Dadger 6 - Kurmanji Încîl

Gîdyonê kurê Yoaş

¹ Gelê Îsraêl tiştên di çavê Xudan de xerab in, kirin. Xudan ew heft salan dan destê Mîdyaniyan.

² Mîdyanî li dijî gelê Îsraêl bi ser ketin. Ji ber Mîdyaniyan, wan li çiyayan ji xwe re şikeft, sitargeh û derên veşartinê çêkirin.

³ Gava gelê Îsraêl tov direşand, Mîdyanî, Emalêqî û gelên din ên rojhilat li dijî wan radibûn.

⁴ Wan li dijî gelê Îsraêl artêşgeh vedidan û heta Xezayê berê welêt xera dikirin. Çi pez, çi dewar, çi ker, wan li welatê Îsraêl debar nedihişt.

⁵ Bi heywanan re dihatin. Konên xwe jî bi qasî refê kuliyan dibirin. Ne ew, ne jî deveyên wan dihatin hejmartin. Gava dihatin, ax xera dikirin.

⁶ Ji ber Mîdyaniyan, gelê Îsraêl gelek belengaz bû. Wan ji Xudan re kir hewar.

⁷ Gava gelê Îsraêl ji ber Mîdyaniyan ji Xudan re kir hewar,

⁸ Xudan ji wan re pêxemberek şand. Wî ji wan re got: “Xwedayê Îsraêl Xudan wiha dibêje: ‘Min hûn ji Misrê, ji warê koletiyê deranîn.

⁹ Min hûn ji destê Misriyan û ji destê hemûyên ku tengasî didan we rizgar kirin. Min ji ber we ew qewitandin û welatên wan dan we.

¹⁰ Min ji we re got: Ez Xwedayê we Xudan im. Hûnê ji îlahên Amoriyan netirsin ku hûn li welatê wan rûdinin. Lê we guhdariya dengê min nekir.’”

¹¹ Paşê milyaketê Xudan hat. Ew li bajarê Ofrayê, li bin darberûya Yoaşê Aviyezerî rûdinişt. Gîdyonê kurê Yoaş di mehsera tirî de genim dikuta ku ji Mîdyaniyan veşêre.

¹² Milyaketê Xudan lê xuya bû û got: “Ya mêrxasê wêrek! Xudan bi te re ye.”

¹³ Gîdyon got: “Ax ezbenî, heke Xudan bi me re ye, çima ev hemû tişt hatin serê me? Ka kerametên bav û kalên me ji me re digotin? Ma wan ji me re negot: ‘Xudan em ji Misrê deranîn?’ Lê Xudan niha dev ji me berda. Wî em dan destê Mîdyaniyan.”

¹⁴ Xudan li Gîdyon zivirî û got: “Tu bi vê hêza xwe here û gelê Îsraêl ji destê Mîdyaniyan rizgar bike! Ez te dişînim!”

¹⁵ Gîdyon got: “Ax ezbenî! Ez bi çi gelê Îsraêl rizgar bikim? Malbata min, li nav Minaşşeyiyan, malbata herî belengaz e û ez jî kurê herî biçûk ê bavê xwe me.”

¹⁶ Xudan jê re got: “Lê ezê bi te re bim. Tê Mîdyaniyan wekî zilamekî têk bibî.”

¹⁷ Wî got: “Heke dilê te bi min xweş be, nîşanekê bide min ku ez bizanim yê ku bi min re dipeyive, tu yî.

¹⁸ Ji kerema xwe, heta ez diyariya xwe derxim û li ber te deynim, ji vê derê neçe.” Xudan got: “Heta tu vegerî, ezê li vir bim.”

¹⁹ Gîdyon çû malê, karikek serjê kir. Ji efayek arvan, nanê şikeva çêkir. Wî goşt xist selikê û ava goşt kir quşxaneyê. Wî ew li bin darberûyê pêşkêş kir.

²⁰ Milyaketê Xwedê jê re got: “Goşt û nanê şikeva hilde û deyne ser vî zinarî. Ava goşt jî birijîne ser.” Wî wisa kir.

²¹ Milyaketê Xudan serê gopalê ku di destê wî de ye, dirêj kir û danî ser goşt û nanê şikeva. Piştre agir ji zinêr derket, goşt û nanê şikeva xwar. Milyaketê Xudan ji ber çavê wî winda bû.

