Nyimbo 119 - Bhukhu la Kuyamba

Ntemo wa Chawuta

¹ Niwakudala awo njila yawo niyakukonkholoka, anfamba m'mafundiso ya Chawuta!

² Niwakudala awo anteyeza umboni wake, animupsaga nantima wawo wentse,

³ pomwe ansaya kuchita chakuyipa, koma munjila zake anfamba!

⁴ Mudalewa maweluzo yanu, kuti yateyezewe bwino-bwino.

⁵ Nkhasa ninga njila zangu zikhali zakukhazikika, pakuteyeza malango yanu!

⁶ Pamwepo nin'zanyazisiwa lini, maso yangu yadanyangana mitemo yanu.

⁷ Nin'zakutendani nantima wakukonkholoka, panin'zafunda kutonga kwanu kwakulungama.

⁸ Nin'zateyeza malango yanu; imwe lekani kunditayilatu!

Kutetekela mitemo ya Chawuta

⁹ Ko mulumbwana angakhale tani adachena munjila yake? Pakuchengeta kuteyeza fala lanu.

¹⁰ Nantima wangu wentse, nimpsaga imwe; lekani kuti ndipatuke pamitemo yanu.

¹¹ Ndayikha fala lanu muntima mwangu, kuti ndileke kukutazilani pomwe.

¹² Dalisiwani, imwe Chawuta; ndifundiseni malango yanu!

¹³ Namilomo yangu ninilewa, kutonga kwentse kwamulomo wanu.

¹⁴ Munjila yawumboni wanu, ninkondwa, ninga bzanin'chitila chuma chentse.

¹⁵ Nin'zalingilila pamaweluzo yanu, ndichiyikha maso yangu panjila zanu.

¹⁶ Nin'zakondwa namalango yanu; nin'zayebwa lini fala lanu.

Kukondwela mitemo ya Chawuta

¹⁷ Chitilani bzizinji mulanda wanu, kuti ndikhale wamoyo, ndichiteyeza fala lanu.

¹⁸ Fungulani maso yangu kuti ndiyikhe maso, pabzinthu bzin'dabwisa kuchoka m'mafundiso yanu.

¹⁹ Ndine mulendo padziko lapantsi; lekani kundibisa mitemo yanu!

²⁰ Moyo wangu wadyewa nakusuwa, kusuwila kutonga kwanu nthawe zentse.

²¹ Imwe muntsimula wakubzikuza, wakutembelelewa, ampatuka pamitemo yanu;

²² chosani payine kunyazisiwa nakusekewa, pakuti ndidateyeza umboni wanu.

²³ Ne manduna yan'khala pantsi yachilewa bzayine, mulanda wanu an'zalingilila malango yanu.

²⁴ Pomwe umboni wanu ndiko kukondwa kwangu, ndiko kuninipasa nzelu.

Kubzipeleka kutetekela ntemo wa Chawuta

²⁵ Moyo wangu um'mamatila kupfumbi, ndimusuluzeni kuteyeza fala lanu!

²⁶ Pandidalewa njila zangu, imwe mudandidayila; ndifundiseni malango yanu!

²⁷ Chitani kuti ndibvesese njila yamaweluzo yanu, nin'zalingilila mabasa yanu yan'dabwisa.

²⁸ Moyo wangu unsweka nakusuwa; ndilimbiseni kuteyeza fala lanu!

²⁹ Chosani kwayine njila zakunama; ndikomeleni ntima, ndifundiseni mafundiso yanu!

³⁰ Ndasankhula njila yachikhulupililo, ndayikha kutonga kwanu patsogolo pangu.

³¹ Nim'mamatila pawumboni wanu, imwe Chawuta; lekani kuti ndinyazisiwe.

³² Nin'zathamanga munjila yamitemo yanu, mukakulisa ntima wangu!

Pemphelo lakubvesesa

³³ Ndifundiseni, imwe Chawuta, njila yamalango yanu; nin'zayiteyeza kufika kwakumalizila.

³⁴ Ndipaseni kubvesesa kuti ndichengete mafundiso yanu, nakuyateyeza nantima wangu wentse.

³⁵ Nditsogoleleni munjila yamitemo yanu, pakuti ninkondwa nayo.

³⁶ Kwewelani ntima wangu kuwumboni wanu, ayayi mukukhupuka nanjila yakudzonga!

³⁷ Bwezani maso yangu pakunyangana bzinthu bzapezi-pezi! Ndipaseni umoyo munjila zanu!

³⁸ Khazikisani kwamulanda wanu chitsimikizo chanu, chaawo an'gopa imwe!

