Amos 9 - Kurmanji Încîl

Hilweşandina Îsraêla Bakur

¹ Min dît, Reb li ba gorîgehê sekinîbû. Wî got: “Li serikên stûnan bixe, bila binên wan bihejin, Li ser serê tevahiya gel wan perçe bike. Ezê saxmayiyan bidim ber şûran, Wê tu kes nereve, wê tu kes nefilite.

² Ew heta diyarê miriyan bikolin jî, Wê destê min wan ji wir bîne jorê. Rabin ezmanan jî, Ezê wan ji wir bînim jêrê.

³ Ew xwe bispêrin serê Çiyayê Karmelê jî, Ezê li wan bigerim û bigirim. Li ber çavê min xwe di deryayê de veşêrin jî, Ezê li marê avê emir bikim ku bi wan vede.

⁴ Ew ji ber dijminên xwe bên sirgûnkirin jî, Ezê li şûr emir bikim ku wan bikuje. Ezê çavê xwe bidim ser wan, Ne ji bo qenciyê, lê ji bo xerabiyê.”

⁵ Gava Reb Xudanê Karîndar dest dide erdê, Dinya dihele û hemû şêniyên wê şînê dikin. Tevahiya erdê wekî Çemê Nîlê bilind dibe Û wekî çemê Misrê dîsa dadikeve.

⁶ Ew odeyên xwe li ezmanan çêdike Û qûbeya xwe li ser erdê ava dike. Ew gazî ava deryayê dike Û bi ser rûyê erdê ve dirijîne. Navê wî Xudan e.

⁷ Gotina Xudan ev e: “Ya gelê Îsraêl! Ma hûn ji min re ne wekî Kûşiyan in? Ma min gelê Îsraêl ji welatê Misrê, Filîstî ji Kaftorê û Aramî ji Qîrê dernexim?

⁸ “Va ye, çavê Reb Xudan li ser padîşahiya gunehkar e. Ezê wê ji ser rûyê erdê tune bikim, Lê ezê Mala Aqûb bi tevahî tune nekim.” Ev e gotina Xudan.

⁹ “Va ye, ezê emir bikim û Mala Îsraêl Di nav hemû miletan de bihejînim. Ezê wekî bêjingê bihejînim, Lê wê libek jê nekeve erdê.

¹⁰ Hemû gunehkarên nav gelê min ên ku dibêjin: ‘Bela nagihîje me, li me nagere,’ wê bi şûr bimirin.

Wê ziriyeta Dawid vegere firehiya berê

¹¹ “Wê rojê ezê holika Dawid a ketî ji nû ve çêkim. Ezê cihên wê yên qelişî dagirim Û wêraneyên wê ji nû ve rakim. Ezê wê wekî rojên berê ava bikim.

¹² Wê bermayiyên Edomiyan û hemû miletan Ji xwe re bikin milk ku bi navê min tên gazîkirin.” Ev e gotina Xudan ê ku vê yekê dike.

¹³ Gotina Xudan ev e: “Va ye, roj tên ku cotkar bigihîje dasvan, Kesê tirî diguvêşe bigihîje kesê tov direşîne. Wê şeraba şîrîn ji çiyayan dilop bike, Wê ji hemû giran biherike.

¹⁴ Ezê gelê xwe Îsraêl vegerînim firehiya berê, Wê bajarên wêran ava bikin û lê rûnin. Wê rezan deynin û şeraba wan vexwin, Wê bexçeyan deynin û fêkiyê wan bixwin.

¹⁵ Ezê wan li welatê wan deynim Û wê careke din ji ser welatê Ku min daye wan, neyên avêtin” dibêje Xwedayê we Xudan.