Derketin 28 - Kurmanji Încîl

Kincên kahintiyê

¹ “Ji bo ku ji min re kahintiyê bikin, tu ji nav gelê Îsraêl kekê xwe Harûn û kurên wî Nadav, Avîhû, Êlezar û Îtamar bîne ba xwe.

² Ji bo berzî û rûmetê, tê ji Harûnê kekê xwe re kincên pîroz çêkî.

³ Tê ji wan hemû kesên ku min jêhatîbûn daye wan re bêjî ku ji Harûn re kincan çêkin ku wî bi kahintiya min pîroz bikin.

⁴ Kincên ku wê çêkin ev in: Bersing, êfod, xiftan, mîntanê binexş, şaşik û şûtik. Ji bo ku ji min re kahintiyê bikin wê ji kekê te Harûn û kurên wî re van kincên pîroz çêkin.

⁵ Wê ji bo vî karî, şeridên zêrkirî, tayên sor, binevşî û şînê tarî û kitanê tenik bi kar bînin.

Êfod

⁶ “Wê êfodê bi şeridên zêrkirî, tayên sor, binevşî û şînê tarî û kitanê tenik honandî bi hosteyî çêkin.

⁷ Wê di du kujên wî de cihê du sermilan hebe ku bi hev ve bê danîn.

⁸ Wê şerîda bi hosteyî ya li ser êfodê, ji heman hosteyî û tiştan bê çêkirin. Wê wekî perçeyekî êfodê, bi şeridên zêrkirî, tayên sor, binevşî û şînê tarî û kitanê tenik honandî bê çêkirin.

⁹ Tê du kevirên onîks hilînî û li ser wan navên kurên Îsraêl,

¹⁰ li gorî bûyîna wan, navên şeş heban li ser yekî, navên şeşên din jî li ser yê din binivîsî.

¹¹ Tê wan herdu keviran, bi karê kevirkol, wekî mora kolayî navên kurên Îsraêl bikolî û wan deynî nav malikên zêrîn.

¹² Tê herdu keviran, ji bo kurên Îsraêl wekî kevirên bîranînê deynî ser sermilên êfodê. Wê Harûn navên wan, li hizûra Xudan li ser herdu sermilên xwe hilgire.

¹³ Tê malikên zêr çêkî.

¹⁴ Tê ji zêrê xas zincîrên badayî çêkî û deynî ser malikan.

Bersing

¹⁵ “Tê bi karê hosteyî bersingekî biryarê çêkî. Tê wê jî wekî êfodê bi şeridên zêrkirî, tayên sor, binevşî û şînê tarî û kitanê tenik honandî çêkî.

¹⁶ Wê çargoşe û du qat be. Wê dirêjahiya wê bostek, berfirehiya wê jî bostek be.

¹⁷ Tê li ser wê çar rêzên kevirîn deynî. Wê di rêza pêşî de aqût, topaz, zimrûd,

¹⁸ di rêza diduyan de eqîqê binevşî, lapîs û eqîqê spî,

¹⁹ di rêza sisêyan de eqîqê ezmanî, egad û ametîst

²⁰ û di rêza çaran de fîrûze, onîks û yêşîm hebin. Wê kevir di malikên zêrîn de bên bicihkirin.

²¹ Wê duwanzdeh kevir hebin ku li ser wan navên kurên Îsraêl hene. Wê li ser her kevirî, wekî mor yek bi yek navê duwanzdeh eşîran hebe.

²² “Tê ji bo bersing ji zêrê xas zincîrên badayî çêkî.

²³ Tê ji bo wî du xelekên zêrîn çêkî û herdu xelekan deynî ser du kujên bersing.

²⁴ Tê du zincîrên zêr bi xelekên kujên bersing ve bixî.

²⁵ Tê herdu serên zincîrên din di ser du malikan re derbas bikî û li pêşiya êfodê bi ser sermilan ve girê bidî.

²⁶ Tê du xelekên zêrîn ên din çêkî û li biniya herdu kujên bersing, li pêşiya êfodê, bi kujê hundir ve bixî.

²⁷ Tê du xelekên zêrîn ên din çêkî. Wan li aliyê pêşî yê êfodê, di binê herdu sermilan de, nêzîkî dera ku êfod digihîjê deynî ser şerîda ku bi hosteyî hatiye honandin.

²⁸ Tê xelekên bersing û êfodê bi şehbenê şînê tarî bi hev ve girê bidî. Wê bersing, li ser şerîda êfodê ya ku bi hosteyî hatiye honandin bimîne û ji êfodê neqete.

²⁹ “Gava Harûn dikeve Cihê Pîroz, wê navên kurên Îsraêl li ser dilê xwe hilgire ku li ser bersingê biryarê nivîsandiye. Bi vî awayî ez Xudan, ezê gelê xwe hergav bi bîr bînim.

³⁰ Tê Ûrîm û Tûmmîmî bixî hundirê bersingê biryarê û gava Harûn were hizûra Xudan, wê li ser dilê wî bin. Wê Harûn li hizûra Xudan biryara kurên Îsraêl li ser singê xwe hilgire.

Cilên din ên kahinan

³¹ “Tê xiftanê di bin êfodê de bi tevahî ji tayê şînê tarî çêkî.

³² Wê ji bo serî tê re derbas be, dora wê vekirî bê hiştin. Ji bo ku neqete, tê dora wê mîna berstûk veçinî û bidirûyî.

³³ Tê li dawa xiftên ji tayên sor, binevşî û şînê tarî, motîvên hinarokan çêkî û zengilokên zêrîn li navbera wan li dora wî bi cih bikî.

³⁴ Wê dora dawa xiftên, bi awayê hinarokek û zengilokê zêr, hinarokek û zengilokê zêr bê çeperkirin.

³⁵ Gava Harûn xizmetê dike wê vî xiftanî li xwe bike. Gava dikeve Cihê Herî Pîroz, hizûra Xudan û dertê, ji bo ku ew nemire wê dengê zengilokan bê bihîstin.

³⁶ “Tê ji zêrê xas berenîkekê çêkî û çawa ku morekî li ser wê dikolî, li serê ‘Ji Xudan re veqetandî ye’ binivîsî.

³⁷ Tê wê bi şehbenekî şînê tarî girê bidî. Wê li pêşiya şaşikê be.

³⁸ Wê li ser eniya Harûn be. Gava gelê Îsraêl pêşkêşiyên xwe yên pîroz tîne, heke sûc kiribe, wê Harûn vî sûcî hilde ser xwe. Ji bo ew li hizûra Xudan bê qebûlkirin, wê ev berenîk hergav li ser eniya Harûn be.

³⁹ “Tê ji kitanê tenik mîntan bihonî û ji kitanê tenik şaşikê çêkî. Şûtikeke binexş jî çêkî.

⁴⁰ “Tê ji bo kurên Harûn mîntan, şûtik û kumên berzî û rûmetê çêkî.

⁴¹ Tê van kincan li Harûnê kekê xwe û li kurên wî bikî, rûn û tayîn bikî. Ji bo ku ji min re kahintiyê bikin tê wan pîroz bikî.

⁴² “Ji bo ku ew derên xwe yên edebê binixêmin, tê ji wan re derpiyên kitanî çêkî. Wê ji piştê heta ser çokê bin.

⁴³ Gava Harûn û kurên xwe dikevin Konê Hevdîtinê yan jî, ji bo li Cihê Pîroz xizmetê bikin nêzîkî gorîgehê dibin, ji bo ku sûc nekin û nemirin, wê van derpiyan li xwe bikin. Wê ev ji bo Harûn û ziriyeta wî qanûneke herheyî be.”