Amos 6 - Kurmanji Încîl

Wey li bêxeman

¹ Wey li bêxemên Siyonê Û kesên di nav ewlehiya Çiyayê Sameryayê de ne! Wey li navdarên miletên mezin Ku Mala Îsraêl xwe spartiye wan.

² Herin bajarê Kalnêyê û bibînin, Ji wir herin Hamaya mezin Û dakevin bajarê Gatê yê Filîstiyan. Ma hûn ji van padîşahiyan çêtir in? Gelo sînorê wan ji sînorê we ne firehtir e?

³ Wey li we ku roja xezebê dûr dibînin Û textê zordariyê nêzîk dikin!

⁴ Ya hûn ên ku li ser nivînên bi diranê fîlan xemilandî radizin, Li ser sedran xwe vedizelînin, Ji kerî berxan, ji axurê golikan dixwin!

⁵ Ya hûn ên li ber dengê tembûrê dikin hîrehîr Û ji we kirî Dawid bi çengê stranan çêdike,

⁶ Tas bi tas şerabê vedixwin, Zeyta herî xweş li xwe didin Û li ser wêranbûna Ûsiv xemgîn nabin!

⁷ Loma hûnê bibin pêşiyên herin sirgûnê, Wê şahiya kesên xwe vedizelînin biqede.

⁸ Gotina Xwedayê Karîndar Xudan ev e: “Reb Xudan bi serê xwe sond xwar, Bîzê min ji quretiya Aqûb diçe, Ez ji qesrên wî nefret dikim. Loma ezê bajêr û her tiştê tê de bidim dest.”

⁹ Heke ji malekê deh kes mabin, wê ew jî bimirin.

¹⁰ Çaxê merivê mirî were ku cendek ji malê bîne û bişewitîne, Wê ji kesê li malê re bêje: “Ma li ba te kesekî din heye?” Ewê jî bêje: “Na.” Wê gavê wê bêje: “Hiş be! Divê navê Xudan neyê hildan.”

¹¹ Çimkî Xudan emir dike û dibêje: “Wê mala mezin perçe perçe, Mala biçûk jî hûr hûr bike xwelî.”

¹² Ma hesp li serê zinaran baz didin? Ma kes li deryayê bi gê cot dike? Lê we heqî kir jehr Û fêkiyê edaletê kir giyayê tehl.

¹³ Hûn kesên ku li Lo-Devarê şa dibin Û dibêjin: “Ma me Qarnayîm bi hêza xwe nestand?”

¹⁴ Gotina Xwedayê Karîndar Xudan ev e: “Ya Mala Îsraêl! Va ye, ez miletekî li dijî we radikim! Wê ji Levo-Hamatê heta Geliyê Eravayê we bixe tengasiyê.”