Nyimbo 25 - Bhukhu la Kuyamba

Nyimbo ya Dhaveti

¹ Kwayimwe Chawuta, nin'zasumusa n'zimu wangu!

² Mulungu wangu, mwayimwe nin'themba! Lekani kundilekelela ndichinyala; lekani kuti azondi wangu asekelele!

³ Chadidi, wentse ankukhulupililani ngaaleke kunyala, koma wentse ankupandukilani an'zanyala.

⁴ Chawuta ndidziwiseni njila zanu, ndifundiseni njila zanu.

⁵ Nditsogoleleni muchadidi chanu, mundifundise, pakuti ndimwe Mulungu wachipulumuso changu, nin'choma dzuwa lentse ndichinyanganila kwayimwe.

⁶ Kumbukani chifundo chanu nantsisi zanu, Chawuta! Thangwe lakuti m'bzakale kuchokela lini nalini.

⁷ Lekani kukumbuka kutaza kwapawung'ono wangu. Kuteyeza ntsisi zanu, Chawuta ndikumbukeni, nathangwe lakukoma kwanu.

⁸ Chawuta niwabwino pomwe niwakukonkholoka, nakutenepo anfundisa wakuyipa njila yaanfamba nayo.

⁹ An'tsogolela wakubzichepesa kulinganiza, anfundisa wakubzichepesa njila yake.

¹⁰ Njila zentse za Chawuta nintsisi pomwe n'zakukhulupilika, kwaawo wentse an'chengeta chibvano chake nawufakazi wake.

¹¹ Nathangwe ladzina lanu Chawuta, ndilekeleleni chakuyipa changu pakuti n'chikulu.

¹² Mbani munthu an'gopa Chawuta? An'zafundisa njila yaan'zasankhula.

¹³ Iye pachake an'zakhala muwubwino, wana wake an'zatola dziko kukhala nthaka yawo.

¹⁴ Kuyeluza kwa Chawuta kuna awo animugopa aniwadziwisa chibvano chake.

¹⁵ Nthawe zentse maso yangu yali kwa Chawuta, pakuti ndiye an'tsudzula minyendo kuchoka muwukonde.

¹⁶ Chewukani kwayine, mundikomele ntima, pakuti ndili ndekha pomwe ndikuwawiwa!

¹⁷ Kushupika kwantima wangu kwawanda. Ndichizeni munyathwa zangu!

¹⁸ Nyanganani kudzudzika kwangu nanthamu zangu! Ndilekeleleni bzakuyipa bzangu!

¹⁹ Nyanganani azondi wangu pakuti awanda kwene-kwene, anin'zonda nachizondo chandewo!

²⁰ Chinjilizani umoyo wangu, pomwe mundipulumuse! Lekani kundilekelela ndichinyala, pakuti nimpotela kwayimwe!

²¹ Kukhuma muchikhulupililo nakukonkholoka ngabzindichengete, pakuti nin'nyanganila kwayimwe.

²² Mulungu lombolani Izraeli, mukushupika kwayene kwentse.