Derketin 18 - Kurmanji Încîl

Yîtro serdana Mûsa dike

¹ Xezûrê Mûsa, Yîtroyê Kahinê Mîdyanî her tiştê ku Xwedê ji bo gelê xwe û Mûsa kiriye û çawa Xudan Îsraêlî ji Misrê deranîne bihîst.

² Mûsa Sîpporaya jina xwe şandibû. Li ser vê yekê Yîtroyê xezûrê Mûsa Sîpporayê

³ û herdu kurên wî, careke din ji Mûsa re anîn. Navê kurekî xwe Gêrşom danîbû û gotibû: “Ez li welatekî biyanî bûm yekî xerîb.”

⁴ Navê kurê xwe yê din Êliyezer danîbû û gotibû: “Xwedayê bavê min ji min re bû alîkar û ez ji şûrê Firewn rizgar kirim.”

⁵ Xezûrê Mûsa Yîtro, bi kurên wî û jina wî re hatin Çiyayê Xwedê, wê beriya ku Mûsa lê kon vedabû.

⁶ Wî xeber ji Mûsa re şand û got: “Ez, xezûrê te Yîtro, bi jina te û herdu kurên te re, têm ba te.”

⁷ Mûsa hat pêşiya xezûrê xwe, li pêş wî deverû çû erdê û ramûsa. Wan li rewşa hev pirsîn û derbasî hundirê kon bûn.

⁸ Mûsa her tiştê ku Xudan ji bo xatirê Îsraêliyan bi Firewn û Misriyan kiriye, tengasiyên ku di rê de kişandibûn û Xudan ew çawa rizgar kirine, yek bi yek ji xezûrê xwe re gotin.

⁹ Yîtro, bi hemû qenciya ku Xudan bi gelê Îsraêl re kiriye û ew ji destê Misriyan rizgar kirine, dilşa bû.

¹⁰ Yîtro got: “Xudanê ku hûn ji destê Misriyan û Firewn rizgar kir pîroz be! Wî gel ji bindestiya Misriyan rizgar kir!

¹¹ Niha ez dizanim ku Xudan ji hemû îlahan mezintir e, bi taybetî bi quretiya ku wan li gelê Îsraêl dikir.”

¹² Piştre Yîtroyê xezûrê Mûsa qurbanên şewitandinê û qurbanên din ji Xwedê re anîn. Harûn û hemû rîspiyên gelê Îsraêl, ji bo ku bi xezûrê Mûsa re li hizûra Xudan xwarinê bixwin hatin.

Şîreta Yîtroyê xezûrê Mûsayê Pêxember

¹³ Dotira rojê Mûsa ji bo ku li dozên gel binêre bi wan re rûnişt. Gel ji serê sibê heta êvarê li dora Mûsa sekinî.

¹⁴ Gava xezûrê Mûsa her tiştê ku wî ji bo gel kir dît, wî got: “Ev çi ye ku tu ji bo gel dikî? Çima tu bi tenê wekî dadger rûdinî û gel ji serê sibê heta êvarê li dora te dimîne?”

¹⁵ Mûsa ji xezûrê xwe re got: “Gel tê ba min ku ez şîreta Xwedê bixwazim.

¹⁶ Gava meseleyeke wan hebe, ew tên ba min. Ez li ser pirsên wan biryar didim. Ez qanûn û şerîeta Xwedê ji wan re dibêjim.”

¹⁷ Xezûrê Mûsa jê re got: “Ya ku dikî ne baş e!

¹⁸ Tu hem xwe û hem jî vî gelî diwestînî. Tu bi serê xwe ji heqê vî karî dernakevî, çimkî ev kar ji bo te gelek giran e.

¹⁹ Tu guhê xwe bide dengê min, ez şîretekê li te bikim û bila Xwedê bi te re be! Divê tu ji dêla gel ve, li ber Xwedê bisekinî. Meseleyên wan bibî ber Xudan.

²⁰ Tu qanûn û şerîetê hînî wan bike, riya ku wê lê herin û ya ku wê bikin nîşanî wan bide.

²¹ Tu ji nav tevahiya gel, mirovên bikêrhatî, Xwedêtirs, rast û yên ji qezenca neheq nefret dikin hilbijêre û wan li ser komên hezaran, sedan, pênciyan û dehan bike serek.

²² Bila ew hergav ji bo gel dadgeriyê bikin. Bila ew dozên mezin bînin pêşberî te û yên biçûk ew bi xwe çareser bikin. Bi vî awayî wê karê te bikin û barê te sivik bibe.

²³ Heke tu wiha bikî û Xwedê jî wiha li te emir dike, wê gavê tu dikarî li ber xwe bidî û ev gel jî wê bi xêr û silamet here mala xwe.”

²⁴ Mûsa guhê xwe da dengê xezûrê xwe û her tiştê ku wî got kir.

²⁵ Wî ji tevahiya gelê Îsraêl mirovên bikêrhatî hilbijartin û ew li ser gel kirin serhezar, sersed, serdeh û serpêncî.

²⁶ Wan hergav di nav gel de dadgerî kir, dozên giran anîn pêşberî Mûsa û pirsên biçûk bi xwe çareser kirin.

²⁷ Piştre Mûsa xezûrê xwe bi rê kir û Yîtro zivirî welatê xwe.