Nyimbo 27 - Bhukhu la Kuyamba

Kwa Dhaveti

¹ Chawuta ndiye mwenje wangu nachipulumuso changu, ko mbani wandingagope? Chawuta ndiye mbuto yakuthawila, yawumoyo wangu, ko mbani wandingagope?

² Wanthu wakuyipa paaninfikila, kuti adye nyama yangu, akapondo wangu naazondi wangu, an'dzedzeleka achigwa.

³ Ne akandizungunuka, ntima wangu un'zagopa lini, Ne nkhondo ikandimukila, nin'zathemba nayimwe.

⁴ Chinthu chibodzi chandakumbila kwa Chawuta, chanimpsaga, kuti ndizakhale munyumba ya Chawuta kwawumoyo wangu wentse, kuti ndiwone kukoma ntima kwa Chawuta, kuti ndibvunze mu Tembele yake.

⁵ Pakuti an'zachinjiliza mumbuto yake yakuthawila, pantsiku yakushupika. An'zandibisa mutenti yake, achindiyikha padzulu pamwala.

⁶ Tsapano nsolo wangu un'zasumusiwa, padzulu paazondi wangu adandizungunuka, nin'zapeleka ntsembe mutenti yake, ntsembe namafala yakukondwa. Nin'zayimba ndichipembeza Chawuta.

⁷ Chawuta ibvani fala langu panin'chemela, ndikomeleni ntima, mundidayile!

⁸ Ntima wangu uniti kwayimwe, “Nin'zapsaga nkhope yanu, imwe Chawuta!” Ntima wangu uniti kwayimwe, “Nimpsaga nkhope yanu Chawuta.”

⁹ Lekani kubisa nkhope yanu kwayine. Lekani kubweza mulanda nawukali wanu, pakuti ndimwe thandizo langu. Lekani kunditaya panango kundilamwa, Mulungu wachipulumuso changu!

¹⁰ Apayi naamayi anditaya, koma Chawuta aninilokota.

¹¹ Ndifundiseni njila yanu, Chawuta! Nditsogoleleni munjila yanu yakuthasama, thangwe laazondi wangu.

¹² Lekani kundipeleka kwaazondi wangu, pakuti mboni zakunama zandimukila, pomwe niwabefu nandewo.

¹³ Ninga ndilibe kukhulupilila kuwona ubwino wa Chawuta, padziko lawanthu wamoyo.

¹⁴ Dikhila Chawuta, limba, wonesa mphamvu! Yimila Chawuta.