³⁹ Chosani kunyozewa kwanin'gopa, pakuti matongelo yanu niyabwino!

⁴⁰ Wonani, ninsuwa maweluzo yanu! Muchilungamo chanu ndipaseni umoyo!

Kukhulupilila ntemo wa Chawuta

⁴¹ Lekani ntsisi zanu zibwele kwayine, imwe Chawuta! Chipulumuso chanu kuteyeza chitsimikizo chanu!

⁴² Pamwepo nin'zakwanisa kudayila anin'nyoza, pakuti nin'themba mufala lanu.

⁴³ Lekani kuchoselatu fala lachadidi pamulomo wangu! Pakuti nyanganilo yangu ili pamatongelo yanu.

⁴⁴ Nin'zakhala ndichiteyeza mafundiso yanu, kufika lini nalini;

⁴⁵ nin'zafamba-famba mumbuto yakupfuthuka, pakuti nimpsaga maweluzo yanu.

⁴⁶ Pomwe nin'zalewa bzawumboni wanu patsogolo pamazimambo, nin'zanyazisiwa lini;

⁴⁷ nin'zakondwa mumitemo yanu, yaninfuna.

⁴⁸ Nin'zasumusa manja yangu kumitemo yanu yaninfuna, nin'zalingilila pamalango yanu.

Kukhulupilila mitemo ya Chawuta

⁴⁹ Kumbukani fala lanu kwamulanda wanu, lidachitisa kuti ndikhale nachinyanganilo.

⁵⁰ Uku nkunyamaliziwa kwangu munyathwa yangu, kuti chitsimikizo chanu chinimpasa umoyo.

⁵¹ Wakubzikuza anin'nyoza kwene-kwene, koma ninsiya lini mafundiso yanu.

⁵² Ninkumbuka kutonga kwanu kwakale; nin'nyamaliziwa, imwe Chawuta.

⁵³ Nim'phatiwa nawukali kwene-kwene nathangwe lawanthu wakuyipa, awo antaya fundiso yanu.

⁵⁴ Malango yanu yakhala nyimbo zangu, munyumba yawulendo wangu.

⁵⁵ Ninkumbuka dzina lanu usiku, imwe Chawuta, ndichiteyeza mafundiso yanu.

⁵⁶ Ibzi ndibzo bzandikhanabzo, kuti nditeyeze maweluzo yanu.

Kuchengeta ntemo wa Chawuta

⁵⁷ Chawuta ndiye chigawo changu, nintsimikiza kuteyeza mafala yanu.

⁵⁸ Ninkumbila pamaso panu nantima wangu wentse, ndikomeleni ntima kuteyeza kutsimikiza kwanu.

⁵⁹ Ndikakumbuka njila zanu; nin'chungunusa nzayo zangu kuwumboni wanu.

⁶⁰ Ninkulumiza, nin'chedwa lini, kuteyeza mitemo yanu.

⁶¹ Ne bzingwe bzawakuyipa bzidandizungunuka, niniyebwa lini fundiso yanu.

⁶² Pakati pawusiku ninilamuka, ndichidumbiza imwe, nathangwe lamatongelo yanu yakulungama.

⁶³ Ndine shamwali yawentse an'gopa imwe, waawo anteyeza maweluzo yanu.

⁶⁴ Ntsisu zanu, imwe Chawuta, zadzadza dziko; ndifundiseni malango yanu!

Chilemela chantemo wa Chawuta

⁶⁵ Mwachitila bwino mulanda wanu, kuteyeza fala lanu, imwe Chawuta.

⁶⁶ Ndifundiseni kupima kwabwino, nakudziwa pakuti ninkhulupilila mitemo yanu.

⁶⁷ Ndinati ndawona nyathwa, ndidatayika; koma tsapano ninteyeza fala lanu.

⁶⁸ Ndimwe wabwino, mun'chita bzabwino! Ndifundiseni malango yanu.

⁶⁹ Wakubzikuza animpalanga magunkha, koma nantima wangu wentse ninteyeza maweluzo yanu;

⁷⁰ ntima wawo niwakupusa ninga mafuta, koma ninkondwa nafundiso yanu.

⁷¹ Bzili bwino kwayine kuti ndidapita panyathwa, kuti ndifunde malango yanu.

⁷² Fundiso lamulomo wanu lili bwino kwayine, kuposa bzigodo sawuzande bzagolidhe nasiliva.

Kulinganiza kwantemo wa Chawuta

⁷³ Manja yanu yadandilenga yachindikhazikisa, ndipaseni kubvesesa kuti ndifunde mitemo yanu.

