Nyimbo 72 - Bhukhu la KuyambaKupemphelela mambo Nyimbo ya Solomoni. 1 Imwe Mulungu pasani mambo kulinganiza kwanu! Mwana wamambo chilungamo chanu! 2 Lekani atonge wanthu wanu muchilungamo, pomwe ngaatonge amphayi mwakulinganiza! 3 Lekani mapili yakhale nakusumukila kwawanthu! Mitunthu ikhalembo nachilungamo! 4 Lekani atonge amphayi nkati mwawanthu! Apulumuse wanthu alibe chaanacho! Aphwanye anyakupondelela! 5 Lekani wanthu agope imwe, malinge dzuwa lichiwinika! Malinge mwezi uchiwinika kumibadwe yentse! 6 Lekani agwe ninga mvula in'bvumba pawupsa udagwatililiwa bwino-bwino! Ninga mvula in'bvumba ichithiliza pantsi! 7 Lekani wakulungama awande muntsiku zake! Lekani unyinji wan'delekho uwande, kufikila kukhale kulibe mwezi! 8 Lekani atonge kuchoka kunyanja kafika kunyanja! Kuchoka kukamadzi kafika kumpelela dziko! 9 Lekani mishowo yamuchipululu imugodamile! Anyangute pantsi! 10 Lekani mazimambo yaku Tashishi nambuto zakumphepete kwamadzi zipeleke mitelo kwayiye! Mazimambo yaku Shebha naku Sebha yabwelese mpfupo! 11 Lekani mazimambo yentse yamukotamile! Madziko yentse yamuphatile basa! 12 Pakuti wakushupika akachemelela, iye aniwapulumusa, pomwe an'chiza amphayi alibe n'thandizi. 13 Ankomela ntima amphayi nawakushupika, an'chiza umoyo wawanthu alibe chaanacho; 14 anilombola moyo wawo kuchoka mukupondelelewa nakunkhondo, pakuti gazi lawo nilantengo wapadzulu m'maso mwake. 15 Lekani alalame! Mpaseni golidhe ya Shebha! Lekani ampemphelele nthawe zentse! Lekani adalisiwe ntsiku yentse! 16 Lekani dziko likhale nachakudya chizinji! Padzulu pamapili padzale mbewu! Kuchita ninga michelo yaku Lebhanoni. Lekani wanthu atambalale maguta, ninga upsa wam'mathengo! 17 Lekani dzina lake likhale kwalini nalini! Mbili yake iwepo ninga kukhala kwadzuwa! Lekani wanthu adalisiwe mwayiye! Lekani mishowo yentse imuti, Wakudalisiwa! 18 Ngaadalisiwe Chawuta Mulungu, Mulungu wa Izraeli! Iye yekha an'chita bzidabwiso! 19 Dzina lake landemela lidalisiwe kufika lini nalini! Ndemela yake idzadze dziko lentse! Ameni! Ameni! 20 Mapemphelo ya Dhaveti mwana wa Jese yamalila pano. |
Bhaibheri reChikunda © Bible Society of Zimbabwe
Bible Society of Zimbabwe