Nyimbo 89 - Bhukhu la Kuyamba

Masikili ya Etani mu Ezirahi

¹ Nin'zayimba bzantsisi za Chawuta kufika lini nalini! Namulomo wangu nin'zadziwisa kukhulupilika kwanu kumibadwe yentse.

² Pakuti niniti, “Ntsisi zanu zin'khazikisiwa kufika lini nalini, kukhulupilika kwanu mun'zakukhazikisa kudzulu.”

³ Imwe mudati, “Ndidachita chibvano nawakusankhuliwa wangu, ndidalumbila kwa Dhaveti mulanda wangu kuti,

⁴ ‘Nin'zakhazikisa m'badwe wako kufika lini nalini, nin'zamanga mpando wako wawumambo kwamibadwe yentse.’ ” Selah.

⁵ Lekani kudzulu kudumbize bzidabwiso bzanu, imwe Chawuta! Kukhulupilika kwanu pansonkhano wawakuyela!

⁶ Ko mbani kumitamboko angalinganiziwe na Chawuta? Mbani pakati pawana waamilungu aninga Chawuta.

⁷ Mulungu an'njenjemelesa pansonkhano wawana wawakuyela, an'gopsa padzulu pawentse adamuzungunuka.

⁸ Imwe Chawuta Mulungu wawankhondo! Mbani nkulu ninga imwe Chawuta? Kukhulupilika kwanu kudakuzungunukani.

⁹ Imwe muntonga kukukuma kwanyanja; mabimbi yache yakasumuka, imwe muniyanyamaliza.

¹⁰ Imwe mudaphwanya Rahabhi ninga chitanda, mudamwaza azondi wanu nam'phamvu zajanja lanu.

¹¹ Kudzulu nkwanu, pantsi mpanu pomwe, dziko nabzentse bzidadzalamo ndimwe mudalenga.

¹² Kudzulu nakunyantsi ndimwe mudalenga, Tabhori na Herimoni bzinsekelela mudzina lanu.

¹³ Muna janja lina mphamvu, janja lanu nilakulimba, janja lanu ladidi linkuziwa.

¹⁴ Kulungama nakulinganiza ndiyo matsinde yampando wanu, ntsisi nakukhulupilika bzin'gumana patsogolo panu.

¹⁵ Niwakudala wanthu an'dziwa kukuwa kwakusekelela feshita, anfamba mumwenje wapamaso panu, imwe Chawuta,

¹⁶ ansekelela mudzina lanu ntsiku yentse, muchilungamo chanu ankuziwa.

¹⁷ Pakuti ndemela yamphamvu zawo ndimwe, nakukomedwa kwanu nyanga yathu inkuziwa.

¹⁸ Pakuti nchinjilizo niya Chawuta, mambo wathu wa Wakuyela wa Izraeli.

Bzidatsimikiziwa Dhaveti na Mulungu

¹⁹ Kale-kale imwe mukhalewa-lewa m'masomphenya, kwawantsisi wanu muchiti, “Ndidayikha thandizo kwawuyo ana mphamvu, ndakuza uyo adasankhuliwa muwanthu.

²⁰ Ndawona Dhaveti mulanda wangu, namafuta yangu yakuyela ndidamudzodza;

²¹ kuti janja langu likhazikike payiye, janja langu limulimbise.

²² N'zondi an'zamukunda lini, wakuyipa an'zamuchepsa lini.

²³ Nin'zaphwanya azondi wake pamaso pake, ndichizaswa awo animuzonda.

²⁴ Kukhulupilika kwangu nantsisi zangu bzin'zakhala nayiye, mudzina langu nyanga yake in'zakuziwa.

²⁵ Nin'zayikha janja lake panyanja, janja lake ladidi patukamadzi.

²⁶ Iye an'zati an'zachemelela kwayine adati, ‘Imwe ndimwe apayi wangu Mulungu wangu, namwala wachipulumuso changu.’

²⁷ Pomwe nin'zamuchita mwana wangu wakuyamba, nyakudzulu-dzulu wamazimambo yentse yapantsi.

²⁸ Ntsisi zangu nin'zamuchengetela kufika lini nalini, chibvano changu chin'zakhulupilika payiye.

²⁹ Nin'zakhazikisa m'badwe wake kufika lini nalini, nampando wake ninga ntsiku zakudzulu.”

³⁰ “Peno wana wake akataya mafundiso yangu, akaleka kuteyeza matongelo yangu,

³¹ akatyola malango yangu, akaleka kuteyeza mitemo yangu,

³² namphsimbo, nin'zaalangila bzakuyipa bzawo, namichamu, kutaza kwawo.

³³ Koma nin'zachosa lini ntsisi zangu payiye, nin'zanama lini pakukhulupilika kwangu.

³⁴ Nin'zaphwanya lini chibvano changu, nin'zasandula lini mafala yan'choka pamilomo yangu.

³⁵ Kabodzi kokha ndidalumbila nakuyela kwangu, nin'zalewa lini bzakunama kwa Dhaveti.

³⁶ M'badwe wake un'zakhala kufika lini nalini, mpando wake un'zakhala ninga dzuwa pamaso pangu.

³⁷ Ninga mwezi un'zakhazikisiwa kufika lini nalini, umboni wakukhulupilika kumitambo.” Selah.

Pemphelo lakulila kukundiwa kwamambo

³⁸ Koma imwe mwamutaya, muchimulamba, mudadzala nawukali kwawakudzodzewa wanu.

³⁹ Mudafudza chibvano chanu namulanda wanu, mudapsipisa ngundu yake m'mataka.

⁴⁰ Mudaphwanya mipanda yake yentse, mudasiya mbuto zake zakuchinjilizika zawa mathele.

⁴¹ Wentse ampita napamwepo ampamba bzinthu bzake, wakhala wakunyozeka kwaanzake.

⁴² Mudasumusa janja ladidi laazondi wake, mudakondwesa azondi wake wentse.

⁴³ Yinde, mudapindimula mbali yabhemba lake, mulibe kumuyimisa munkhondo.

⁴⁴ Mudamaliza ndemela yake, mudathusila pantsi mpando wake.

⁴⁵ Mudachepesa ntsiku zawubwana wake, mudamugwanila namanyazi. Selah.

Pemphelo lakukumbila chipulumuso

⁴⁶ Ko kufika lini nalini imwe Chawuta, mubzibise kufika lini nalini? Ukali wanu unfika lini uchigaka ninga moto?

⁴⁷ Kumbukilani, kuchepa kwanthawe yangu! Mudalengela wanthu wentse papezi!

⁴⁸ Nimunthunyi anilalama achizaleka kufa? Mbani angapulumuse moyo wake kujanja layimpfa? Selah.

⁴⁹ Imwe Mfumu, ko ntsisi zanu zakale zili kuponi? Zile zamudalumbila kwamulanda wanu Dhaveti mukukhulupilika kwanu?

⁵⁰ Kumbukilani, imwe Mfumu kunyozewa kwaalanda wanu! Kutakula kwanin'chita manyozo yawanthu wentse,

⁵¹ yaaninyoza azondi wanu, imwe Chawuta, yaan'nyoza nzayo zawakudzodzewa wanu.

⁵² Chawuta ngaadalisiwe kufika lini nalini! Ameni na Ameni!