Dadger 10 - Kurmanji Încîl

Tolayê kurê Pûa

¹ Piştî Avîmelek, Tolayê kurê Pûayê kurê Dodoyê Îssexarî ji bo rizgarkirina gelê Îsraêl rabû. Ew li herêma çiyayî ya Efrayîmê, li Şamîrê dima.

² Wî bîst û sê salan serweriya gelê Îsraêl kir. Piştre mir û li Şamîrê hat veşartin.

Yayîrê Gîladî

³ Piştî wî, Yayîrê Gîladî rabû. Wî bîst û du salan serweriya gelê Îsraêl kir.

⁴ Sî kurên wî hebûn ku li sî keran siwar dibûn. Sî bajarên wan hebûn ku li herêma Gîladê bûn. Îro jî, ji van bajarên re Hawot-Yayîr tê gotin.

⁵ Yayîr mir û li Qamonê hat veşartin.

Yîftahê Gîladî

⁶ Gelê Îsraêl careke din tiştên di çavê Xudan de xerab in, kirin. Wan ji pûtên Baal û Eştoretê, ji îlahên Aramî, Saydayî, Moavî, Emmonî û Filîstiyan re xulamî kir. Wan dev ji Xudan berda û xulamiya wî nekir.

⁷ Hêrsa Xudan li dijî gelê Îsraêl rabû û wî ew dan destê Filîstî û Emmoniyan.

⁸ Wê salê, wan destpê kir ku zorê li gelê Îsraêl bikin. Wan hijdeh salan zordarî li gelê Îsraêl ê li rojhilatê Çemê Şerîayê kir ku li welatê Amoriyan ê Gîladê diman.

⁹ Îcar Emmonî ji Çemê Şerîayê derbas bûn ku li dijî Cihûdayî, Binyamînî û Mala Efrayîm şer bikin. Îsraêl di tengasiyeke mezin de bû.

¹⁰ Gelê Îsraêl ji Xudan re kir hewar û got: “Me li dijî te guneh kir. Me dev ji Xwedayê xwe berda û xulamiya pûtên Baal kir.”

¹¹ Xudan ji gelê Îsraêl re got: “Ma min hûn ji destê Misrî, Amorî, Emmonî û Filîstiyan rizgar nekirin?

¹² Gava Saydayî, Emalêqî û Maoniyan zorê li we kir, we li min kir hewar û min hûn ji destê wan jî rizgar kirin.

¹³ Lê we dev ji min berda û xulamiya îlahan kir. Loma ezê careke din we rizgar nekim.

¹⁴ Rabin, ji îlahên ku we hilbijartine re bikin hewar! Bila ew di dema tengasiyê de we rizgar bikin.”

¹⁵ Gelê Îsraêl ji Xudan re got: “Me guneh kir, çi li ber çavê te qenc e wê bike, lê îro me rizgar bike!”

¹⁶ Wan îlahên xerîb ji nav xwe avêtin û xulamiya Xudan kir. Dilê Xudan jî bar nebû ku gelê Îsraêl derdan zêdetir bikişîne.

¹⁷ Wê gavê Emmonî civiyan. Wan li Gîladê artêşgeh ava kir. Gelê Îsraêl jî civiya û li Mîspayê artêşgeh ava kir.

¹⁸ Serekên Gîladê ji hev re got: “Kesê cara pêşî êrîşî Emmoniyan bike, wê bibe mezinê tevahiya şêniyên Gîladê.”