⁷⁴ Awo ankugopani an'zandiwona achisekelela, pakuti ndidanyanganila mufala lanu.

⁷⁵ Nin'dziwa, imwe Chawuta kuti matongelo yanu njakulungama, mukukhulupilika kwanu mudandipitisa panyathwa.

⁷⁶ Lekani ntsisi zanu zindinyamalize, kuteyeza chitsimikizo chanu kwamulanda wanu.

⁷⁷ Lekani chifundo chanu chibwele kwayine kuti ndikhale wamoyo; pakuti fundiso yanu nkukondwa kwangu.

⁷⁸ Lekani wakubzikuza anyazisiwe, pakuti adandinamizila palibe mulandu; koma ine, nin'zalingilila pamaweluzo yanu.

⁷⁹ Lekani awo ankugopani abwele kwayine, kuti adziwe umboni wanu!

⁸⁰ Ntima wangu ngawukhale uli ngwilo pamalango yanu, kuti ndileke kunyazisiwa!

⁸¹ Moyo wangu unsuwa chipulumuso chanu; nin'nyanganila fala lanu.

⁸² Maso yangu yansuwila chitsimikizo chanu; nin'bvunza, “Mun'zandinyamaliza lini?”

⁸³ Pakuti ndakhala ninga chikasi chakhanda chavinyu muwutsi, koma ndilibe kuyebwa malango yanu.

⁸⁴ Nintsiku zingasi zamulanda wanu? Ko mun'zaatonga lini awo aninsawusa?

⁸⁵ Wanthu wakubzikuza andichelela bwina, wanthu ansaya kuteyeza mafundiso yanu.

⁸⁶ Yentse mitemo yanu njakukhulupilika; aninsawusa namagunkha, ndithandizeni!

⁸⁷ Atofika pakundimalizilatu padziko; koma ndilibe kutaya maweluzo yanu.

⁸⁸ Kuteyeza ntsisi zanu chizani umoyo wangu, kuti nditeyeze umboni wamulomo wanu.

Kukhulupilila mitemo ya Chawuta

⁸⁹ Chikhalilo, imwe Chawuta fala lanu, lidakhazikisiwa bzakulimba kudzulu.

⁹⁰ Kukhulupilika kwanu nikwam'badwe nam'badwe; mudakhazikisa dziko, ilo lin'khala lilipo.

⁹¹ Nakutonga kwanu bzilipo nalelo; pakuti bzinthu bzentse mbaalanda wanu.

⁹² Ninga fundiso yanu ikhali lini kukondwa kwangu, ndikhadachenekeka munyathwa zangu.

⁹³ Kufika lini nalini niniyebwa lini maweluzo yanu, pakuti mwayiyo mwandimusuluza.

⁹⁴ Ndine wanu ndichizeni; pakuti nimpsaga maweluzo yanu.

⁹⁵ Wakuyipa anim'bisalila kufuna kundicheneka; koma ninkumbuka umboni wanu.

⁹⁶ Ndidawona kumala kwakukoma kwentse, koma mitemo yanu niyakupfuthuka kwene-kwene.

Kufuna ntemo wa Chawuta

⁹⁷ Aa, nkufuna lini kwanin'chita fundiso yanu! Nilingililo yangu ntsiku yentse.

⁹⁸ Mitemo yanu inimpasa nzelu kuposa azondi wangu, pakuti in'khala nayine chikhalilo.

⁹⁹ Ndina kubvesesesa kuposa wentse aninfundisa, pakuti umboni wanu nilingililo yangu.

¹⁰⁰ Ninbvesesesa kuposa akulu, pakuti ninteyeza maweluzo yanu.

¹⁰¹ Nim'bweza minyendo yangu kunjila zentse zakuyipa, kuti nditeyeze fala lanu.

¹⁰² Nimpatuka lini pamatongelo yanu, pakuti imwe mudandifundisa.

¹⁰³ Nkutelela lini kwamafala yanu palilimi langu, yantapila kuposa wuchi nkamwa mwangu!

¹⁰⁴ Kupitila m'maweluzo yanu niniwona kubvesesa; nakutenepo nin'zonda njila zentse zakunama.

Kuwinika kwantemo wa Chawuta

¹⁰⁵ Fala lanu nimwenje kunzayo zangu, nakuwinika kunjila yangu.

¹⁰⁶ Ndalumbila lumbimbilo ndichilikhazikisa, kuti nditeyeze matongelo yanu yakulungama.

¹⁰⁷ Ndapwetekeka kwene-kwene, ndimusuluzeni, imwe Chawuta kuteyeza fala lanu!

