Dadger 12 - Kurmanji Încîl

Yîftahê Gîladî û eşîra Efrayîm

¹ Efrayîmî çekên xwe hildan, derbasî Safonê bûn û wan ji Yîftah re got: “Çima gava tu çûyî û te li dijî Emmoniyan şer kir, te gazî me nekir? Emê te bi mala te ve bişewitînin.”

² Yîftah ji wan re got: “Ez û gelê xwe em bi Emmoniyan re ketibûn pevçûneke giran. Min li we kir hewar, lê we ez ji destê wan rizgar nekirim.

³ Çaxê min dît ku hûn min ji destê wan rizgar nakin, min canê xwe kir destê xwe. Ez rabûm min şerê Emmoniyan kir û Xudan ew dan destê min. Çima hûn îro şerê min dikin?”

⁴ Îcar Yîftah tevahiya zilamên Gîladê da hev û li dijî Efrayîmiyan şer kir. Gîladiyan Efrayîmî têk birin. Çimkî Efrayîmiyan ji wan re gotibû: “Ya Gîladiyên ku di navbera gelên Efrayîm û Minaşşe de rûdinin, hûn tenê firarên Efrayîmî ne!”

⁵ Gîladiyan hemû bihorên Çemê Şerîayê li dijî Efrayîmiyan girtin. Gava firarên Efrayîmî got: “Bihêlin em derbas bibin,” Gîladiyan ji wan re got: “Ma tu Efrayîmî yî?” Çaxê wan bigota: “Na,”

⁶ wan digot: “Baş e, ka bêje: ‘Şîbbolet.’” Wan digot: “Sîbbolet,” çimkî wan nikaribû bi devoka rast ev gotin bigotana. Li ser vê yekê wan ew digirtin û di bihorên Çemê Şerîayê de dikuştin. Wî çaxî çil û du hezar Efrayîmî ketin û mirin.

⁷ Yîftahê Gîladî şeş salan serweriya gelê Îsraêl kir. Gava mir, li bajarekî Gîladê hat veşartin.

Îvsanê Bêtlehemî, Elonê Zevûlonî û Evdonê kurê Hillêl

⁸ Piştre Îvsanê Bêtlehemî serweriya gelê Îsraêl kir.

⁹ Sî kûr û sî keçên Îvsan hebûn. Wî keçên xwe dan mêrên binemalên din û ji kurên xwe re jî jinên binemalên din anîn. Wî heft salan serweriya gelê Îsraêl kir.

¹⁰ Gava mir, li Bêtlehemê hat veşartin.

¹¹ Piştî wî, Elonê Zevûlonî serweriya gelê Îsraêl kir. Ew deh salan dadgerê gelê Îsraêl bû.

¹² Gava mir, li Ayalona welatê Zevûlon hat veşartin.

¹³ Piştî wî, Evdonê kurê Hillêlê Pîretonî serweriya gelê Îsraêl kir.

¹⁴ Çil kur û sî neviyên Evdon hebûn û ew li heftê keran siwar dibûn. Wî heşt salan serweriya gelê Îsraêl kir.

¹⁵ Gava Evdonê kurê Hillêlê Pîretonî mir, li herêma çiyayî ya Emalêqiyan, li Pîretona welatê Efrayîm hat veşartin.