Nyimbo 22 - Bhukhu la Kuyamba

Kwanyakuyimbisa. Kuteyeza wabawala. Nyimbo ya Dhaveti

¹ Mulungu wangu, Mulungu wangu! Mwandisiyilanyi? Kuchiziwa kwangu kuli patali namafala yakubuwula kwangu.

² Mulungu wangu ninilila masikati, koma munin'dayila lini; ne usiku nin'nyamala lini.

³ Imwe ndimwe wakuyela, ndimwe mun'khala m'mapembezo ya Izraeli.

⁴ Nayimwe, azipayi wathu adathemba, adathemba, imwe mudaapulumusa.

⁵ Kwayimwe adalila, achichiziwa, nayimwe adathemba, alibe kunyazisiwa.

⁶ Koma ine ndine nkhonye, ndine lini munthu; wakunyozeka kumishowo yawanthu, pomwe wakuchepesewa nawanthu.

⁷ Wentse aniniwona aniniseka, anin'nyonkhola achikwetekwedza misolo yawo.

⁸ “Adakhulupilila Chawuta, ngaamuchize! Lekani amupulumuse, pakuti animufuna!”

⁹ Koma ndimwe mudandibulisa m'mimba, muchichita kuti ndithembe namasuku yaamayi wangu.

¹⁰ Kuchokela pakubaliwa kwangu ndidathusiwa kwayimwe, kuchokela m'mimba mwaamayi, ndimwe mukhali Mulungu wangu.

¹¹ Lekani kukhala kutali nayine, pakuti kushupika kuli pafupi, palibe nyakundithandiza.

¹² Ng'ombe zimuna zizinji zidandizungunuka, nkhunzi zakulimba zaku Bhashani zandizungunuka.

¹³ Andiyashamila milomo yawo, mphondolo ikulila nakung'amba.

¹⁴ Ninga madzi, ndathululiwa, mabondo yangu yentse yati gwojodo, ntima wangu wakhala ninga phula, lanyungudukila muchifuwa mwangu.

¹⁵ Mphamvu zangu zawuma ninga nyaphale, nalilimi langu lanamatila kuntsagwada zangu; pomwe kupfumbi layimpfa mwandisiya kwebve.

¹⁶ Pakuti mbwaya zandizungunuka, chipani chawanthu wakuyipa chandizungunuka, manja yangu naminyendo yangu.

¹⁷ Mabondo yangu yentse ndaakukwanisa kuyawelenga; koma iwo anininyanganisisa, achindiwonesesa.

¹⁸ Ali kugawilana wokha-wokha bzakubvala bzangu, pashango zangu ali kuwombeza.

¹⁹ Chawuta! Lekani kukhala kutali nayine, mphamvu zangu! Kulumizani kuzandithandiza.

²⁰ Pulumusani umoyo wangu kubhemba, kamoyo kangu kokhaka kumbwayazi.

²¹ Ndichizeni nkamwa mwamphondolo, ndidayilenkoni, pakuti ndili pampaniko panyanga zanyati.

²² Nin'zalongosola dzina lanu kwaabale wangu, pakati pawanthu wentse ine nin'zakudumbizani.

²³ Imwe mun'gopa Chawuta, mudumbizeni! Imwe wana wa Jakobho, mulemekezeni! Gopani imwe wana wa Izraeli!

²⁴ Pakuti alibe kunyoza panango kunyantsiwa, nanthamu zawakushupika, Alibe kum'bisila nkhope yake, koma paakhalila, iye adadayila.

²⁵ Thangwe labzamwachitabzi, nin'zakudumbizani nkati mwawanthu azinji, bzandidalumbila nim'bzichita ndili patsogolo pawanthu ankugopani.

²⁶ Wakushupika an'zadya achikhuta, Awo animupsaga an'zamudumbiza Chawuta, ninga andokhala kufika lini nalini.

²⁷ Mapeto yentse yadziko lapantsi yan'zakumbuka, yan'zabwelela kwa Chawuta. Mbumba zentse zamadziko zin'zagodama kumupembeza patsogolo pake.

²⁸ Pakuti umambo ngwa Chawuta, antonga mishowo yentse yapadziko.

²⁹ Wakukhupuka wentse an'zadya achimupembeza, wentse aniyenda kudongo an'zamugodamila, wentse ansaya kukwanisa kukhala wamoyo.

³⁰ M'badwe ubwela un'zakotamila dzina lake, un'zalongosola bza Mfumu kum'badwe um'bwela.

³¹ Un'zalewa bzachipulumuso chake, kwawanthu an'zabadwa, kuti adabzichita chadidi.