Nyimbo 29 - Bhukhu la Kuyamba

Nyimbo ya Dhaveti

¹ Pelekani kwa Chawuta, imwe wana wa Mulungu, pelekani kwa Chawuta ndemela namphamvu.

² Pelekani kwa Chawuta ndemela yadzina lake, kotamilani Chawuta musilile mbuto yake yakuyela.

³ Fala la Chawuta lili padzulu pamadzi, Mulungu wa ndemela anililima, Chawuta ali padzulu pamadzi mazinji.

⁴ Fala la Chawuta lina mphamvu, fala la Chawuta lidadzala nakulemekezeka.

⁵ Fala la Chawuta likutyola misidhari, Chawuta adatyola-tyola misidhari yamu Lebhanoni.

⁶ Adayichita kuti imoge-moge ninga mwana wang'ombe, Lebhanoni na Siriyoni, ninga mwana wanyati.

⁷ Fala la Chawuta likuchetuma malilimi yamoto.

⁸ Fala la Chawuta lintekenyesa chipululu, Chawuta antekenyesa chipululu cha Kadheshi.

⁹ Fala la Chawuta lintekenyesa miti yamioki, limpulula masamba yamiti mu Tembele yake wentse aniti, ndemela!

¹⁰ Chawuta an'zakhala padzulu pamadzi yagumbula, Chawuta an'zakhala mambo kufika lini nalini.

¹¹ Chawuta an'zapasa mphamvu kwawanthu wake, Chawuta an'zadalisa wanthu wake nankhalo.