Nyimbo 19 - Bhukhu la Kuyamba

Kwanyakuyimbisa.

Nyimbo ya Dhaveti

¹ Kudzulu kuli kulalikila mbili ya Mulungu, kudzuluko kuli kuwonesa padecha basa la Mulungu.

² Ntsiku nantsiku kun'thulula mafala, usiku nawusiku kunilewa kudziwa.

³ Palibe kulewa-lewa, panango fala kubveka.

⁴ Koma mafala yawo yanfika pantsi pentse. Fala lawo linfika kum'malila dziko lentse, kudzulu kumweko Mulungu adakonzela dzuwa tenti,

⁵ linibula ninga nkuwasa ali kuchoka munyumba mwake, ninga mwamuna wamphamvu, an'thamanga njila yentse nakukondwa.

⁶ Linibula nakumbali inango yakudzulu, lichiyenda katsama kumbali inango yakudzulu, kulibe chinkwanisa kuchinjiliza kutentha kwalene.

⁷ Ntemo wa Chawuta niwakukonkholoka, um'bweza umoyo. Ufakazi wa Chawuta ngwakukhulupilika, uchipasa nzelu alibe nzelu.

⁸ Malango ya Chawuta niyakukonkholoka, yankondwelesa ntima. Mitemo ya Chawuta niyakuchena, im'banganusa maso.

⁹ Kugopa Chawuta kulibe katsa, kun'khalapo kufika lini nalini, Kutonga kwa Chawuta nkwachadidi, nkwakulungama chadidi.

¹⁰ Kunfunika kuposa golidhe, kuposa golidhe yakukoma kwene-kwene, kuntapila kuposa wuchi, kuposa wuchi wam'mazana yanyuchi.

¹¹ Kun'chenjeza mulanda wanu, ukakuteyeza uniwona mpfupo zizinji.

¹² Ko mbani munthu angabvesese kutaza kwake? Ndicheneseni pabzakuyipa bzangu bzidabisika kwayine.

¹³ Ndibwezeni ine mulanda wanu, pabzakuyipa bzanin'chita nakubzikuza, lekani kubzilekelela kuti bzinditonge! Nakutenepo ndizakhalembo munthu alibe katsa, ndichikhalambo wakuchena pabzinthu bzakuyipa bzizinji.

¹⁴ Lekani mafala yangu yatambiliwembo kwayimwe, lekani bzaninkumbuka muntima mwangu bzikhale patsogolo panu, imwe Chawuta, mphako yangu, nyakundilombola.