Nyimbo 40 - Bhukhu la Kuyamba

Kwanyakuyimbisa. Nyimbo ya Dhaveti

¹ Ndidayimila Chawuta namaso mawili, adanditetekela adabva kulila kwangu.

² Adandichosa mudindi liniwunga, lina matope. An'chita kuti minyendo yangu iyime pamwala, achichita kuti nzayo zangu zikhazikike.

³ Adayikha nyimbo inyowani nkamwa mwangu, nyimbo yakudumbiza kwa Mulungu wathu. Azinji an'zawona achizagopa, achizathemba na Chawuta.

⁴ Niwakudala munthu an'chita Chawuta, chikhulupililo chake. Uyo ansaya kupatukila kwawakubzikuza, kwaawo antayikila kumagunkha.

⁵ Imwe Chawuta Mulungu wangu, mwawandisa bzidabwiso bzanu, nankhumbukila zanu kwayise, palibe angalingane nayimwe! Nin'zalalikila ndichizalewa, m'bzizinji kuposa bziniwelengeka.

⁶ Ntsembe nampfupo mum'bzifuna lini, koma imwe mwandipasa khutu lakufunguka. Ntsembe zakutentha nantsembe zakupagali, mulibe kubzikumbila.

⁷ Nakutenepo ine ndidati, “Yinde ndabwela, mubhuku lamitemo mudanembewa nabzangu.

⁸ Ninkondwa kuchita kufuna kwanu, imwe Mulungu wangu, ntemo wanu uli muntima mwangu.”

⁹ Ndidalalikila mafala yachipulumuso chanu, mugunyenye likulu, ndilibe kuphata milomo yangu, imwe Chawuta mun'dziwa.

¹⁰ Ndilibe kubisa mafala yakulungama kwanu muntima mwangu, ndidalewa-lewa nabzakukhulupilika kwanu, nachipulumuso chanu. Ndilibe kubisa ntsisi zanu, nakukhulupilika kwanu kugunyenye likulu.

¹¹ Lekani, imwe Chawuta kubweza chifundo chanu kuchoka payine, Ntsisi zanu nakukhulupilika kwanu bzinin'chengeta nthawe zentse.

Pemphelo lakufuna thandizo

¹² Pakuti kushupika kwandizungunuka, bziniwelengeka lini, bzakuyipa bzangu bzandikulila, ninkwanisa lini kuwona. Bzidawanda kupita tsitsi lansolo wangu, pomwe ndataya nantima wangu.

¹³ Chawuta kondwani nakundipulumusa, Chawuta kulumizani kundithandiza.

¹⁴ Ngaanyazisiliwetu, pomwe azungayile! Awo wentse ampsaga kutola umoyo wangu. Abwezewe kumbuyo pomwe afumuliwe, awo wanthu anfuna kundipweteka kwangu.

¹⁵ Ngaakankhamuke nathangwe lakunyazisiwa kwawo, awo aniti payine, “Aha, aha!”

¹⁶ Awo wentse ankupsagani, ngaasekelele pomwe akondwe mwayimwe, awo anfuna chipulumuso chanu, ngaapitilize kulewa kuti, “Chawuta ninkulu.”

¹⁷ Koma ine ndine mphayi, pomwe ninsaya, Mfumu aninkumbuka. Ndimwe thandizo langu nachipulumuso changu. Lekani kuchedwa Mulungu wangu.