Derketin 10 - Kurmanji Încîl

Belaya heştemîn: Kulî

¹ Xudan ji Mûsa re got: “Here ba Firewn, çimkî min dilên wî û karmendên wî hişk kirin ku ez van nîşanên xwe di nav wan de raber bikim.

² Tu jî, ji kurên xwe û neviyên xwe re bêje min çawa bi nîşanan Misir rezîl kir ku hûn bizanibin Xudan ez im.”

³ Piştî Mûsa û Harûn çûn ba Firewn, wan jê re got: “Xwedayê Îbraniyan Xudan wiha dibêje: ‘Heta kengê tê xwe li ber min nizim nekî? Gelê min berde ku xulamiya min bike.

⁴ Heke tu nekî, ezê sibê kuliyan berdim nav welatê te.

⁵ Wê rûyê erdê binixêmin û erd neyê dîtin. Wê tiştên ji ber zîpikê mane û hemû dar û deviyên we yên zeviyan bixwin.

⁶ Wê kulî li mala te, mala hemû karmendên te û malên hemû Misriyan tije bibin. Ne bavên te û ne jî bavkalên te, wê heta îro tiştekî wiha li ser rûyê erdê nedîtibin.’” Piştre Mûsa zivirî û ji ba Firewn derket.

⁷ Karmendên Firewn jê re got: “Ma wê heta kengê ev zilamê hanê ji bo me bibe dafik? Wan berde! Bila herin û xulamiya Xwedayê xwe Xudan bikin. Misir helak bû, ma tu hê fêm nakî?”

⁸ Bi vî awayî wan Mûsa û Harûn careke din anîn ba Firewn. Wî ji wan re got: “Herin xulamiya Xwedayê xwe Xudan bikin, lê wê kî û kê herin?”

⁹ Mûsa got: “Emê bi kal û xortên xwe, bi kur û keçên xwe, bi pez û dewarên xwe re herin. Çimkî emê cejna Xudan pîroz bikin.”

¹⁰ Firewn got: “Heke ez bihêlim hûn û zarokên xwe herin, bila Xudan alîkarê we be! Jixwe niyeta we xerab e!

¹¹ Wiha nabe. Niha tenê mêr herin û xulamiya Xudan bikin. Ji xwe daxwaza we ev e.” Piştre Mûsa û Harûn ji ba Firewn hatin qewitandin.

¹² Xudan ji Mûsa re got: “Tu destê xwe bi ser welatê Misrê ve dirêj bike ku kulî li welatê Misrê bibarin, hemû giyayê welat û ya ku ji ber zîpikê maye bixwin.”

¹³ Mûsa gopalê xwe bi ser welatê Misrê ve dirêj kir. Tevahiya wê rojê û wê şevê Xudan li welêt bayê rojhilat rakir. Gava bû sibe, bayê rojhilat kulî anîn.

¹⁴ Li seranserê welatê Misrê kulî bariyan û her derê tije kirin. Kulî ewqas pir bûn ku tiştek wiha berê tu caran çênebûbû û piştre jî wê çênebûya.

¹⁵ Wan tevahiya welêt nixamt ku welat reş û tarî bû. Wan giyayê seranserê welêt û fêkiyê hemû darên ku ji ber zîpikê mabûn xwarin. Li seranserê welatê Misrê, ne dar, ne giyayên çolê, tu şînahî nema.

¹⁶ Firewn bi lez gazî Mûsa û Harûn kir û got: “Min li dijî we û Xwedayê we Xudan guneh kir.

¹⁷ Ez lava dikim vê carê gunehê min bibexişînin û ji bo ku vê mirinê ji ser min rake, ji Xwedayê xwe Xudan re dua bikin.”

¹⁸ Mûsa ji ba Firewn rabû û ji Xudan lava kir.

¹⁹ Xudan ba zivirand bayekî rojava yê gelekî hêzdar. Wî kulî ajotin Derya Sor. Li seranserê welatê Misrê, kuliyek jî nema.

²⁰ Lê Xudan dilê Firewn hişk kir, loma jî wî gelê Îsraêl berneda.

Belaya nehemîn: Tarîtî

²¹ Xudan ji Mûsa re got: “Tu destê xwe ber bi ezmanan ve dirêj bike ku li welatê Misrê şevereşek çêbe ku herkes pê bihese.”

²² Mûsa destê xwe ber bi ezmanan ve dirêj kir. Li seranserê welatê Misrê, ji bo sê rojan taristanek çêbû.

²³ Kes kesî nedît û kes sê rojan ji cihê xwe ranebû. Tenê cihê ku gelê Îsraêl lê dima, ronahî bû.

²⁴ Firewn gazî Mûsa kir û got: “Herin xulamiya Xudan bikin. Bila zarokên we jî bi we re bên lê bila pez û dewarên we bimînin.”

²⁵ Lê Mûsa got: “Wî çaxî tê qurbanên şewitandinê û qurbanên din bidî me ku em wan ji Xwedayê xwe Xudan re serjê bikin.

²⁶ Ev jî nabe! Divê keriyên me bi me re bin û simekî jî li vir nemîne. Ji bo em xulamiya Xwedayê xwe Xudan bikin, divê em ji nav wan hinekan hilbijêrin û heta em negihîjin wir, emê nizanibin kîjanî pêşkêşî Xwedê bikin.”

²⁷ Lê Xudan dilê Firewn hişk kir û wî nexwest wan berde.

²⁸ Firewn ji Mûsa re got: “Here ji hafa min! Qet dernekeve pêşiya min. Roja tu rûyê min bibînî, tê bimirî.”

²⁹ Mûsa got: “Bila wekî te be! Ezê careke din te nebînim.”