Derketin 17 - Kurmanji Încîl

Ava ku ji zinêr dertê

¹ Tevahiya civaka Îsraêl, li ser fermana devê Xudan ji Beriya Sînê koç kirin. Ji hêlekê derbasî hêleke din bûn û li Refîdîmê kon vedan. Lê li vir ji bo civakê av tunebû.

² Gel bi Mûsa re devjenî kir û got: “Avê bide me em vexwin.” Mûsa got: “Hûn çima bi min re devjeniyê dikin? Hûn çima Xudan diceribînin?”

³ Lê gel tî bûbû. Wan ji Mûsa gazin kir û got: “Te çima em ji Misrê deranîn, ji bo ku tu me, zarokên me û keriyên me bi tîbûnê bikujî?”

⁴ Mûsa ji Xudan lava kir û got: “Ez bi vî gelî çi bikim, hindik maye ku min bidin ber keviran.”

⁵ Xudan ji Mûsa re got: “Here pêşiya gel, bila çend rîspiyên gelê Îsraêl li ba te bin. Ew gopalê ku te li Çemê Nîlê xistibû jî bila di destê te de be.

⁶ Ezê li wir, li Çiyayê Horêvê, li ser zinêr li ber te bisekinim. Tê li zinêr bixî û ji bo ku gel jê vexwe, wê av jê biherike.” Mûsa li pêş rîspiyên Îsraêliyan, ya ku jê re hat gotin kir.

⁷ Wî navê vê derê Massa û Merîva danî. Çimkî gelê Îsraêl li vir bi Mûsa re devjenî kir: “Gelo Xudan bi me re ye yan na?” Bi vî awayî wan Xudan ceribandin.

Emalêqî têk diçin

⁸ Emalêqî hatin û li Refîdîmê li dijî gelê Îsraêl şer kirin.

⁹ Mûsa ji Yêşû re got: “Zilaman hilbijêre û here! Li dijî Emalêqiyan şer bike. Sibê, ezê gopalê Xwedê di destê min de li serê gir bisekinim.”

¹⁰ Yêşû bi awayê ku Mûsa lê emir kir, li dijî Emalêqiyan şer kir. Paşê Mûsa, Harûn û Hûr derketin serê gir.

¹¹ Çaxê Mûsa destê xwe bilind dikir Îsraêlî, lê gava wî destê xwe datanî Emalêqî bi ser diketin.

¹² Herdu destên Mûsa jî westiyan. Wan kevirek anîn û danîn bin wî û ew li ser kevir rûnişt. Ji aliyekî ve Harûn, ji aliyê din ve jî Hûr destên Mûsa li jor girtin. Heta ku roj çû ava destên Mûsa li jor man.

¹³ Yêşû gelê Emalêqî bi devê şûr têk birin.

¹⁴ Xudan ji Mûsa re got: “Tu vê wekî bîranînekê di nivîseke de binivîse û di guhê Yêşû de jî bibêje ku ezê navê Emalêqiyan bi tevahî ji ser rûyê erdê rakim.”

¹⁵ Mûsa gorîgehek çêkir û navê wê “Yahwe-Nissî” danî.

¹⁶ Wî got: “Xudan sond xwar, wê şerê wî, nifş bi nifş li dijî Emalêqiyan berdewam bike.”