Nyimbo 33 - Bhukhu la Kuyamba

Nyimbo yakupembeza

¹ Kuwani muchikondwa mwa Chawuta imwe wakulungama! Kudumbiza kunkomela awo wakukonkholoka.

² Tendani Chawuta nachipendani! Mupembezeni nagitale lina mawaya khumi!

³ Imbani kwayiye nyimbo inyowani! Lizani mwaluso gitale muchikuwa!

⁴ Pakuti fala la Chawuta nilakukonkholoka, pomwe basa lake lentse lin'chitiwa mwachikhulupililo.

⁵ Anfuna chilungamo nakulinganiza, ntsisi zake zin'dzadza dziko lentse.

⁶ Nafala la Chawuta, kudzulu kudalengewa, pomwe nampuye wamulomo wake, bzentse bzakudzulu bzidalengewa.

⁷ Adakocheza madzi yamunyanja kuyachita mudwi, adayikha maboo yamadzi m'magwangwa.

⁸ Dziko lentse ngaligope Chawuta, lekani wanthu wentse wamudziko ayime amutetemele!

⁹ Pakuti adalewa-lewa, pomwe dziko lidakhalapo, adalewa, ibzo nkuyima.

¹⁰ Chawuta ansayisa basa nzelu zawamadziko, antazisa bzinkumbuka wanthu.

¹¹ Nzelu za Chawuta zin'khala kufika kwalini nalini, bzinkumbuka ntima wake bzin'khala kufika kumibadwe yentse.

¹² Niwakudala nshowo uwo Mulungu wawo ni Chawuta, wanthu waadasankhula kukhala nthaka yake!

¹³ Kuchoka kudzulu, Chawuta aninyangana pantsi, aniwona wana wawanthu wentse.

¹⁴ Kuchoka pampando wake wakutonga aninyangana wanthu wentse an'khala padziko.

¹⁵ Ndiye ankonza mitima yawo wentse, an'dziwa bzentse bzaan'chita.

¹⁶ Kulibe mambo an'chiziwa nakukula kwankhondo yake, wankhondo ampulumusiwa lini nam'phamvu zake.

¹⁷ Hachi lankhondo nichikhulupililo chapezi pakukunda nkhondo, pomwe mphamvu yalene lin'chiza lini.

¹⁸ Diso la Chawuta lili paawo animugopa, paawo an'nyanganila muntsisi zake,

¹⁹ kuti apulumuse umoyo wawo kuyimpfa, achiwalalamisa panthawe yanjala yamudziko.

²⁰ N'zimu wathu uniyimila Chawuta, ndiye thandizo lathu nanchinjilizo.

²¹ Yinde, ntima wathu unkondwa mwayiye, pakuti tin'themba nadzina lake lakuyela.

²² Lekani ntsisi zanu imwe Chawuta, zikhale payise, ne patinyanganila kwayimwe.