêkir û li ser, çawa ku morekê biqewirînin gotina: “Ji Xudan re veqetandî ye” nivîsîn.

³¹ Ji bo girêdana şaşikê, şehbenekî şînê tarî pêve kirin, çawa ku Xudan li Mûsa emir kiribû.

Temambûna kar

³² Bi vî awayî hemû karên meskenê Konê Hevdîtinê temam bû. Gelê Îsraêl her tişt bi awayê ku Xudan li Mûsa emir kiribû çêkirin.

³³ Piştre wan hemû tiştên meskên birin ba Mûsa. Wan kon û hemû taximên wî; qopçe, çîtên çik, girş, stûn, binik,

³⁴ xeliyeke çermê beranê bi hibra sor, xeliyeke çermê beran ê şînê tarî, perdeya jihevqetandinê,

³⁵ Sindoqa Şahidiyê û destiyên wê, derxûn,

³⁶ mase û hemû taximên wê, Nanê Hizûrê,

³⁷ şamdanka ji zêrê xas tevî qendîlên wê ku tên rêzkirin û taximên wê, zeyta qendîlan,

³⁸ gorîgeha zêrîn, rûnê kifşkirinê, bixûra bêhnxweş, perdeya deriyê kon,

³⁹ gorîgeha tûncîn, serada wê ya tûncîn, destî û hemû taximên wê, teşta wê tevî lingên wê,

⁴⁰ perdeyên dora hewşê, stûn û binikên wê, perdeya deriyê hewşê û qeytanên wê, girş, hemû taximên xizmetê yên Konê Hevdîtinê,

⁴¹ kincên tenik honandî yên xizmeta Cihê Pîroz, ji bo ku kahintiyê bike kincên Harûnê Kahin ên pîroz û kincên kurên wî anîn ba Mûsa.

⁴² Gelê Îsraêl her tişt bi awayê ku Xudan li Mûsa emir kiribû kirin.

⁴³ Gava Mûsa dît ku wan tevahiya karan çawa ku Xudan emir kiribû kirine, wî ew pîroz kirin.