Derketin 1 - Kurmanji Încîl

Li Misrê koletiya gelê Îsraêl

¹ Navên kurên Îsraêl ên ku bi malbatên xwe re bi Aqûb re çûbûn Misrê ev in:

² Rûbên, Şimûn, Lêwî, Cihûda,

³ Îssexar, Zevûlon, Binyamîn,

⁴ Dan, Neftelî, Gad û Aşêr.

⁵ Kesên ku ji ziriyeta Aqûb dihatin li ser hev heftê kes bûn. Ûsiv ji xwe li Misrê bû.

⁶ Bi demê re Ûsiv, hemû birayên wî û tevahiya wî nifşî mirin.

⁷ Lê gelê Îsraêl berdar û belav bû. Ew li hev zêde bûn û her ku çû xurt bûn. Welat bi wan tije bû.

⁸ Paşê li Misrê padîşahekî nû rabû ku haya wî ji Ûsiv tunebû.

⁹ Wî ji gelê xwe re got: “Va ye gelê Îsraêl ji me mezintir û hêzdartir e.

¹⁰ Werin em li dijî wan biaqil bin, an na wê zêdetir bibin. Heke şerek derkeve, wê bi dijminên me re bibin yek, li dijî me şer bikin û ji vî welatî derkevin herin.”

¹¹ Îcar Misriyan serkar danîn ser wan ku bi suxreya giran eziyetê li wan bikin. Wan ji bo Firewn, Pîtom û Ramsêsê ava kirin ku bajarên embarî bûn.

¹² Lê çiqas eziyet li wan hat kirin, ew bêtir zêde û belav bûn. Ji ber vê yekê Misrî ji gelê Îsraêl ditirsiyan.

¹³ Misrî bi darê zorê gelê Îsraêl dan xebatê.

¹⁴ Wan bi karên giran ên xerc û kelpîçan û hemû karên cotkarî, jiyan li wan kirin jehr. Di hemû karên xwe de bi darê zorê ew dan xebatê.

¹⁵ Padîşahê Misrê ji pîrikên Îbranî yên bi navên Şîfra û Pûayê re wiha got:

¹⁶ “Gava hûn ji jinên Îbranî re pîriktiyê bikin û jina li ser textê zarokanînê bibînin wisa bikin: Heke kur be bikujin, lê keç be dest nedinê.”

¹⁷ Lê pîrik ji Xwedê ditirsiyan, wan li gorî emrê Padîşahê Misrê nekir. Zarokên kur sax hiştin.

¹⁸ Padîşahê Misrê gazî pîrikan kir û ji wan re got: “We çima wisa kir? Çima zarokên kur sax hiştin?”

¹⁹ Pîrikan ji Firewn re got: “Jinên Îbraniyan ne wekî jinên Misriyan in. Ew gelekî xurt in û hê beriya pîrik bên, zarokan tînin.”

²⁰ Xwedê qencî bi pîrikan kir. Her ku çû gel zêde û xurt bû.

²¹ Ji ber ku pîrik ji Xwedê ditirsiyan, Xwedê ew kirin xweyî mal û malbat.

²² Li ser vê yekê Firewn ferman da tevahiya gelê xwe û got: “Her zarokê kur ê Îsraêlî gava çêbû bavêjin Çemê Nîlê lê keçikan sax bihêlin.”