Derketin 29 - Kurmanji Încîl

Tayînkirina kahintiyê

¹ “Ji bo ku Harûn û kurên wî ji min re kahintiyê bikin, divê pîroz bin. Li ser vê yekê, tê van tiştan ji wan re bikî. Conegayek û du beranên bêqisûr hilde.

² Tê ji arvanê genimê hûr nanê şikeva, kadeyê şikeva yê ku bi zeytê hatiye hevîrkirin û nanê sêlê yê şikeva ku zeyt li ser hatiye kirin çêkî.

³ Wan bixe hundirê selikekê û bi conega û herdu beranan re bîne.

⁴ Tê Harûn û kurên wî bînî ber deriyê Konê Hevdîtinê û wan bişoyî.

⁵ Tê kincan hilînî û mîntan, xiftanê êfodê, êfod û bersing li Harûn bikî. Tê şerîda êfodê ya ku bi hosteyî hatiye honandin girê bidî.

⁶ Tê şaşikê bidî serê wî û taca pîroz deynî ser şaşikê.

⁷ Paşê tê rûnê kifşkirinê hilînî, bi serê wî de birijînî û wî rûn bikî.

⁸ “Tê kurên Harûn jî bînî û mîntanan li wan bikî.

⁹ Tê şûtikên li pişta wan girê bidî û kuman bidî serê wan. Wê kahintî bi qanûneke herheyî bibe ya wan û bi vî awayî tê Harûn û kurên wî tayîn bikî.

¹⁰ “Tê conegê bînî ber Konê Hevdîtinê. Wê Harûn û kurên wî destê xwe deynin ser serê conegê.

¹¹ Tê conegayê li hizûra Xudan, li ber deriyê Konê Hevdîtinê serjê bikî.

¹² Tê xwîna conegê hildî û bi tiliya xwe li qiloçên gorîgehê bixî. Tê hemû xwîna mayî birijînî erdê gorîgehê.

¹³ Tê tevahiya bezê ûr û roviyan, perdeya kezebê, herdu gurçik û bezê ser wan li ser gorîgehê bişewitînî.

¹⁴ Tê goşt, eyar û rêxa conegê li derveyê artêşgehê bişewitînî. Ev pêşkêşiya paqijiyê ye.

¹⁵ “Tê beranekî bînî û wê Harûn û kurên xwe destê xwe deynin ser serê berên.

¹⁶ Tê berên serjê bikî û xwîna wî hildî û bi her aliyê gorîgehê ve bireşînî.

¹⁷ Tê berên perçe bikî, ûr û rovî û pepikên wî bişoyî û deynî ber serî û perçeyên din.

¹⁸ Piştre tê tevahiya berên li ser gorîgehê bişewitînî. Ev qurbana şewitandinê ya ji bo Xudan e. Ev bêhna xweş û pêşkêşiya şewitandinê ya ji bo Xudan e.

¹⁹ “Tê beranê din hildî. Wê Harûn û kurên wî destê xwe deynin ser serê berên.

²⁰ Tê berên serjê bikî û hinekî xwîna wî li nermikên guhên rastê yên Harûn û kurên wî û li tiliyên mezin ên dest û lingên rastê yên wan bidî. Tê hemû xwîna mayî bi her aliyên gorîgehê ve bireşînî.

²¹ Tê ji xwîna ser gorîgehê û rûnê kifşkirinê hilînî, bi ser Harûn, kincên wî, kurên wî û bi ser kincên wan ve bireşîne. Bi vî awayî wê Harûn, kurên wî û kincên wan pîroz bibin.

²² “Tê bezê berên, dûvê bibez yê wî, bezê ûr û roviyên wî, perdeya kezebê, herdu gurçik, bezê ser gurçikan û hêta rastê hilînî. Çimkî ev beranê tayînkirinê ye.

²³ Tê ji selika nanê şikeva yê ku li hizûra Xudan e nanekî, kadeyê bi rûn û nanê sêlê hildî,

²⁴ hemûyan bidî kulmên Harûn û kurên wî. Tê wan li hizûra Xudan wekî pêşkêşiya raberkirinê bihejînî.

²⁵ Tê wan ji kulmên wan bistînî û li ser gorîgehê, ser qurbana şewitandina bêhna xweşa ku ya li hizûra Xudan e, bişewitînî. Ev pêşkêşiya şewitandinê ya ji bo Xudan e.

