Nyimbo 48 - Bhukhu la Kuyamba

Ziyoni guta la Mulungu

¹ Chawuta ninkulu anfunika kudumbiziwa kwene-kwene, muguta la Mulungu wathu! Muphili lake lakuyela,

² nilakukoma pakuyima kwalene, chikondwelelo chadziko lentse lapantsi. Phili la Ziyoni, chakudzulu, guta la mambo nkulu.

³ Mulungu, mumbuto zake zakuchinjilizika, adabziwonesa kuti ndiye an'chinjiliza.

⁴ Tsapano wonani, mazimambo yankochezana pabodzi, kuzayambuka pabodzi.

⁵ Adaliwona adabva mantha, adabva mantha, nkuthawa.

⁶ Adaphatiwa namantha achiyamba kutetemela, kuchita ninga nkazi akufuna kubala.

⁷ Nachonzi chakumabveladzuwa mudaphwanya mabote makulu yaku Tashishi.

⁸ Ninga kubva kwatidachita, tabziwona, muguta la Chawuta Wankhondo, muguta la Mulungu wathu, Mulungu an'zachita kufika lini nalini.

⁹ Tinkumbuka, imwe Mulungu, ntsisi zanu, nkati mwa Tembele yanu.

¹⁰ Kuchita ninga dzina lanu imwe, Mulungu, kudumbiziwa kwanu kunfika kudamalila dziko. Janja lanu ladidi lidadzala nakulungama.

¹¹ Lekani phili laku Ziyoni likondwe! Lekani wana wachikazi wa Judha akondwe, nathangwe lakutonga kwanu!

¹² Zungunukani Ziyoni! Zungunukani! Welengani madala yayene!

¹³ Leka ntima wako uwone kuchinjilizika, pitani mumbuto zake zakubzichinjiliza, kuti muzawuzembo m'badwe um'bwela,

¹⁴ pakuti uyu ni Mulungu wathu, kufika lini nalini, an'zatitsogolela kufika kufa.