Derketin 36 - Kurmanji Încîl

¹ “Besalêl û Oholîav û hemû kesên jêhatî yên ku Xudan feraset û fêmdarî daye wan ku di avakirina pîrozgehê de kar bikin, wê li gorî her tiştê ku Xudan li wan emir kiriye bixebitin.”

² Mûsa gazî Besalêl û Oholîav û her kesê jêhatî kir ku Xudan feraset dayê, her kesê ku dilê wî ji bo xebatê lê dixe.

³ Wan hemû pêşkêşiyên ku gelê Îsraêl ji bo xizmetkirina pîrozgehê anîbûn ji Mûsa standin. Gelê Îsraêl her sibe pêşkêşiya dilxwazî ji Mûsa re anîn.

⁴ Hemû hosteyên ku her karên pîrozgehê çêdikirin yek bi yek hatin ba Mûsa.

⁵ Jê re got: “Gel, ji ya ku Xudan ji bo çêkirinê li me emir kir pir zêdetir tîne.”

⁶ Li ser vê yekê Mûsa emir kir û got: “Ne mêr û ne jî jin, bila êdî kes ji bo pîrozgehê tu pêşkêşiyan neyîne.” Emir ji artêşgehê hate dayîn. Bi vî awayî êdî diyarî neanîn.

⁷ Çimkî tiştên ku anîbûn, ji bo hemû karê ku wê bê kirin bes û zêde bû.

Çêkirina Konê Hevdîtinê

⁸ Tevahiya mirovên jêhatî yên nav xebatkaran, mesken ji deh perdeyan çêkir. Wan ew bi kitanê tenik honandî û tayên sor, binevşî û şînê tarî çêkirin. Li ser wan jî xerûb bi hosteyî hatin xemilandin.

⁹ Dirêjahiya her perdeyê bîst û heşt gaz, berfirehiya wê çar gaz bû. Pîvana her perdeyê yek bû.

¹⁰ Bêsalêl pênc perde bi hev ve danîn û pênc perde yên din jî bi hev ve danîn.

¹¹ Wî li keviya perdeya herî paşî ya desteya pêşî, qulpikên şînê tarî vekirin. Wî li keviya desteya din jî wisa kir.

¹² Wî di perdeyekê de pêncî qulpik vekirin û di keviya perdeya desteya din de jî pêncî qulpikên din vekirin. Qulpik li pêşberî hev bûn.

¹³ Wî pêncî qopçeyên zêrîn çêkirin, perdeyan bi qopçeyan bi hev ve girê da. Bi vî awayî mesken bû yek perçe.

¹⁴ Wî ji mûyê bizinê perde çêkirin ku wekî xêliyekê mesken nixamt. Wî yanzdeh perde çêkirin.

¹⁵ Dirêjahiya her perdeyê sî gaz, berfirehiya her perdeyê jî çar gaz bû. Pîvana yanzdeh perdeyan yek bû.

¹⁶ Wî pênc perde cuda bi hev ve danîn, şeş perde jî cuda bi hev ve danîn.

¹⁷ Wî li keviya perdeya paşî ya desteyê pêncî qulpik, li keviya perdeya desteya din pêncî qulpik vekirin.

¹⁸ Wî pêncî qopçeyên tûncîn çêkirin ku kon bibe yek perçe.

¹⁹ Wî ji bo kon, ji çermê beran ê bi hibra sor xêliyekê û li ser wê jî, ji çermê beran ê şînê tarî xêliyeke din çêkirin.

²⁰ Wî ji bo meskên, ji dara aqasyayê çîtên çik çêkirin.

²¹ Dirêjahiya wan çîtan deh gaz, berfirehiya wan jî gaz û nîvek bû.

²² Du bizmikên her çîtê hebûn ku li hev diketin. Wî ji bo hemû çîtên meskên wiha kir.

²³ Wî ji bo meskên çît wisa çêkirin. Wî ji bo başûrê wî bîst çît çêkirin.

²⁴ Wî çil binikên zîv çêkirin ku di bin her çîtê de dibûn. Ji bo herdu çîtan, du bizmik hebûn.

²⁵ Wî li aliyê duyemîn ê meskên ê ku li bakur dinêre bîst çît,

²⁶ tevî çil binikên zîvîn ên wan çêkirin. Ji bo herdu çîtan, du binik hebûn.

²⁷ Wî ji bo aliyê paşîn ê meskên ê ku li rojava dinêre, şeş çît çêkirin.

²⁸ Wî li aliyê paşîn du çît çêkirin ku kujên meskên bin.

²⁹ Binê van çîtên ku dibûn kuj cuda diman û ser wan bi xeleka pêşî bi hev ve hat danîn. Wî herdu çîtên ku dibûn kuj, wisa çêkirin.

³⁰ Bi vî awayî, heşt çît tevî binikên zîvîn ên wan hebûn. Di bin her çîtê de du binik hebin ku şanzdeh binik hebûn.

³¹ Wî ji dara aqasyayê girş çêkirin. Wî ji bo çîtên aliyekî meskên pênc girş,

³² ji bo çîtên aliyê din ê meskên pênc girş û ji bo çîtên aliyê paşîn ê meskên ê ku li rojava dinêre, wî pênc girş çêkirin.

³³ Wî girşa navîn çêkir ku di nava çîtan de ye, ji aliyekî gihîşt aliyê din.

³⁴ Wî çît bi zêr kiras kirin û xelekên ku girş tê re derbas dibin, ji zêr çêkirin. Wî girş jî bi zêr kiras kirin.

³⁵ Wî perde bi tayên sor, binevşî û şînê tarî û kitanê tenik honandî çêkir ku ser wê xerûb bi hosteyî hatin xemilandin.

³⁶ Wî ji bo wê ji dara aqasyayê çar stûn çêkir û wan bi zêr kiras kirin. Çengelên wan ên zêrîn hebûn. Wî çar binikên wan ên zîvîn jî rijandin.

³⁷ Wî ji bo deriyê kon, ji tayên sor, binevşî û şînê tarî û kitanê tenik honandî perdeyeke binexş çêkir.

³⁸ Ji bo daleqandina perdeyê wî pênc stûnên bi çengel çêkirin, serî û bistên wan bi zêr kiras kirin, ji bo stûnan pênc binikên tûncîn çêkirin.