Derketin 25 - Kurmanji Încîl

Pêşkêşiyên ji bo Konê Hevdîtinê

¹ Xudan ji Mûsa re got:

² “Ji gelê Îsraêl re bêje, bila ji min re pêşkêşiyan bînin. Pêşkêşiya her kesê ku ji dil dide jê bistînin.

³ Pêşkêşiyên ku hûnê ji wan bistînin ev in: Zêr, zîv, tûnc,

⁴ tayên sor, binevşî û şînê tarî, kitanê tenik û mûyê bizinê,

⁵ çermê beran ê bi hibra sor û şînê tarî, dara aqasyayê,

⁶ zeyta qendîlan, biharatên rûnê kifşkirinê û bixûra bêhnxweş,

⁷ kevirên onîks û kevirên din ên hêja ku li ser êfod û bersing bên rêzkirin.

⁸ “Wê ji bo min pîrozgehek çêkin ku ez di nav wan de bi cih bim.

⁹ Hûnê li gorî wê mînaka ku ezê nîşanî te bidim, mesken û taximên wî çêkin.

Sindoqa Peymanê

¹⁰ “Wê ji dara aqasyayê sindoqekê çêke. Wê dirêjahiya wê du gaz û nîv, berfirehiya wê gaz û nîv û bilindahiya wê jî gaz û nîvek be.

¹¹ Tê hundir û derveyî wê bi zêrê xas kiras bikî. Tê toqeke zêrîn bavêjî dora wê.

¹² Tê ji bo wê çar xelekên zêrîn birijînî û wan li her çar lingên wê bixî, du xelek li kêlekekê, du xelekên din jî li kêleka din.

¹³ Tê ji dara aqasyayê destiyan çêkî û wan bi zêr kiras bikî.

¹⁴ Ji bo hilgirtina sindoqê, tê destiyan di xelekên kêlekên sindoqê re derbas bikî.

¹⁵ Wê destî di xelekên sindoqê de bimînin, jê neyên derxistin.

¹⁶ Şahidiya ku ezê bidim te tê bixî nava sindoqê.

¹⁷ “Tê ji zêrê xas derxûnekî çêkî. Wê dirêjahiya wê du gaz û nîv, berfirehiya wê gaz û nîvek be.

¹⁸ Tê du xerûbên zêrê karê kutayî çêkî û wê li ser herdu kêlekên derxûn de bin.

¹⁹ Xerûbekî li ser kêlekê, yê din jî li ser kêleka din çêke. Tê wan ji herdu xerûban ve, bi derxûn ve bikî yek perçe.

²⁰ Wê xerûb baskên xwe li aliyê jorîn vekin û bi wan derxûn binixêmin. Wê rûyê wan li hev be û li derxûn binêrin.

²¹ Tê derxûn deynî ser sindoqê û Şahidiya ku ezê bidim te tê bixî nava sindoqê.

²² Ezê li wir te bibînim. Ezê ji ser derxûn, ji nav herdu xerûbên ser Sindoqa Şahidiyê de hemû emrên xwe yên ji bo gelê Îsraêl ji te re bêjim.

Maseya Nanê Hizûrê

²³ “Tê ji dara aqasyayê maseyekê çêkî. Wê dirêjahiya wê du gaz, berfirehiya wê gazek û bilindahiya wê gaz û nîvek be.

²⁴ Tê wê bi zêrê xas kiras bikî û toqeke zêrîn bavêjî dora wê.

²⁵ Tê li dora toqê, bi qasî çar tiliyan keviyekê çêkî û toqeke zêrîn bavêjî dora wê.

²⁶ Tê ji bo maseyê çar xelekên zêrîn çêkî û li ser çar lingan deynî ser çar kujan.

²⁷ Wê xelekên destiyên ji bo hilgirtina maseyê, nêzîkî kuj bin.

²⁸ Tê destiyan ji dara aqasyayê çêkî û wan bi zêr kiras bikî. Wê mase bi wan bê hildan.

²⁹ Tê ji bo maseyê, tas û firaxên bixûrê, tevî tas û şerbikên pêşkêşiya rijandinê çêkî. Tê ji zêrê xas çêkî.

³⁰ Tê Nanê Hizûrê hergav deynî ser maseyê, ber min.

Şamdank

³¹ “Tê ji zêrê xas şamdankekê çêkî. Wê ling û stûna wê ji karê kutayî be. Wê tasik, tevî kulîlk û qalikên wan, ji wê bin.

³² Wê ji kêlekên şamdankê şeş mil rabin, sê mil ji kêlekekê û sê milên din jî, ji kêleka din bin.

³³ Wê li ser her milî, di şiklê kulîlka behîvê de sê tasik, tevî kulîlk û qalikê wê hebe. Wê her şeş milên şamdankê wiha bin.

³⁴ Wê li ser şamdankê di şiklê kulîlka behîvê de çar tasik, tevî kulîlk û qalikê wan, hebin.

³⁵ Ji bo her şeş milên ku ji şamdankê bilind dibin, di bin herdu milên pêşî, herdu milên diduyan û herdu milên sisêyan de qalik ji ber xwe hebe.

³⁶ Wê qalik û milên wan bibin yek perçe. Tevahî ji zêrê xas yê karê kutayî be.

³⁷ “Tê ji bo wê heft qendîlan çêkî, bi awayê ku ber xwe ronahî bikin, li ser şamdankê bi cih bikî.

³⁸ Wê maşikên fitîlan û bixûrdankên wê ji zêrê xas bin.

³⁹ Wê şamdank û taximên wê ji telantekê zêrê xas bê çêkirin.

⁴⁰ Binêre û her tiştî li gorî mînaka li çiyê ji te re hat nîşandan çêke.”