Dadger 8 - Kurmanji Încîl

Zevah û Salmunnayê padîşahên Mîdyaniyan

¹ Efrayîmiyan ji Gîdyon re got: “Te çima wisa kir?! Gava tu li dijî Mîdyaniyan çûyî şer, te gazî me nekir.” Wan erzê wî bi dijwarî şikand.

² Gîdyon ji wan re got: “Li ber tişta we kir, min tiştek nekir. Efareya rezên Efrayîmiyan, ji tevahiya çinîna rezên Aviyezer çêtir e?

³ Xwedê Orêv û Zeêvê serekên Mîdyanê dan destê we. Li ber tişta we kir, ka min çi kir?!” Van gotinan hêrsa wan kêm kir.

⁴ Gîdyon û sê sed zilamên pê re gihîştin Çemê Şerîayê û derbas bûn. Ew westiyabûn, lê hê li pey Mîdyaniyan bûn.

⁵ Gava ew gihîştin Sûkkotê, wî ji gelê bajêr re got: “Ji kerema xwe sominên nên bidin mirovên min, westiya ne. Ez didim pey Zevah û Salmunnayê padîşahên Mîdyaniyan.”

⁶ Lê serekên Sûkkotê jê re got: “Ma te Zevah û Salmunna dîl girtine ku em nên bidin artêşa te?”

⁷ Gîdyon got: “Baş e. Gava Xudan Zevah û Salmunna da destê min, ezê bedenên we li ser dirî û stiriyên beriyê binpê bikim.”

⁸ Ji wir, Gîdyon çû Penûêlê û ji gelê wir jî xwarin xwest. Gelê Penûêlê jî wekî bersiva gelê Sûkkotê bersivek da wî.

⁹ Gîdyon ji wan re got: “Gava ez bi xêr û silamet vegeriyam, ezê vê bircê hilweşînim.”

¹⁰ Zevah û Salmunna bi artêşa wan a bi qasî panzdeh hezar zilaman re li Qarqorê diman. Tevahiya wan saxmayiyên artêşên gelên rojhilat bûn. Sed û bîst hezar zilamên çekdar ketibûn.

¹¹ Gîdyon di riya koçeran a ji rojhilatê Novah û Yogbohayê re derbas bû û êrîşî artêşê kir. Wê gavê artêş bêxem bû.

¹² Zevah û Salmunna reviyabûn. Gîdyon da pey wan û herdu padîşahên Mîdyaniyan, girtin. Artêşa wan lerizî.

¹³ Gava Gîdyonê kurê Yoaş di riya Hevrazê Heresê re ji şer vegeriya,

¹⁴ wî xortekî Sûkkotî girt. Gîdyon ew da ber pirsan. Xort navên serek û rîspiyên Sûkkotê ji bo wî nivîsandin ku heftê û heft kes bûn.

¹⁵ Gava hat ba gelê Sûkkotê, Gîdyon got: “We ji min re got: ‘Ma te Zevah û Salmunna dîl girtin ku em nên bidin zilamên te’ û we tinazê xwe bi min kir. Va ne Zevah û Salmunna!”

¹⁶ Wî rîspiyên bajêr civandin û bi dirî û stiriyên beriyê li wan xistin.

¹⁷ Piştre wî Birca Penûêlê hilweşand û gelê bajêr da ber şûran.

¹⁸ Wî ji Zevah û Salmunna re got: “Zilamên ku we li Tavorê kuştin mirovên çawa bûn?” Wan got: “Tu çawa bî, ew jî wisa bûn. Dirûvê zarokên padîşahan bi her yekî ji wan diket.”

¹⁹ Gîdyon got: “Ew birayên min û zarokên diya min bûn. Ez bi navê Xudanê Jîndar sond dixwim, heke we ew sax berdana, min hûn nedikuştin.”

²⁰ Piştre wî ji Yeterê kurê xwe yê mezin re got: “Rabe wan bikuje!” Lê ji ber ku hê xort bû, kurê wî tirsiya û şûrê xwe nekişand.

²¹ Li ser vê yekê Zevah û Salmunna ji Gîdyon re got: “Tu me bikuje! Çimkî karê mêran tenê mêr dikin.” Gîdyon rabû, Zevah û Salmunna kuşt. Wî heyvikên stûyên deveyên wan jî hildan.

²² Paşê gelê Îsraêl ji Gîdyon re got: “Tu, kurê te û kurê kurê te ji me re serweriyê bikin. Çimkî te em ji destê Mîdyaniyan rizgar kirin.”

²³ Gîdyon got: “Ez jî û kurê min jî, emê serweriya we nekin. Wê Xudan serweriya we bike!”

²⁴ Piştre got: “Daxwazeke min ji we heye. Her kes guharekî bide min ku we ji nav talên bi dest xistiye.” Çimkî Îsmaîliyan guharên zêrîn li guhên xwe dixistin.

²⁵ Wan got: “Emê bi kêfxweşî bidin” û kincekî raxist erdê. Her kesî guharê ku talan kiriye avêt ser wî kincî.

²⁶ Giraniya guharên zêrîn ên ku Gîdyon standin, hezar û heft sed şekel bû. Bi ser de, wî heyvik, gerdenî û kincên binevşî yên ku padîşahên Mîdyaniyan li xwe dikirin û zincîrên ku ji stûyê deveyan derxistibûn, standin.

²⁷ Gîdyon ji zêr êfodek çêkir û ew bir Ofraya bajarê xwe. Tevahiya gelê Îsraêl li wir ev pût heband. Ev ji bo Gîdyon û malbata wî bû dafikek.

²⁸ Mîdyanî li ber gelê Îsraêl têk çûn û careke din serê xwe ranekir. Di dema Gîdyon de welat çil salan di nav aştiyê de ma.

Mirina Gîdyonê kurê Yoaş

²⁹ Yerûbbaalê kurê Yoaş çû û li mala xwe rûnişt.

³⁰ Gîdyon gelek jin ji xwe re anîn û heftê kurên wî çêbûn.

³¹ Cariyeya wî ya ku li Şexemê dima jî jê re kurek anî. Wî navê wî Avîmelek danî.

³² Gîdyonê kurê Yoaş emrekî dirêj kir û mir. Ew li bajarê Ofraya Aviyezeriyan, di gora Yoaşê bavê xwe de hat veşartin.

³³ Piştî mirina Gîdyon, gelê Îsraêl averê bû û pûtên Baal hebandin. Wan Baal-Berîtî ji xwe re kir îlah.

³⁴ Gelê Îsraêl, Xwedayê xwe Xudan ê ku wî ew ji destê hemû dijminên derdorê rizgar kiribû, bi bîr neanî.

³⁵ Herwiha wan bi ser hemû qenciya ku bi gelê Îsraêl re kiribû jî, bi Mala Yerûbbaal –ku Gîdyon e– re dilsoz neman.