Nyimbo 46 - Bhukhu la Kuyamba

Mulungu ana yise

¹ Mulungu ndiye pakubisalila pathu namphamvu zathu, an'khala thandizo lathu latin'diza kuwona panthawe yakushupika.

² Ne dziko likatekenyeka tin'gopa lini, ne mapili yakagwela munyanja tin'gopa basi,

³ ne madzi yamunyanja yawunge yachichita phobvu, mapili yachitekenyeka nakukukuma kwayene. Selah.

⁴ Pana kamadzi natunkulo tum'bwelesa kukondwa kuguta la Mulungu, kumbuto yakuyela ya Nyakudzulu-dzulu.

⁵ Mulungu ali nkati mwagutalo, lin'zatekenyesewa lini, Mulungu am'bwela machibese-bese achilithandiza.

⁶ Mishowo ikubva mantha, umambo unigwa, anilewa-lewa fala lake, dziko linsunguduka.

⁷ Chawuta Wankhondo ana yise, Mulungu wa Jakobho nipakubisala pathu. Selah.

⁸ Bwelani muzawone mabasa ya Chawuta! Kucheneka dziko kwawachita!

⁹ Aniyimisa nkhondo kufika kudamalila madziko, an'tyola utati achigwata-gwata madipa, antentha ngolo zankhondo namoto!

¹⁰ “Nyamalani, pomwe dziwani kuti ndine Mulungu! Nin'zasumusiwa pakati pamishowo, nin'zasumusiwa padziko.”

¹¹ Chawuta Wankhondo ana yise, Mulungu wa Jakobho nipakubisala pathu. Selah.