Derketin 33 - Kurmanji Încîl

Veqetîna ji Çiyayê Sînayê

¹ Xudan ji Mûsa re got: “Rabe ji vî cihî derkeve. Tu û gelê ku te ji welatê Misrê deraniye, herin welatê ku min ji Îbrahîm, Îshaq û Aqûb re sond xwar û got: ‘Ezê wê derê bidim ziriyeta te.’

² Ezê milyaketekî li pêş te bişînim û Kenanî, Amorî, Hîtîtî, Perîzzî, Hîwî û Yevûsiyan biqewitînim.

³ Herin welatê ku şîr û hingiv jê diherike. Lê ezê bi we re neyêm ku di rê de we tune nekim. Çimkî hûn miletekî serhişk in.”

⁴ Gava gel ev xeber stand, dest bi şînê kir û tu kesî xemla xwe girê neda.

⁵ Xudan ji Mûsa re got: “Ji gelê Îsraêl re bêje: ‘Hûn miletekî serhişk in. Heke ez demeke kurt di nav we de bimînim, ezê we tune bikim. Niha xemlên xwe yên girêdayî vekin ku ez bizanim ezê çi bi we bikim.’”

⁶ Ji roja derketina Çiyayê Horêvê û pêve, gelê Îsraêl xemlên xwe derxistin.

Mûsa û rûmeta Xwedê

⁷ Mûsa konek hildida, ew li derve, ji artêşgehê hinekî dûr vedida. Navê wir danî “Konê Hevdîtinê.” Kesê bixwesta bi Xudan bişêwiriya, diçû konê hevdîtinê yê li derveyî artêşgehê.

⁸ Her gava Mûsa diçû kon, hemû gel radibû û heta ku Mûsa diket hundirê kon, herkes li ber deriyê konê xwe disekinî û dêhna xwe didanê.

⁹ Gava Mûsa diket hundirê kon, stûna ewran dadiket, li ber deriyê kon disekinî û Xudan bi Mûsa re dipeyivî.

¹⁰ Hemû kesî stûna ewran a ku li ber deriyê kon disekinî didît, radibû û li ber konê xwe diperizî.

¹¹ Xudan bi Mûsa re, wekî zilamekî ku bi hevalê xwe re dipeyive, dipeyivî. Piştre Mûsa dizivirî artêşgehê. Lê Yêşûyê kurê Nûn ê zilamê xort ê xizmetkarê wî, ji kon dernediket.

¹² Mûsa ji Xudan re got: “Tu ji min re dibêjî ku gel derîne, lê te ji min re negot ku tê kê bi min re bişînî. Te ji bo min got: ‘Ez te bi navê te dinasim û dilê min bi te xweş e.’

¹³ Heke tu bi min xweş be, ji kerema xwe riyên xwe nîşanî min bide ku ez te çêtir nas bikim û dilê te bi min xweş be. Herwiha ji bîr neke, ev milet gelê te ye.”

¹⁴ Xudan got: “Wê hizûra min bi te re here û ezê rihetiyê bidim te.”

¹⁵ Mûsa got: “Heke hizûra te neyê, me ji vir dernexe.

¹⁶ Çimkî, heta tu bi me re neyî wê çawa bê zanîn ku tu ji min û ji gelê xwe razî mayî? Bi vî awayî ez û gelê te, emê ji hemû miletên li ser rûyê erdê cudatir bin.”

¹⁷ Xudan ji Mûsa re got: “Ev tiştê tu dibêjî ezê bikim, çimkî ez ji te razî me û ez te bi navê te nas dikim.”

¹⁸ Mûsa got: “Lava dikim rûmeta xwe nîşanî min bide.”

¹⁹ Xudan got: “Ezê hemû qenciya xwe di ber te re derbas bikim, ezê navê xwe, navê Xudan li pêş te eşkere bikim. Zilamê ku ez jê re dilovaniyê dikim ezê dilovan bim, yê ku ez li ber dikevim ezê li ber bikevim.

²⁰ Lê tu nikarî rûyê min bibînî, çimkî kesê rûyê min bibîne nikare bijî.

²¹ Va ye li ba min cihek heye, tê li ser zinêr rûnî.

²² Gava rûmeta min derbas be, ezê te bixim qelîştoka zinêr û heta ez derbas bim, ezê te bi destê xwe binixêmim.

²³ Gava ez destê xwe rakim, tê pişta min bibînî, lê tê rûyê min nebînî.”