¹⁰⁸ Tambilani mfupo zakupeleka zakudumbiza, imwe Chawuta, ndifundiseni mitemo yanu.

¹⁰⁹ Nin'khala ndidaphata umoyo wangu m'manja mwangu, koma niniyebwa lini fundiso yanu.

¹¹⁰ Wakuyipa anditeya ukhukha, koma nimpatuka lini pamalango yanu.

¹¹¹ Umboni wanu ninthaka yangu kufika lini nalini; yinde, ndiyo sekelelo yantima wangu.

¹¹² Nimpeleka ntima wangu kuchita malango yanu, lini nalini, kufika kumapeto.

Kuchengetewa nantemo wa Chawuta

¹¹³ Nin'zonda wanthu ansaya kubzipeleka nantima wentse, koma ine ninfunisisa fundiso yanu.

¹¹⁴ Pakubisala pangu nanchinjilizo yangu, ndimwe; nin'nyanganila mufala lanu.

¹¹⁵ Chokani payine, imwe mun'chita bzakuyipa, kuti nditeyeze mitemo ya Mulungu wangu.

¹¹⁶ Nditsigileni kuteyeza chitsimikizo chanu, kuti ndikhale wamoyo, kuti ndileke kunyazisiwa muchinyanganilo changu.

¹¹⁷ Ndiphateni kuti ndipulumuke, ndikhale ndichikumbuka malango yanu!

¹¹⁸ Munilamba wentse antayika kuchoka m'malango yanu; yinde, kuchenjela kwawo nkwapezi.

¹¹⁹ Wakuyipa wentse wapadziko muniwataya ninga bzinthu bzapezi-pezi; nakutenepo ninfuna umboni wanu.

¹²⁰ Nyama yangu intetemela nakugopa imwe, nin'gopa matongelo yanu.

¹²¹ Ndachita kutonga nachilungamo; lekani kundisiya m'manja mwaanyakundipondelela!

¹²² Khalani chiphatiso chamulanda wanu kuti bzimukomele! Lekani kuti wakubzikuza andipondelele!

¹²³ Maso yangu yansuwila chipulumuso chanu, pomwe yansuwila chitsimikizo chanu chakulungama.

¹²⁴ Chitilani mulanda wanu kuteyeza ntsisi zanu! Ndifundiseni malango yanu!

¹²⁵ Ndine mulanda wanu, ndipaseni kubvesesesa, kuti ndidziwe umboni wanu!

¹²⁶ Ninthawe ya Chawuta kuti achite, aphwanya fundiso yanu.

¹²⁷ Nakutenepo ninfuna mitemo yanu, kuposa golidhe, kuposa golidhe yakunyodoka.

¹²⁸ Nakutenepo niniwona maweluzo yanu yentse kukhala yakukonkholoka, nin'zonda njila zentse zamagunkha.

Kutetekela ntemo wa Chawuta

¹²⁹ Umboni wanu un'dabwisa, nakutenepo moyo wangu uniwuchengeta.

¹³⁰ Kubula padecha kwamafala yanu kwawinikila, kumpasa kubvesesesa kwawakupusa.

¹³¹ Niniyashama mulomo wangu, ninfemuluka, pakuti ninsuwila mitemo yanu.

¹³² Chewukilani kwayine mundikomele ntima, kuteyeza ntongelo wanu kwaawo anfuna dzina lanu.

¹³³ Mulimbise nzayo zangu kuteyeza tsimikizo yanu, bzakuyipa ngabzileke kunditonga.

¹³⁴ Ndilomboleni kuchoka mukupondelela kwawanthu, kuti nditeyeze maweluzo yanu.

¹³⁵ Winikani nkhope yanu kwamulanda wanu, mundifundise malango yanu.

¹³⁶ Maso yangu yakuyelela tukamadzi twamisozi, pakuti wanthu anteyeza lini fundiso yanu.

Kulungama kwantemo wa Chawuta

¹³⁷ Ndimwe wakulungama, imwe Chawuta, pomwe kutonga kwanu nkwakukonkholoka.

¹³⁸ Mudalewa umboni wanu muchilungamo namuchikhulupililo chachadidi.

¹³⁹ Shungu zangu zandidya nathangwe lakuti azondi wangu akuyebwa fala lanu.

¹⁴⁰ Chitsimikizo chanu n'chakuchenesewa kwene-kwene, mulanda wanu an'chifuna.

¹⁴¹ Ndine wakuchepseka, pomwe wakunyozeka, koma niniyebwa lini maweluzo yanu.

¹⁴² Chilungamo chanu n'chakulungama kufika lini nalini, fundiso yanu n'chadidi.

