Amos 7 - Kurmanji Încîl

Dîtiniyên kulî, agir û şaqul

¹ Tiştê ku Reb Xudan nîşanî min da ev bû: Piştî giyayê ku para padîşah diket hatibû çinîn, gava giya ji nû ve şîn dibû, Xudan kulî diafirandin.

² Çaxê kuliyan giyayê erdê xwar û qedand, min got: “Ya Reb Xudan! Lava dikim, bibexişîne! Wê ziriyeta Aqûb çawa li ber xwe bide? Ew miletekî biçûk e.”

³ Li ser vê yekê Xudan fikra xwe guhert û got: “Wê ev yek çênebe.”

⁴ Tiştê ku Reb Xudan nîşanî min da ev bû: Reb Xudan gazî êgir kir ku ceza bike. Êgir kûrahiya mezin daqurtand û dest bi xwarina erdê kir.

⁵ Min got: “Ya Reb Xudan! Lava dikim, bisekine! Wê ziriyeta Aqûb çawa li ber xwe bide? Ew miletekî biçûk e!”

⁶ Li ser vê yekê Reb Xudan fikra xwe guhert û got: “Wê ev jî çênebe.”

⁷ Tiştê ku wî nîşanî min da ev bû: Reb li ber dîwarekî disekinî ku bi şaqul hatiye sererastkirin. Şaqul jî di destê wî de bû.

⁸ Xudan ji min re got: “Tu çi dibînî Amos?” Min got: “Şaqulekê dibînim.” Reb jî got: “Va ye, ezê şaqulekê deynim nav gelê xwe Îsraêl Û ezê êdî wan nebexişînim.”

⁹ Wê bilindciyên ziriyeta Îshaq wêran bibin, Pîrozgehên gelê Îsraêl helak bibin. Ezê bi şûr li dijî Mala Yarovam rabim.

Amosê Pêxember û Amatsyayê Kahin

¹⁰ Wê gavê Amatsyayê Kahinê Bêt-Êlê, ji Yarovamê Padîşahê Îsraêlê re xeber şand û got: “Amos di nava gelê Îsraêl de li dijî te fen û fûtan çêdike. Welat nikare tevahiya van gotinên wî ragire.

¹¹ Çimkî Amos wiha dibêje: “‘Wê Yarovam bi şûr bimire, Wê gelê Îsraêl esse ji ser welatê xwe bê sirgûnkirin.’”

¹² Amatsya ji Amos re got: “Zanyaro! Bireve here welatê Cihûdayê! Li wir nanê xwe bixwe. Li wê derê pêxemberiyê bike.

¹³ Careke din li Bêt-Êlê pêxemberiyê neke. Çimkî ev der pîrozgeha padîşah û perestgeha padîşahiyê ye.”

¹⁴ Wî çaxî Amos bersiva Amatsya da û got: “Ez ne pêxember bûm û ne jî kurê pêxember. Ez tenê gavan û bexçevanê darhejîran bûm.

¹⁵ Xudan ez ji pey dewaran hildam û ji min re got: ‘Here ji gelê min Îsraêl re pêxemberiyê bike.’

¹⁶ Niha tu guh bide gotina Xudan. Tu dibêjî: “‘Li dijî gelê Îsraêl pêxemberiyê neke, Li dijî Mala Îshaq gotinan nebêje.’

¹⁷ “Loma Xudan wiha dibêje: ‘Wê jina te li bajêr bibe fahîşe Û wê kur û keçên te bên şûrkirin. Wê welatê te bi benê pîvanê bê pîvan Û tê li welatekî mirdar bimirî. Wê gelê Îsraêl esse ji welatê xwe bê ajotin.’”