Nyimbo 77 - Bhukhu la Kuyamba

Pemphelo lakukumbila kunyamaliziwa panthawe yakushupika

Kwanyakuyimbisa: kuteyeza pa Jedhutuni. Nyimbo ya Asafi.

¹ Niniwongota kwa Mulungu, niniwongota kwa Mulungu, pomwe aninibva.

² Muntsiku yakushupika kwangu nin'psaga Mfumu, usiku nin'thamula janja, nin'neta lini, moyo wangu unilamba kunyamaliziwa.

³ Ninkumbukila, Mulungu nim'buwula, paninilingilila, n'zimu wangu um'mala mphamvu. Selah.

⁴ Mum'phata bzikope bzangu kuti bzileke kuphophoma, ndashupika bzakutaza kulewa-lewa.

⁵ Ninkumbuka ntsiku zakale, magole yakale kale.

⁶ Ninti, nin'zakumbukila nyimbo yangu usiku, nin'zalingilila ndichipsaga-psaga n'zimu wangu.

⁷ Ko Mfumu wanditaya kufika lini nalini? Ko an'zandikomela lini ntima pomwe?

⁸ Ko ntsisi zake zalini nalini zamalilatu? Ko fala lake lamala kum'badwe nam'badwe?

⁹ Ko Mulungu wayebwelatu kukoma ntima? Ko iye muwukali wake wafungila chifundo chake? Selah.

¹⁰ Ine ninti, “Nichinthu chininiwawa, kuti janja ladidi la Nyakudzulu-dzulu lasanduka.”

¹¹ Nin'zakumbukila mabasa ya Chawuta! Yinde, nin'zakumbukila bzidabwiso bzanu bzakale.

¹² Nin'zalingilila mabasa yanu yentse; ndichikumbuka mabasa yanu yamphamvu!

¹³ Njila yanu, imwe Mulungu niyakuyela! Nimulungu mponi nkulu, ninga Mulungu wathu?

¹⁴ Ndimwe Mulungu mun'chita bzidabwiso! Mudawonesa mphamvu zanu pakati pawanthu.

¹⁵ Mudalombola wanthu wanu namphamvu zajanja lanu, wana wa Jakobho na Jozefi. Selah.

¹⁶ Madzi payadakuwonani, imwe Mulungu! Madzi payadakuwonani, yadapuluputa! Yinde, boo lidatetemela!

¹⁷ Mitambo idathulula madzi; kumitambo kudalilima, misewe yanu idachetuma mbali zentse.

¹⁸ Kuphoka kwampheni zanu kukhali mukabvuli-bvuli, mpheni zanu zidawinika dziko, dziko lidatetemela lichitekenyeka.

¹⁹ Njila yanu ikhapita namunyanja, njila yanu ikhapita nam'madzi mazinji, koma nzayo zanu zikhawoneka lini.

²⁰ Mudatsogolela wanthu wanu ninga mabila, najanja la Mozisi na Aroni.