Nyimbo 44 - Bhukhu la Kuyamba

Kwanyakuyimbisa. Masikili yawana wa Khora

¹ Mulungu, tidabva namakutu yathu, bzaakhatiwuza makholo yathu; Bzinthu bzamudachita, muntsiku zawo, muntsiku zakale;

² pomwe imwe najanja lanu mudaatolela dziko wamishowo, mudaabzala m'mwemo; Mudacheneka mishowoyo, koma makholo yathu mudaatsudzula.

³ Wanthu wanu alibe kutola madziko yamweyo nabhemba lawo, panango kubzichiza najanja lawo; Koma najanja lanu ladidi, nam'phamvu zajanja lanu, pakuti muniwafuna.

⁴ Pakuti imwe ndimwe mambo wangu na Mulungu wangu, lekani Jakobho awone chipulumuso!

⁵ Mwayimwe tinkunda azondi wathu, mudzina lanu timponda-ponda antimukila.

⁶ Pakuti nin'themba lini utati wangu, pomwe bhemba langu linin'chiza lini.

⁷ Koma imwe mudatichiza kwaazondi wathu, pomwe muchinyazisa antizonda.

⁸ Mulungu tinsamwa mwayimwe ntsiku yentse, tichipeleka kutenda kudzina lanu kufika lini nalini. Selah.

⁹ Koma imwe mwatitaya, mwatifumula; mulibe kuyenda nawankhondo wathu.

¹⁰ Mudachita kuti tithawe azondi wathu, pomwe awo antizonda adatipambila bzentse bzatikhanabzo.

¹¹ Mudachita kuti tikhale chakudya ninga mabila, muchitimwaza nkati mwawanthu wamishowo.

¹² Mudagulisa wanthu wanu nantengo wapantsi kwene-kwene, ne kulewambo ntengo wapadzulu.

¹³ Mudatichita chinthu chin'nyantsa kumadziko yakhali pafupi nayise, tidanyozewa tichisekewa nawentse adatizungunuka.

¹⁴ Mudatichita fala lamanyozo kumishowo ikhali pakati pathu, chiseko kwawanthu wentse.

¹⁵ Ntsiku yentse kunyala kuli patsogolo pangu, nkhope yangu yadzala namanyazi,

¹⁶ kuchokela kwawanthu wakundinyoza achindiseka, nathangwe laazondi wangu nakubwezela.

¹⁷ Ibzi bzentse bzatifikila, koma ise tilibe kukuyebwani, panango kuphwanya chibvano chatidachita nayimwe.

¹⁸ Mitima yathu ilibe kukulinzani ngoto, nzayo zathu zilibe kuchoka munjila yanu.

¹⁹ Koma imwe mudatiphwanya-phwanya pakati pabzilombo, mudatigwanila nan'thunzi wayimpfa.

²⁰ Peno tidayebwa dzina la Mulungu wathu, panango kupfuthula manja yathu kwaamilungu wachilendo,

²¹ ko Mulungu saakhadabzisokolola? Pakuti iye an'dziwa bzakubisika bzamuntima mwathu.

²² Nathangwe lanu ise tikuphewa ntsiku yentse, kuchitiwa ninga mabila yanfuna kuphewa.

²³ Mfumu wangu, lamukani! Thangwe lanyi mukugona? Lamukani! Lekani kutitayilatu!

²⁴ Thangwe lanyi mukubisa nkhope yanu? Ko thangwe lanyi mukuyebwa kudzudzika kwathu, nakupondelelewa kwathu?

²⁵ Pakuti moyo wathu wakotamisiwa pantsi mupfumbi, mimba zathu zamamatila pantsi.

²⁶ Sumukani thandizo lathu! Pomwe tipulumuseni thangwe lantsisi zanu!