Nyimbo 115 - Bhukhu la Kuyamba

Mulungu m'bodzi wachadidi

¹ Kwayise nee, imwe Chawuta, kwayise nee, koma kudzina lanu pelekani ulemelelo, nathangwe lantsisi zanu nakhulupilika kwanu!

² Ko thangwe lanyi madziko yachilewa kuti, “Mulungu wawo ali kuponi?”

³ Mulungu wathu ali kudzulu; bzentse bzaanfuna an'chita.

⁴ Bzifanikizo bzawo nisiliva nagolidhe, mabasa yamanja yamunthu.

⁵ Bzina milomo, koma bzinilewa-lewa lini; bzina maso, koma bziniwona lini.

⁶ Bzina makutu koma bzim'bva lini; bzina mphuno, koma bzin'nunkhiza lini.

⁷ Bzina manja koma bzim'phata lini; bzina minyendo, koma bzinfamba lini; pomwe bzin'chosa lini fala pangololo pabzene.

⁸ Awo am'bzikonza aninga ibzo; nawentse an'themba nayibzo.

⁹ Iwe Izraeli, themba na Chawuta! Iye ndiye thandizo lawo nanchinjilizo yawo.

¹⁰ Iwe nyumba ya Aroni themba Chawuta! Iye ndiye thandizo lawo nanchinjilizo yawo.

¹¹ Imwe mun'gopa Chawuta thembani Chawuta! Iye ndiye thandizo lawo nanchinjilizo yawo.

¹² Chawuta antikumbuka, an'zadalisa; an'zadalisa nyumba ya Izraeli; an'zadalisa nyumba ya Aroni;

¹³ An'zadalisa awo an'gopa Chawuta, ang'ono naakulu.

¹⁴ Chawuta ngaakuthimizileni, imwe nawana wanu!

¹⁵ Ngamudalisiwe na Chawuta, nyakulenga kudzulu napantsi!

¹⁶ Kudzulu nkudzulu kwa Chawuta, koma dziko lapantsi lidapasiwa kwawana wamunthu.

¹⁷ Wakufa an'dumbiza lini Chawuta, panango wale aniyenda kukunyamala.

¹⁸ Koma ise tin'zadalisa Chawuta, kuyambila nthawe ino kufika lini nalini. Aleluya!