Nyimbo 66 - Bhukhu la Kuyamba

Nyimbo yakupembeza nakutenda

Kwanyakuyibisa. Nyimbo.

¹ Imbilani Mulungu nafala lakukondwa dziko lentse!

² Imbilani ndemela yadzina lake! Mpaseni dumbizo lawulemelelo wake!

³ Uzani Mulungu kuti, nkugopsa lini kumweko kwamabasa yanu! Mphamvu zanu n'zikulu kwene-kwene, azondi wentse ankutetemelani achigopa.

⁴ Dziko lentse linkukotamilani, lichikupembezani, aniyimba nyimbo achidumbiza imwe, aniyimba nyimbo achidumbiza dzina lanu. Selah.

⁵ Bwelani muwone bzidachitiwa na Mulungu! Nkugopsa lini kumweko kwamabasa yake kwawana wawanthu.

⁶ Adasandula nyanja kuyichita mbuto yakuwuma, wanthu achiyambuka kamadziko nanzayo. Pamwepo tidakondwa mwayiye.

⁷ Antonga nam'phamvu zake kwalini nalini. Maso yake yankhala yachinyangana madziko, anyakupanduka ngaaleke kubzikuza. Selah.

⁸ Wanthu mwentse dalisani Mulungu wathu! Lekani fala lakun'dumbiza libveke!

⁹ Adatifuwa pakati pawanthu, alibe kuleka minyendo yathu ichipsedemuka.

¹⁰ Pakuti imwe Mulungu mudatiyesa, mudatichenesa ninga kuchenesa kun'chitiwa siliva.

¹¹ Mudatibwelesa muwukonde, mudatipasa nyathwa kumisana yathu.

¹² Mudalekelela wanthu achimbakwila pamisolo yathu, tidapita m'moto nam'madzi, koma mudazatibwelesa kumbuto yampfumba.

¹³ Nin'zabwela munyumba yanu nantsembe zakutentha, ndichichita bzandidalumbila.

¹⁴ Bzile bzandidalewa namilomo yangu, bzandidalewa namulomo wangu pandikhali munthamu.

¹⁵ Nin'zapeleka kwayimwe ntsembe zakutentha zakunenepa, nawutsi wantsembe yamikono yamabila. Nin'zapeleka pomwe ntsembe zang'ombe nambuzi. Selah.

¹⁶ Imwe mwentse mun'gopa Mulungu, bwelani mubve! Pomwe nin'zakuwuzani bzaadachita kumoyo wangu!

¹⁷ Ndidachemelela kwayiye, ndichimupembeza nalilimi langu.

¹⁸ Ninga ndidachengeta chakuyipa chamuntima mwangu, Mfumu ninga alibe kundibva.

¹⁹ Chadidi Mulungu adanditetekela, adabva pemphelo lakulila kwangu.

²⁰ Mulungu ngaadalisiwe, pakuti alibe kulamba pemphelo langu, panango kuchosa ntsisi zake kwayine.