Nyimbo 42 - Bhukhu la Kuyamba

Kwanyakuyimbisa. Masikili yawana wa Khora

¹ Ninga nyasa kutopa kwaan'chita madzi yamutukamadzi, n'zimu wangu untopa, imwe Mulungu.

² N'zimu wangu una nyota nayimwe Mulungu, imwe Mulungu wamoyo. Ko nin'zabwela lini kuzawona, nkhope yanu Mulungu?

³ Misozi ndiyo chakudya changu, usiku namasikati, Ntsiku yentse anin'bvunza kuti, “Ko Mulungu wako ali kuponi?”

⁴ Ninkumbuka bzinthu bzimwebzi, ndichithulula n'zimu wangu mwayine, ndichiyenda nagunyenye lawanthu, ndichiwantsogolela, kunyumba ya Mulungu achichemelela achikondwa, achiyimba nyimbo zakutenda, wanthu azinji achisekelela feshita.

⁵ Ko thangwe lanyi kukotama, iwe moyo wangu? Thangwe lanyi kushupika nkati mwangu? Dikhila Mulungu, pakuti nin'zapeleka pomwe kutenda kwayiye, chipulumuso changu.

⁶ Mulungu wangu. Moyo wangu wakotama nkati mwangu, nakutenepo nin'zakukumbukani kuchokela kudziko la Jorodhani, naku Herimoni, kuphili la Mizari.

⁷ Boo lin'chemelela kulinango boo, pakulilima kwamapopoma yanu yamadzi, mabimbi namayape-yape yanu, bzandifuchila.

⁸ Chawuta aniwuza ntsisi zake masikati, usiku niniyimba nyimbo yake, pemphelo kwa Mulungu wawumoyo wangu.

⁹ Ninti kwa Mulungu, mwala wangu: “Thangwe lanyi mwandiyebwa? Ko thangwe lanyi ninfamba ndichilila, nathangwe lakupopondelelewa naazondi wangu?”

¹⁰ Nin'chita ninga ndina chilonda m'mabondo yangu, azondi wangu akundinyoza adati kwayine ntsiku yentse: “Mulungu wako ali kuponi?”

¹¹ Ko thangwe lanyi kukotama, iwe moyo wangu? Thangwe lanyi kushupika nkati mwangu? Dikhila mwa Mulungu, pakuti nin'zapeleka pomwe kutenda kwayiye, chipulumuso changu.