Derketin 21 - Kurmanji Încîl

Rê û rêbazên li ser koleyan

¹ “Rêbazên ku tê bidî ber wan ev in:

² “Gava tu koleyekî Îbranî bikirî, wê şeş salan xulamiyê bike lê sala heftan wê bêyî ku tiştekî bide azad bibe.

³ Heke ew tenê hatibe, wê tenê here. Heke zewicî hatibe, wê bi jina xwe re here.

⁴ Heke xweyê wî ew zewicandibe û wê jinê jê re kur an keç anîbin, wê jin û zarok ji xweyî re bimînin. Wê kole tenê here.

⁵ Lê heke kole bi eşkereyî bibêje: ‘Ez ji xweyê xwe, jina xwe û zarokên xwe hez dikim. Ez naxwazim azad bibim,’

⁶ wê xweyê wî, wî derxe hizûra Xwedê. Wê wî nêzîkî derî yan kêleka derî bike û guhê wî bi dirêşikê qul bike. Bi vî awayî, wê tevahiya jiyana xwe xulamiya wî bike.

⁷ “Lê gava kesek keça xwe wekî kole û carî bifiroşe, wê bi koleyên mêr re neyê berdan.

⁸ Heke ew ne bi dilê xweyê xwe yê dergistiyê wê be, wê bihêle ku dîsa bê kirîn. Ew nikare wê bifiroşe xerîban. Çimkî wî bêbextî lê kiriye.

⁹ Heke xweyî wê bide kurê xwe, wê wekî keça xwe bibîne.

¹⁰ Heke xweyî bi jineke din re bizewice, wê jina xwe ya berê ji xwarin, cil û berg û ji razana pê re kêm neke.

¹¹ Heke ew van her sê tiştan neke, wê jin bêyî ku tiştekî bide azad be. Wê qet pere nede.

Rê û rêbazên li ser zordariyê

¹² “Kesê li kesekî din bixe û bikuje, divê ew jî bê kuştin.

¹³ Lê heke bi qestî nehatibe kirin û ev kuştin ji Xwedê be, ezê cihekî ku ew dikare bireve, ji te re kifş bikim.

¹⁴ Heke kesek bi dekbazî êrîşî cîranekî bike û wî bi pîlan bikuje, xwe bavêje gorîgeha min jî, tê wî derxî û bikujî.

¹⁵ “Kesê li dê û bavê xwe bixe, divê bê kuştin.

¹⁶ “Kesê kesekî din bi darê zorê birevîne, firotibe jî, di destan de be jî, divê bê kuştin.

¹⁷ “Kesê nifiran li dê û bavê xwe bike, divê bê kuştin.

¹⁸ “Gava hinek kes devjenî bikin û paşê kesek bi kevir an bi kulman li cîranê xwe bixe û cîranê wî nemire û bikeve nav nivînan,

¹⁹ lê piştre rabe û bikaribe li derve bi gopal bigere, wî çaxî kesê lê xistiye wê bêsûc be. Lê wê heqê dema winda kiriye û heta baş bibe hemû heqê dermankirinê bide.

²⁰ “Gava kesek bi daran li koleyê xwe yan jî li koleya xwe bixe û kole di destên wî de bimire, divê bê cezakirin.

²¹ Lê heke kole rojek du rojan bijî, wê xweyî neyê cezakirin. Çimkî malê wî ye.

²² “Gava kesên li hev bixin, li jineke bizaro bikevin û zarokê wê zû bibe lê zirara din pê nebe, divê kesê lê ketiye bê cezakirin. Pereyê ku mêrê jinikê xwestiye û dadger erê kiriye, wê bide.

²³ Heke zirar hebe, wê di ber can de can,

²⁴ di ber çav de çav, di ber diran de diran, di ber dest de dest, di ber pê de pê,

²⁵ di ber şewitandinê de şewitandin, di ber birînê de birîn, di ber derb de derb bide.

²⁶ “Gava kesek li çavê koleyê xwe yan jî li koleya xwe bixe û kor bike, wê di ber çavê wî de wî azad bike.

²⁷ Heke ew diranê koleyê xwe yan jî koleya xwe bişikêne, wê di ber dirên de azad bike.

Rê û rêbazên li ser berpirsiyariya mal û milkan

²⁸ “Gava gayek bi qiloçên xwe li mêr an jinekê bixe û bikuje, divê ew ga bê kevirkirin. Wê goştê wî neyê xwarin lê xweyê ga bêsûc be.

²⁹ Heke gayek ji berê ve boçker be û xweyê wî hatibe hişyarkirin lê xweyî bergiriya vê yekê nekiribe û ga mêr an jinekê bikuje, wê gê bidin ber keviran. Wê xweyê wî jî bê kuştin.

³⁰ Lê heke ji xweyê ga berdêlek bê xwestin, divê hemû berdêla jê tê xwestin bide û canê xwe rizgar bike.

³¹ Heke ga bi qiloçên xwe li kurikekî yan li keçikekê bixe û bikuje, wê li gorî heman rêbazê bê kirin.

³² Heke ga bi qiloçên xwe li koleyekî yan jî li koleyekê bixe û bikuje, wê xweyê gê sî şekel zîv bide xweyê wî û ga jî bê kevirkirin.

³³ “Gava kesek çalekê veke yan ser çala ku kolaye negire û ga yan kerek bikeve wê çalê,

³⁴ wê xweyê çalê pere bide xweyê heywên û aştiyê bike. Wê heywanê mirî bibe yê wî.

³⁵ “Gava gayê yekî li gayê cîranê xwe bixe û bikuje, wê gayê sax bifiroşin û heqê wî li hev parve bikin. Heywanê mirî jî li hev parve bikin.

³⁶ Lê heke ji berê ve bê zanîn ku ga êrîşkar e û xweyê wî ew zevt nekiriye, divê di şûna wî gayî de gayekî din bide û aştiyê bike. Wê gayê mirî ji xweyê xwe re bimîne.”