²⁶ “Tê singê beranê ku ji bo tayînkirina Harûn hatiye veqetandin hilînî. Tê li hizûra Xudan wekî pêşkêşiya raberkirinê bihejînî. Wê ew sing bibe para te.

²⁷ Tê singê pêşkêşiya raberkirinê û hêta wî ya pêşkêşkirinê yên beranê tayînkirina Harûn û kurên wî hat serjêkirin, pîroz bikî.

²⁸ Wê ev tişt ji bo Harûn û kurên wî wekî qanûneke herheyî bên parvekirin. Wê ji qurbanên aştiyê bin. Ev pêşkêşiya gelê Îsraêl ya ji Xudan re ne.

²⁹ “Wê kincên Harûn ên pîroz, piştî wî ji kurên wî re bimînin. Gava têne rûnkirin û tayînkirin wê van cilan li xwe bikin.

³⁰ Kurê Harûnê ku wê di şûna wî de bibe kahin, gava dikeve Konê Hevdîtinê ku li Cihê Pîroz xizmetê bike wê heft rojan van kincan li xwe bike.

³¹ “Tê beranê tayînkirinê hilînî û goştê wî li dereke pîroz bikelînî.

³² Wê Harûn û kurên xwe goştê berên û nanê ku di selikê de ye, li ber deriyê Konê Hevdîtinê bixwin.

³³ Wê vê xwarina paqijî û kefaretê bixwin ku ji bo tayîn û pîrozkirina wan e. Wê kesên din nexwin, çimkî pîroz e.

³⁴ Heke ji goştê ji bo tayînkirinê û ji nên bimîne sibê, tê yê mayî bişewitînî. Wê neyê xwarin, çimkî pîroz e.

³⁵ “Tê her tiştê min ji bo Harûn û kurên wî li te emir kir bikî. Wê tayîna wan heft rojan bajo.

³⁶ Ji bo paqijî û kefaretê, tê her roj wekî pêşkêşiya paqijiyê conegayekî pêşkêş bikî. Ji bo paqijkirina gorîgehê tê pêşkêşiya paqijiyê bidî û ji bo pîrozkirina wê jî tê rûn bikî.

³⁷ Tê heft rojan paqijî û kefareta gorîgehê bikî. Tê gorîgehê pîroz bikî û wê bi zêdebarî pîroz bibe. Her tiştê bi gorîgehê bibe, divê pîroz bibe.

Pêşkêşiyên Rojane

³⁸ “Tiştên tê li ser gorîgehê pêşkêş bikî ev in. Tê her roj du berxên nêr ên yeksalî pêşkêş bikî.

³⁹ Tê berxekî serê sibê, yê din jî ber êvarê pêşkêş bikî.

⁴⁰ Tê bi berxê yekemîn re, ji dehyeka efaya arvanê hûr ê bi çarîkeke hîna rûnê xas ê zeyta perçiqandî hevîrkirî û wekî pêşkêşiya rijandinê, ji çaran yek hîn şerab pêşkêş bikî.

⁴¹ Tê berxê din ê ku ber êvarê pêşkêş bikî, tê wekî yê serê sibê, pêşkêşiya dexlê û pêşkêşiya rijandinê pêşkêş bikî ku bêhna xweş bide. Wê pêşkêşiya şewitandinê ya ji bo Xudan e.

⁴² “Wê ev, di nav nifşên we de qurbana şewitandina hergavî be. Wê li ber deriyê Konê Hevdîtinê, li hizûra min ku em li wir hev bibînin û bi te re bipeyivim, bê pêşkêşkirin.

⁴³ Ezê li wir bi gelê Îsraêl re hevdîtinê bikim. Wê bi rûmeta min pîroz bibe.

⁴⁴ “Ezê Konê Hevdîtinê û gorîgehê pîroz bikim. Ezê Harûn û kurên wî jî pîroz bikim ku ji min re kahintiyê bikin.

⁴⁵ Ezê di nav gelê Îsraêl de bi cih dibim û bibim Xwedayê wan.

⁴⁶ Wê bizanin ku ez Xudan Xwedayê wan im û min ew ji welatê Misrê deranîn ku ez di nav wan de bi cih bim. Xudan Xwedayê wan ez im.”