Nyimbo 39 - Bhukhu la Kuyamba

Kwanyakuyimbisa: kwa Jedhutuni. Nyimbo ya Dhaveti

¹ Ndidati, “Nin'zachengeta njila zangu, kuti ndileke kutaza nalilimi langu. Nin'zachengeta mulomo wangu, malinge wanthu wakuyipa ali patsogolo pangu.”

² Ndikhali chimumumu, wakunyamala, ndidabziphata papezi. Nyathwa yangu yakulilatu,

³ ntima wangu udaphsa nkati mwangu. Pandikhayankha mwawu ntima wangu udagaka moto, pamwepo ndidalewa-lewa nalilimi langu.

⁴ Chawuta lekani ndidziwe kumala kwangu, nakuwanda kwantsiku zangu, lekani ndiziwe kuchepa nthawe kwangu.

⁵ Wonani, mudachita kuti ntsiku zangu zikhale ninga kutalimpha kwajanja langu, nanthawe yawumoyo wangu nichinthu lini patsogolo panu. Chadidi munthu wentse nimpuye basi! Selah.

⁶ Chadidi munthu anfamba ninga chibvuli-bvuli. Chadidi papezi an'khala kaliki-liki, an'gwezeka, koma an'dziwa lini kuti mbani an'zatakula.

⁷ Ko tsapano Mfumu n'chinyi chanin'dikhila? Chinyanganilo changu chili mwayimwe.

⁸ Ndipulumuseni pakutaza kwangu kwentse, lekani kundichita chakusekewa namalombe.

⁹ Ndine chimumumu, ninfungula lini mulomo wangu, pakuti ndimwe mudabzichita.

¹⁰ Chosani chitenda chanu payine, ndamala nabzizondo bzajanja lanu.

¹¹ Pamunilanga munthu, muchimutsimula pachakuyipa, munimunya ninga n'chenje chentse chaanfunisisa, chadidi munthu wentse n'chapezi! Selah.

¹² Ibvani pemphelo langu, imwe Chawuta tetekelani kulila kwangu, lekani kunyamala pamisozi yangu. Pakuti ndine nyakubwela wanu, nyakupita nanjila ninga azipayi wangu wentse.

¹³ Ndilekeni kuti ndiwoneko kukondwa, ndinati ndachoka ndichizasaya kuwoneka pomwe.