Derketin 38 - Kurmanji Încîl

Çêkirina Gorîgeha Qurbana Şewitandinê

¹ Besalêl gorîgeha qurbana şewitandinê ji dara aqasyayê çargoşe çêkir. Dirêjî û berfirehiya wê pênc gaz, bilindahiya wê sê gaz bû.

² Wî li ser her çar kujên jorîn qiloç çêkirin ku pê ve bûn yek perçe. Wî ew bi tûnc kiras kir.

³ Wî hemû taximên gorîgehê; sîtil, bêr, tasik, sêgoyên goşt û tepsikan, ji tûnc çêkirin.

⁴ Ji bo gorîgehê, ji bin keviya wê heta nîvî, wî wekî torê serada tûncîn çêkir.

⁵ Wî li her çar kêlekên serada tûncîn ji bo hilgirtinê destiyan çêkirin.

⁶ Wî destî ji dara aqasyayê çêkirin û bi tûnc kiras kirin.

⁷ Ji bo hilgirtina gorîgehê, wî destî li xelekên kêlekan xist. Wî gorîgeh ji textikan çêkir ku hundirê wê vala be.

Çêkirina Sîtila Xweşûştinê

⁸ Wî ji neynikên jinên ku li ber deriyê Konê Hevdîtinê xizmet dikirin, teşteke tûncîn a ku lingên wê jî tûnc bûn çêkir.

Çêkirina Hewşa Konê Hevdîtinê

⁹ Wî hewş çêkir. Wî perdeyên hewşê yên li aliyê başûr, ji kitanê tenik honandî û bi dirêjahiya sed gaz çêkirin.

¹⁰ Bîst stûn û binikên wan ên perdeyan ji tûnc bûn. Çengelên stûnan û bistên wan ji zîv bûn.

¹¹ Ji bo aliyê bakur wî perdeyên dirêjahiya sed gaz çêkirin. Bîst stûnên û bîst binikên wan ji tûnc, çengelên stûnan û bistên wan ji zîv bûn.

¹² Li aliyê rojavayê hewşê perde hebûn ku bejna wan pêncî gaz e. Deh stûn û deh binik jî hebûn. Çengelên stûnan û bistên wan ji zîv bûn.

¹³ Berfirehiya aliyê hewşê yê ku li rojhilat dinêre pêncî gaz bû.

¹⁴ Li aliyekî deriyê hewşê perdeyeke panzdeh gaz, sê stûn û sê binik hebûn.

¹⁵ Li aliyê din ê deriyê hewşê jî perdeyeke panzdeh gaz, sê stûn û sê binik hebûn.

¹⁶ Hemû perdeyên li der û dora hewşê, ji kitanê tenik honandî hatibûn çêkirin.

¹⁷ Binikên stûnan ji tûnc, çengelên stûnan û bistên wan ji zîv bûn. Serî bi zîv hatibûn kiraskirin. Hemû stûnên hewşê bi çemberên zîv hatibûn pêçan.

¹⁸ Perdeya deriyê hewşê ya binexş, ji kitanê tenik honandî û tayên sor, binevşî û şînê tarî hatibû çêkirin. Dirêjahiya vê perdeyê bîst gaz, bilindahiya wê, wekî perdeyên hewşê pênc gaz bû.

¹⁹ Ji tûnc çar stûn û çar binikê wê hebûn. Çengelên stûnan, serî û bistên wan ji zîv bû.

²⁰ Hemû singên meskên û hewşa dora meskên, ji tûnc bûn.

Malzemeyên Konê Hevdîtinê

²¹ Hemû hesabê tiştên ku di çêkirina meskên de hatibûn bikaranîn, li gorî emrê Mûsa, di bin destê Îtamarê kurê Harûnê Kahin de, ji aliyê Lêwiyiyan ve hatin qeydkirin. Lewheyên ku Deh Emir li ser hatibûn nivîsandin li vir dihatin parastin.

²² Hemû karên ku Xudan li Mûsa emir kiribû, ji eşîra Cihûda, Besalêlê kurê Ûriyê kurê Hûr kir.

²³ Oholîavê kurê Ahîsamakê ji eşîra Dan jî jê re bû alîkar. Ew necar, di rîsê tayên sor, binevşî û şînê tarî û kitanê tenik de nexişkarekî hoste bû.

²⁴ Zêrê ku di çêkirina hemû karên Pîrozgehê de hat bikaranîn, li gorî şekelê Pîrozgehê 29 telant û 730 şekel bû.

²⁵ Zîvê ji civakê bûn û hatibûn hejmartin, li gorî şekelê Pîrozgehê 100 telant û 1.775 şekel bû.

²⁶ 603 550 kesên ku hatibûn hejmartin û emrê wan bîst salî û mezintir bûn, serê kesê bekayek, ango li gorî nîv şekelê Pîrozgehê diket.

²⁷ Ji bo pîrozgehê û rijandina binikên perdeyan 100 telant zîv hat xebitandin. Ji bo her binikekê telantek, ji bo sed binikî sed telant zîv hat xerckirin.

²⁸ Ji bo çengelên stûnan, pêçana serî û gopîtan 1.775 şekel hat xerckirin.

²⁹ Tûncê ku hatibû dayîn 70 telant 2.400 şekel bû.

³⁰ Bi wî binikên deriyê Konê Hevdîtinê, gorîgeha tûncîn û serada wê yên tûncîn, hemû taximên gorîgehê,

³¹ binikên dora hewşê, binikên deriyê hewşê, hemû singên meskên û hemû singên dora hewşê çêkirin.