¹⁴³ Nthamu nakuwawidwa bzandiphata, koma mitemo yanu nkukondwa kwangu.

¹⁴⁴ Umboni wanu niwakulungama kufika lini nalini, ndipaseni kubvesesesa kuti ndikhale wamoyo.

Pempelo lakuchiziwa

¹⁴⁵ Nantima wangu wentse, ninilila; ndidayileni, imwe Chawuta nin'zateyeza malango yanu!

¹⁴⁶ Ninilila kwayimwe, ndichizeni! Kuti nditeyeze umboni wanu.

¹⁴⁷ Ninilamuka kumadandakucha ndichililila thandizo, nin'nyanganila mafala yanu.

¹⁴⁸ Maso yangu yan'khala yadapenya usiku wentse, kuti ndilingilile pachitsimikizo chanu.

¹⁴⁹ Ibvani fala langu kuteyeza ntsisi zanu! Imwe Chawuta, kuteyeza kutonga kwanu, musuluzani umoyo wangu!

¹⁵⁰ Afendela pafupi awo aninsawusa nanzelu zakuyipa, ali kutali nafundiso yanu.

¹⁵¹ Koma imwe Chawuta muli pafupi, pomwe mitemo yanu yentse n'chadidi.

¹⁵² Kuyambila kale ndidadziwa muwumboni wanu, kuti ndimwe mudabziyamba kufika lini nalini.

¹⁵³ Nyanganani nyathwa zangu, mundipulumuse! Pakuti niniyebwa lini fundiso yanu.

¹⁵⁴ Ndileweleleni mundilombole, ndimusuluzeni kuteyeza chitsimikizo chanu!

¹⁵⁵ Chipulumuso chili kutali kwawakuyipa, pakuti ampsaga lini malango yanu.

¹⁵⁶ Chifundo chanu n'chikulu, imwe Chawuta, ndimusuluzeni kuteyeza matongelo yanu.

¹⁵⁷ Aninsawusa naanin'zonda mbaazinji, koma ine nimpatuka lini muwumboni wanu.

¹⁵⁸ Nin'nyangana amaluku ndichinyantsiwa, pakuti anteyeza lini bzamunilewa.

¹⁵⁹ Wonani kufuna kwanin'chita maweluzo yanu! Imwe Chawuta, ndimusuluzeni kuteyeza ntsisi zanu!

¹⁶⁰ Nsolo wafala lanu n'chadidi; ntongelo wanu wentse wakulungama um'mala lini.

Kubzipeleka kwa Chawuta

¹⁶¹ Manduna yaninsawusa palibe mulandu, koma ntima wangu un'gopa mafala yanu.

¹⁶² Ninsekelela thangwe lafala lanu, ninga munthu waphata sipodyo izinji.

¹⁶³ Nin'zonda, ndichinyantsiwa namagunkha, koma ninfuna fundiso yanu.

¹⁶⁴ Ninkudumbizani kanomwe pantsiku yokha-yokha, nathangwe lamatongelo yanu yakulungama.

¹⁶⁵ Nkhalo ikulu ina awo anfuna fundiso yanu; palibe chiniwachitisa kuti akhukhumudwe.

¹⁶⁶ Nin'nyanganila chipulumuso chanu imwe Chawuta, nin'chengeta mitemo yanu.

¹⁶⁷ Moyo wangu un'chengeta umboni wanu, niniwufuna kwene-kwene.

¹⁶⁸ Ninteyeza maweluzo yanu, nawumboni wanu, pakuti njila zangu zentse zili patsogolo panu.

Pemphelo lakukumbila thandizo

¹⁶⁹ Lekani kulila kwangu kufendele patsogolo panu, imwe Chawuta! Ndipaseni kubvesesesa kuteyeza fala lanu!

¹⁷⁰ Lekani kukumbila kwangu kubwele patsogolo panu! Ndipulumuseni kuteyeza fala lanu!

¹⁷¹ Milomo yangu in'zathulula dumbizo, kuti mundifundise malango yanu.

¹⁷² Lilimi langu lin'zayimba bzafala lanu, pakuti mitemo yanu yentse niyakulungama.

¹⁷³ Lekani janja lindithandize! Pakuti ndasankhula maweluzo yanu.

¹⁷⁴ Ninsuwa chipulumuso chanu, imwe Chawuta, fundiso yanu nkukondwa kwangu.

¹⁷⁵ Musuluzani moyo wangu, kuti ndikudumbizeni! Lekani matongelo yanu yandithandize!

¹⁷⁶ Ndatsakalila ninga bila latayika, psagani mulanda wanu, pakuti niniyebwa lini mitemo yanu.