Nyimbo 116 - Bhukhu la Kuyamba

Wakuchiziwa kuyimpfa anilemekeza Mulungu

¹ Ninfuna Chawuta pakuti adabva fala langu, adabva kukumbila kwangu,

² pakuti adateya khutu lake kwayine, nakutenepo nin'zachemelela kwayiye muntsiku zangu.

³ Bzingwe bzayimpfa bzandimanga; kubzanya kwambuto yawanthu wakufa kwandiphata; ndawona nthamu nakuwawidwa.

⁴ Pamwepo ndidachemela dzina la Chawuta: “Imwe Chawuta ndaphata minyendo yanu, chizani umoyo wangu!”

⁵ Chawuta niwakukoma ntima nawakulungana; Mulungu wathu niwachifundo.

⁶ Chawuta an'chengeta wanthumbo bzawo; ndidadelezewa, pomwe adandichiza.

⁷ Bwelela, iwe moyo wangu kumpumulo wako; pakuti Chawuta wakuchitila bzizinji kwene-kwene.

⁸ Pakuti imwe mwapulumusa moyo wangu kuyimpfa, maso yangu kumisozi, nzayo zangu kukukhukhumudwa;

⁹ ninfamba pamaso pa Chawuta, m'madziko yawanthu wamoyo.

¹⁰ Ndidakhulupilila, ne pandikhati, “Ndili munyathwa kwene-kwene.”

¹¹ Mwakankulumiza ndidati, “Wanthu wentse ana magunkha.”

¹² Ko Chawuta ningampagalenyi, pabzentse bzabwino bzaadandichitila?

¹³ Nin'zasumusa nkombo wachipulumuso, ndichichemela dzina la Chawuta.

¹⁴ Nin'zachita bzandidalumbilila kwa Chawuta, patsogolo pawanthu wake wentse.

¹⁵ Nichantengo wapadzulu kwene-kwene pamaso pa Chawuta, yimpfa yawantsisi wake.

¹⁶ Ndaphata minyendo yanu, imwe Chawuta; ndine mulanda wanu, mwana wamulandakazi wanu, mwatsudzula bzingwe bzangu.

¹⁷ Kwayimwe, nin'zapeleka ntsembe yakutenda, pomwe ndichichemela dzina la Chawuta.

¹⁸ Nin'zachita bzandidalumbilila kwa Chawuta, patsogolo pawanthu wake wentse,

¹⁹ mubzintalo bzanyumba ya Chawuta, nkati mwako, iwe Jerusalema. Aleluya!