Derketin 20 - Kurmanji Încîl

Deh Emir

¹ Xwedê tevahiya van tiştan got:

² “Ez Xwedayê te Xudan im ku tu ji welatê Misrê, ji warê koletiyê deranî.

³ “Wê ji min pêve tu îlahên te tunebin.

⁴ “Tê ji xwe re pûtê tu tiştan çênekî ku dişibe tiştekî li ezmanan, li ser erdê yan jî di avên di bin erdê de ye.

⁵ Tê li ber wan neçî ser çokan û xulamiya wan nekî. Çimkî ez, Xwedayê te Xudan, Xwedayekî xîretkêş im. Ez hesabê sûcên kesên ji min nefret dikin, ji zarokên wan, ji neviyên wan, ji nifşê sisêyan û çaran jî dipirsim.

⁶ Lê kesên ji min hez dikin û emrên min pêk tînin, ez bi hezar nifşan ji bo wan dilsoz im.

⁷ “Tê navê Xwedayê xwe Xudan vala neyînî ser zimanê xwe. Çimkî Xudan kesên navê wî vala tînin ser zimanê xwe bêceza nahêle.

⁸ “Tê Roja Septê bi bîr bînî û pîroz bihesibînî.

⁹ Tê şeş rojan bixebitî û hemû karên xwe bikî,

¹⁰ lê roja heftan ji bo Xwedayê te Xudan Sept e. Wê rojê tu, kurê te, keça te, xulamê te, xadima te, heywanên te û xerîbên di nav te de, hûnê tu karî nekin.

¹¹ Çimkî Xudan erd û ezman, derya û hemû tiştên di wan de, di şeş rojan de çêkirin û di roja heftan de bêhna xwe veda. Loma Xudan Roja Septê pîroz û bereket kir û wekî rojeke pîroz nîşan kir.

¹² “Qedrê dê û bavê xwe bigire ku emrê te li welatê ku Xwedayê te Xudan dide te, dirêj be.

¹³ “Tê kuştinê nekî.

¹⁴ “Tê zinayê nekî.

¹⁵ “Tê nedizî.

¹⁶ “Tê li dijî cîranê xwe şahidiya derewîn nekî.

¹⁷ “Tê çav bernedî mal û milkê cîranê xwe. Tê çav bernedî jin, xulam, xadim, ga, ker an jî tu tiştekî cîranê xwe.”

Îsraêlî ditirsin

¹⁸ Gava tevahiya gel şahidiya dûyê serê çiyê, dengê boriyan, gurmîn û şirqîna brûskan kir, tirsiya û dûr sekinî.

¹⁹ Wan ji Mûsa re got: “Tu bi me re bipeyive, emê guhdariya te bikin. Bila Xwedê bi me re nepeyive, yan na emê bimirin.”

²⁰ Mûsa ji wan re got: “Netirsin, çimkî Xwedê ji bo we biceribîne hat ku tirsa wî di dilê we de hebe û hûn gunehan nekin.”

²¹ Wî çaxî gel dûr sekinî lê Mûsa xwe nêzîkî wê dera tarî kir ku Xwedê lê bû.

Rê û rêbazên li ser gorîgehan

²² Xudan ji Mûsa re got: “Tê ji gelê Îsraêl re wiha bibêjî: ‘We dît ku ez ji ezmanan bi we re peyivîm.

²³ Hûnê li hember min, ji bo xwe ji zêr û zîv îlahan çênekin.

²⁴ “‘Tê ji bo min ji axê gorîgehê çêkî. Tê qurbanên xwe yên aştiyê û şewitandinê, pez û dewarên xwe li wê derê serjê bikî. Li her dera ku ez navê xwe bi bîr tînim, ezê bêm ba te û te pîroz bikim.

²⁵ Lê heke tu ji bo min gorîgeheke kevirîn çêkî, wê ne ji kevirên necirandî be. Çimkî amûrê tê bixebitînî, wê gorîgehê mirdar bike.

²⁶ Tê bi derenceyan hilnekişî gorîgeha min ku tazîbûna te xuya nebe.’”