Amos 2 - Kurmanji Încîl

¹ Xudan wiha dibêje: “Ji bo sê-çar û zêdetir neheqiyên Moaviyan, Ezê cezayê wan ranekim. Wan hestiyên Padîşahê Edomê, Heta bû kils şewitandin.

² Loma ezê êgir bi ser Moavê de bibarînim Ku bircên Qeriyotê daqurtîne. Wê Moavî bi dengê boriyan, qîrîn û xirecirê bimirin.

³ Ezê desthilatdarê wê rakim û bavêjim, Ezê pê re hemû serekên wê bikujim” dibêje Xudan.

Dadbarkirina Cihûdayê

⁴ Xudan wiha dibêje: “Ji bo sê-çar û zêdetir neheqiyên gelê Cihûda, Ezê cezayê wan ranekim. Wan Şerîeta Xudan red kir, Qanûnên min pêk neanîn. Pûtên wan ew averê kirin, Ew pûtên ku bav û kalên wan jî da pey.

⁵ Loma ezê êgir bi ser Cihûdayê de bibarînim Ku bircên Orşelîmê daqurtîne.”

Dadbarkirina Îsraêla Bakur

⁶ Xudan wiha dibêje: “Ji bo sê-çar û zêdetir neheqiyên gelê Îsraêl, Ezê cezayê wan ranekim. Ew rastan ji bo pere, Hejaran ji bo cotekî çarox difiroşin.

⁷ Ew serê belengazan di nav toza erdê de diperçiqînin Û bindestan li ser rê dehf didin. Bav û kur diçin heman keça ciwan Û navê min ê pîroz xerab dikin.

⁸ Ew li ba her gorîgehê, Li ser cilê ku gerew hatiye standin radizin. Li mala îlahên xwe, Şeraba ku hatiye bexişandin vedixwin.

⁹ Lê min li ber wan Amorî tune kirin. Tevî ku bilindahiya wan bi qasî dara sedrê Û hêza wan wekî darmaziyê jî bûn, Min li jor fêkiyên wan, Li jêr koka wan ziwa kirin.

¹⁰ Min hûn ji welatê Misrê deranîn Û çil salan li beriyê rêberiya we kir Ku hûn welatê Amoriyan ji xwe re bikin milk.

¹¹ Min ji kurên we hinek pêxember, Ji xortên we hinek kesên veqetandî derxistin. Ya gelê Îsraêl! Ma ne wisa ye?” Ev e gotina Xudan.

¹² “Lê we şerab bi kesên veqetandî dida vexwarin. We li pêxemberan emir dikir û digot: ‘Pêxemberiyê nekin.’

¹³ “Çawa ku erebeya bi lodên dexlê tije, erdê didewisîne, Ezê jî we wisa bidewisînim.

¹⁴ Wê kesê lingsivik nikaribe bireve, Hêzdar hêza xwe nîşan nede, Mêrxas jî canê xwe rizgar neke.

¹⁵ Wê tîravêj li ser lingan nesekine, Lingsivik nefilite, siwar jî canê xwe rizgar neke.

¹⁶ Wê rojê wêrekê mêrxasan Wê çekên xwe bihêle û bireve.” Ev e gotina Xudan.