Daniyêl 1 - Kurmanji Încîl

Daniyêlê Pêxember li Babîlê tê perwerdekirin

¹ Di sala sisêyan a padîşahiya Yehoyaqîmê Padîşahê Cihûdayê de Nebûxadnessarê Padîşahê Babîlê hat Orşelîmê û dor li bajêr pêça.

² Reb Yehoyaqîmê Padîşahê Cihûdayê û hin taximên li Mala Xwedê kir destê Nebûxadnessar. Nebûxadnessar ew bi xwe re birin welatê Şînarê û danîn nav xezîneya mala îlahê xwe.

³ Nebûxadnessarê Padîşah ferman da Aşpenazê berpirsiyarê karmendên qesrê ku hinek ji gelê Îsraêl ên ji ziriyeta padîşah an jî hinek esilzade hilbijêre û wan bîne qesrê.

⁴ Divê ev xort bêqisûr û lihevhatî bin, di her mijarê de zana û şehreza bin, guhê wan li ser hînbûnê be. Wê di qesrê de xizmet bikin û ziman û nivîsandina Kildanî hîn bibin.

⁵ Padîşah ji sifra xwe xwarin û şerab dida wan. Piştî perwerdekirina sê salan wê bibirana hizûra padîşah.

⁶ Di nav xortên hilbijartî de ji Cihûdayiyan Daniyêl, Hananya, Mîşaêl û Ezarya hebûn.

⁷ Berpirsiyarê karmendên qesrê navên nû li wan kir. Wî navê Daniyêl Bêlteşassar, navê Hananya Şadrak, navê Mîşaêl Mêşak û navê Ezarya Eved-Nego danîn.

⁸ Daniyêl di dilê xwe de biryar da ku xwe bi xwarin û şeraba xweş a padîşah qirêj neke. Wî ji berpirsiyarê karmendên qesrê lava kir ku xwe qirêj neke.

⁹ Xwedê kir ku berpirsiyarê karmendên qesrê bi kerem û dilovanî li Daniyêl binêre.

¹⁰ Berpirsiyarê karmendên qesrê ji Daniyêl re got: “Ez ji xweyê xwe padîşah ditirsim. Wî xwarin û vexwarin daye we. Çima rûyê we li ber xortên din çilmisî be? Hûnê serê min bi padîşah re bixin belayê.”

¹¹ Daniyêl ji çavdêrê ku berpirsiyarê karmendên qesrê ew li ser wî, Hananya, Mîşaêl û Ezarya kifş kiribû re wiha got:

¹² “Lava dikim deh rojan xulamên xwe biceribîne. Tenê pincar û avê bide me.

¹³ Paşê rûyê me û rûyê wan kesan bide ber hev ku ji xwarinên padîşah xwarine. Li gorî reng û rûçikê me biryara xwe bide.”

¹⁴ Wî bi ya wan kir û ji bo deh rojan ew ceribandin.

¹⁵ Piştî deh rojan, ew ji hemû kesên ku xwarinên padîşah xwaribûn çêtir û sihetir bûn.

¹⁶ Li ser vê yekê çavdêr xwarin û şerab hilanîn û wekî berê pincar da wan.

¹⁷ Xwedê di her mijarê de xwendin, zanabûn, aqil û şehrezayî da wan. Daniyêl li ser hemû dîtinî û xewnan jî şehreza bû.

¹⁸ Piştî dema diyarkirî ya padîşah temam bû, berpirsiyarê karmendên qesrê ew anîn ba Nebûxadnessar.

¹⁹ Padîşah bi wan re peyivî. Di nav hemûyan de kesên wekî Daniyêl, Hananya, Mîşaêl û Ezarya tunebûn. Loma ew birin hizûra padîşah.

²⁰ Padîşah şêwra zanabûn û şehrezayiya wan dikir. Wî didît ku her çar jî, ji hemû sêrbaz û falbazên welêt deh qatî zanatir û zêdetir in.

²¹ Heta yeksaliya padîşahiya Koreş, Daniyêl li wir ma.