²² Gîdyon dît ku ew milyaketê Xudan bû û got: “Hey wax, ya Reb Xudan! Min rû bi rû milyaketê te dît.”

²³ Xudan jê re got: “Bi silamet be. Netirse, tê nemirî.”

²⁴ Gîdyon li wir ji Xudan re gorîgehek çêkir û navê wê Yahwe-Şalom danî. Gorîgeh heta îro jî li bajarê Ofraya Aviyezeriyan e.

²⁵ Wê şevê Xudan ji Gîdyon re got: “Tu conegayê bavê xwe, conegayê diduyan ê heft salî hilde. Gorîgeha Baal ku bavê te çêkiriye, hilweşîne û pûtê Aşêrayê yê li ba gorîgehê, jêke.

²⁶ Paşê li serê kelehê ji Xwedayê xwe Xudan re gorîgeheke bi pergal çêke. Conegayê diduyan hilde, bi êzingên pûtê Aşêrayê ku tê jê bikî, qurbana şewitandinê pêşkêş bike.”

²⁷ Gîdyon deh zilamên xwe hildan û çawa ku Xudan jê re gotibû, kir. Lê ji ber tirsa mala bavê xwe û xelkê bajêr, wî ne bi roj, bi şev kir.

²⁸ Gava xelkê bajêr serê sibê zû rabû, dît ku gorîgeha Baal hatiye hilweşandin, pûtê Aşêrayê yê li ba wî hatiye jêkirin û conegayê diduyan li ser gorîgehê hatiye pêşkêşkirin.

²⁹ Wan ji hev re got: “Kê ev yek kir?” Piştî lêpirsîn û lêkolînê, wan fêm kir ku Gîdyonê kurê Yoaş ev yek kiriye.

³⁰ Xelkê bajêr ji Yoaş re got: “Kurê xwe derxe derve, divê bê kuştin. Çimkî wî gorîgeha Baal hilweşand û pûtê Aşêrayê jêkir ku li ba wê bû.”

³¹ Yoaş ji kesên li hember wî disekinin re got: “Ma parastina Baal bi we ketiye? Hûnê wî rizgar bikin? Kesê Baal diparêze wê serê sibê bê kuştin! Heke ew îlah e, bila xwe biparêze. Çimkî gorîgeha wî hatiye hilweşandin.”

³² Bi vî awayî, wê rojê Yoaş bi gotina “Bila Baal xwe biparêze” navê Yerûbbaal li Gîdyon danî. Çimkî wî gorîgeha Baal hilweşandibû.

³³ Di vê navberê de Mîdyanî, Emalêqî û gelên din ên rojhilat bûn yek, di Çemê Şerîayê re derbas bûn û li Deşta Yîzreyêlê artêşgeh ava kirin.

³⁴ Lê Ruhê Xudan hat ser Gîdyon. Gava wî li boriyê xist, Aviyezerî li pey wî civiyan.

³⁵ Gîdyon qasid şandin seranserê welatê Minaşşeyiyan û ew jî li pey wî civiyan. Wî qasid şandin ba eşîrên Aşêr, Neftelî û Zevûlon û ew jî hatin pêşwaziya wî.

³⁶ Gîdyon ji Xwedê re got: “Heke çawa ku te got, tê gelê Îsraêl bi destê min rizgar bikî,

³⁷ va ye ezê hiriyê deynim ser bênderê. Heke xunav tenê li ser hiriyê bisekine û tevahiya axê ziwa be, wî çaxî çawa ku te gotiye, ezê bizanibim tê gelê Îsraêl bi destê min rizgar bikî.”

³⁸ Wisa jî bû. Dotira rojê Gîdyon serê sibê zû rabû û hirî guvaşt. Ji hiriyê tasek xunav dawerivî.

³⁹ Gîdyon ji Xwedê re got: “Tu li min hêrs nebe, bihêle ez tiştekî din bêjim. Destûr bide ku ez bi hiriyê careke din biceribînim. Bila vê carê hirî ziwa be û tevahiya axê bi xunavê şil bibe.”

⁴⁰ Xwedê wê şevê wisa kir. Hirî ziwa ma û li ser tevahiya axê xunav hebû.