Nyimbo 112 - Bhukhu la Kuyamba

Kukondwa kwamunthu wabwino

¹ Aleluya! Niwakudala munthu an'gopa Chawuta, ankondwa kwene-kwene namitemo yake!

² Wana wake an'zakhala nambili padziko; m'badwe wakukonkholoka un'zadalisiwa.

³ Chuma nakukhupuka bzin'zakhala munyumba mwake; chilungamo chake chim'mala lini.

⁴ Mwenje uniwinika mun'dima wawakukonkholoka; niwakukoma ntima, niwachifundo, nawakulungama.

⁵ Ali bwino munthu wakukoma ntima, ankweletesa; anfambisa bzinthu bzake mwakulinganiza.

⁶ Nthawe zentse an'zatekenyesewa lini; wakulungama an'zakumbukiwa nthawe zentse.

⁷ An'gopa lini mpfeso zakuyipa; ntima wake udalimba, an'themba Chawuta.

⁸ Ntima wake niwakukhazikika, an'zagopa lini, kufikila wawona kukundiwa kwaazondi wake.

⁹ Ampeleka namoyo wentse, ampasa amphayi; chilungamo chake chim'mala lini; mphamvu zake zinkuziwa muchilemelelo.

¹⁰ Wakuyipa am'bziwona achikalipa; ankukuta mano yake achisungunuka; chaanfuna wanthu wakuyipa chim'mala.